Agency界聽過不止一次的江湖傳聞，有位4As嘅Designer，成日開夜，同事們都習慣朝早返工都會見到佢仲係度野。有一朝，見到個同事伏咗係枱上，以為他只是太累，不以為意。怎料後來，發現他一朝未醒，同事上前輕拍他時，已經僵硬了。
又聽過有個公關，經常開夜通宵達旦，某日同個客對對下稿，個客只係聽電話筒跌落枱嘅聲，然後呢個公關就永遠無再應佢，猝死了。
呢啲江湖傳聞真係每隔兩年，在最瘋癲工作時就會聽到。有啲人會話：唓，你地嚇鬼咩？邊有死得咁易。但的確，人好多時死起上嚟，真係話都無咁易。
當然好多人會笑呢班通宵達旦做嘢嘅人傻仔，的確，呢班人真係要好好保重自己。但好想大家喺話呢班人之前，要明白我地呢班公關/designer/agency/marketing，我地係成條食物鏈嘅中間。如果我地一停，上下左右前後嘅人都會因你停工，而無得傳達訊息或者落brief要停。然稍為有責任心嘅人，每個project都係我哋係心血，係完全唔可以話你死你事，由得佢囉！因為你唔做，係agency嘅世界裡面，就係無人做。如果你唔好彩遇上幾個仆街同事，分分鐘你仲要因佢嘅錯而做埋佢果份。
作為一個趕deadline嘅行業，你估你話想抖，港鐵紅隧巴士站嘅artwork就可以俾你遲交一日？阿客趕住交上HQ嘅document係會因為你嘅病而唔駛交？聽日要攪嘅活動，可以因你唔舒服而唔駛overnight setup？
唔會，係唔會呀！！！
而喺agency嘅世界，好多事往往只係你一個人跟，又或者頂多兩三個人一條小team跟一件事。唔識嘢嘅人可能問：做咩唔俾多啲人跟？你有無玩過「以訛傳訛」？同一個訊息係越多人裡面打轉，就越大機會錯；加上你以為阿客嘅budget幾百萬未開頭，都唔會俾你啦！可以afford到好多manpower咩？有時窮到helper都請唔到多個啦！
我明白好多唔明白行業嘅運作，又愛惜我地嘅人，所以有時會俾啲令到我地好洩氣嘅安慰。有頭髮又有邊個想做癩痢，其實有陣時我地都係身不由己。
其實，俾啲耐心聽下我地呻，關心下，唔會因為我哋太忙出席唔到約會而疏遠我地，對於呢班無日無夜開工嘅人嚟講，已經係一種支持。
#當然保重身體係好緊要 #做event時記住要偷走去痾尿 #想講粗口時千祈咪谷住 #有得食時千祈咪讓人 #有得偷坐就千祈咪企
