《2017行政長官特首選舉嘅三個女人， 令我明白咩係女人嘅福氣》
行政長官特首選舉嘅聚焦當然係三個特首候選人， 薯片叔叔， 胡國興同林鄭月娥， 第五屆行政長官當選人係一個女人， 香港縷繼有手信之後， 終於都有一個女特首...
大家聚焦嘅係三個特首候選人，但我就特別留意三個女人， 第一個當然係林鄭月娥， 第二個係葉劉淑儀， 第三個就係曾黃蓮華。
如果要比較以及排列出呢三個女人所得到嘅福氣...
最有福氣當然係曾黃蓮華，其次我會覺得葉劉淑儀係第二個較有福氣嘅人， 最無福氣就係林鄭月娥...福氣排行榜，當然只係一個非常主觀嘅排列。
一個女人嘅福氣， 唔單只係自己感覺「自己同全家都好幸福」， 仲要其他女人都認同而且覺得你好幸福...
唔係點解咁多女人都鍾意曬命， 鍾意強調自己個老公係專業人士富二代搵到錢有型靚仔， 結婚擺酒要大排筵席， 鍾意有龍鳳鈪鑽石戒指高潮樓， 因為冇曬呢啲表面嘢， 點同其他姊妹講自己好幸福?冇曬呢啲嘢， 點說服其他姊妹認同自己好幸福呢?
曾黃蓮華嘅幸福，係得到社會廣泛嘅認同， 有一個事業有成嘅老公，個老公嘅公眾image 仲要咁正面，又幽默又長情， 有一個好似家計會logo嘅家庭， 有仔有女。 得到全港所有「姊妹」認同曾俊華係一個好老公，同一時間曾黃蓮華都得到廣泛嘅認同， 佢係一個好老婆， 所有人都會認同曾黃蓮華非常支持佢老公。
有乜嘢係開心得過，全世界都支持自己老公做特首，而好彩老公選唔到...
有乜嘢係開心得過知道個老公可以甩難，唔使做呢份衰工， 曾俊華可能好失望，但相信曾黃蓮華就感到人生充滿希望。 有乜嘢好彩得過，競選期間，畀老公知道自己可以共患難，而最終選完可以唔使真正履行共患難嘅責任。老公雖然落選，但曾黃蓮華已經喺老公心目中得到滿分，曾俊華將來都會心存感激。落選 亦意味唔再需要日日做公關工作， 作為一個退休師奶， 可以重過蛋黃哥嘅生活， 輕輕鬆鬆咁同曾俊華live happily ever after， 呢啲咪福氣囉。
可能大家會問，葉劉淑儀點會比林鄭月娥有福氣呢?一個野心咁大， 能力不足 ， 又經常葡萄其他人嘅女人， 最大嘅福氣其實係冇得做特首。 葉劉淑儀當選行政長官， 只會力不從心， 反而落選， 以局外人嘅身份， 食花生睇林鄭點死， 仲開心啦。 正如唐英年落選， 每次出嚟評論梁振英， 都難掩嘴角向上揚， 食花生嗰種快樂。
今日林鄭月娥當選嘅時候， 主動向老公say sorry， 話咁多年以來犧牲咗好多同家人相處嘅時間， 犧牲咗同老公相處嘅機會， 同老公見面嘅時間少到被外界懷疑，老公一早已經喺外邊收埋紅顏知己， 林鄭提及嚟緊五年都要老公繼續犧牲。
鏡頭一轉， 林鄭身旁嘅林兆波， 一個講嘢幾乎少過王菲嘅學者， 今日反應離奇地快，聽到林鄭叫佢繼續犧牲，林生講咗句： 為香港願意繼續犧牲。 唔知點解， 我覺得林兆波係按耐不住內心嘅暗爽，佢似乎係more than willing 犧牲同林鄭見面嘅時間。 林兆波當刻嘅笑容真係發自內心 ， 佢就好似一個小朋友日日喺屋企打機， 最驚嘅就係返工嘅阿媽， 有一日宣佈辭職， 全職返嚟做家庭主婦。
林鄭月娥唔只要喺嚟緊呢五年做呢份衰工，仲會錯意，以為老公會唔捨得自己工作太忙冇咗見面嘅時間， 實情係，佢老公好似唔多想見到佢， 我feel到林兆波根本想個老婆係織女，每年例行見一次就好啦。
如果同曾黃蓮華玩truth or dare，當選行政長官？ 確實係「真的不想得到這福氣」
