我女朋友要湊孫（上）
「無論貧窮、疾病，就算你變老、變醜，都唔會改變我對你嘅愛。」
好多男仔拍拖嗰陣，都曾經講過類似嘅承諾。
年少輕狂，講嗰一刻，通常都係真心嘅。
我叫文仔，今年廿一歲，讀緊大學。
讀大學就梗係想拍拖啦，可惜，我喺學校搵唔到合適嘅對象。
後來，我喺校外參加咗行山團，無心插柳，識咗音音。
音音係一個好女仔，佢同一般港女唔同㗎，出街果陣會同我AA制，有時仲堅持要請我食飯添。
而且，佢仲識做家務，煮得一手好餸，依加仲有幾多香港女仔識煮飯？
所以，我好快就同咗音音一齊，深深地愛上咗佢。
音音係我嘅初戀，其實，我已經認定咗，佢係我本來嘅老婆。
只不過，我知道自己未有能力照顧佢，所以只可以許下承諾。
但我估唔到，呢個承諾會咁快受到考驗。
嗰日我約咗音音睇戲，我哋約喺商場門口等。
我遠遠就見到一個男人，同音音拉拉扯扯。
「喂，你放開佢！」我大喝一聲。
個男人好似聽唔到咁，仲同音音講：「你跟我返屋企！」
個男人目測三十幾歲，唔通音音秘密結咗婚？
「你再唔放開佢，我就報警㗎啦。」我拎出電話，作勢要報警。
個男人都唔驚，反而係音音話：「唔好報警！」
睇住音音維護佢，我心中一沉，忍唔住問：「佢係你老公？」
「痴線！」個男人好大反應：「佢係我老母啊。」
「你話咩話？」我唔敢相信我嘅耳仔。
個男人翻白眼：「佢係我老母，我係佢個仔，十月懷胎生出嚟嘅仔，滿意未？」
「佢先廿二歲，點可能係你阿媽？」我反駁。
個男人嗤之以鼻：「廿二歲？你有冇睇過佢身份證？」
我搖頭，邊有人拍拖會睇對方身份證㗎。
男人一手從音音個褲袋扯出佢嘅銀包，拎張身份證出嚟。
音音好似心虛咁，唔敢用力反抗。
我清晰見到，音音嘅出生年份係1950年，即係今年71歲。
但係，身份證上嘅相係一個阿婆，同音音完全唔似。
「係咪……個阿婆同佢同名同姓咋？」我講完，但自己心底都否決咗呢個可能性。
我哋一齊望向音音，音音表情尷尬，但個男人虎視眈眈咁，佢只好講出真相。
原來，音音今年真係71歲。
當年嘅女人比較早婚，所以佢讀完書冇幾耐，21歲就結咗婚，嫁畀屋企人安排嘅相親對象。
佢同老公冇咩驚天動地嘅愛情故事，但老公對佢亦唔算差，就係普通夫妻，一齊生活咁。
幾年後音音生咗大仔，就係眼前呢個男人，佢叫阿邦。
之後又生咗個女，總共生咗四個細路。
於是，音音嘅生命就係照顧仔女同做家務。
所有人都同佢講，等仔女長大，佢就會自由㗎啦。
音音一直等啊等，去到五十幾歲，終於所有仔女都長大，有自己嘅生活。
點知呢個時候，佢老公病咗，雖然屋企勉強夠錢去醫病，但音音都要照顧老公。
好啦，老公過身後，阿邦個仔又出世，要音音幫手湊孫。
「我想要自由，想要自己嘅生活啊！」音音反問我：「我有錯咩？」
阿邦問：「唔好講埋晒啲廢話，我想知，你點樣變成依加咁？」
「有次我出街買餸，見到一間『煩惱小店』，我行入去睇吓，個店主問我有咩煩惱，我講晒出嚟，佢就賣咗支『回春唇膏』畀我。」
音音話，佢出咗舖頭之後，搽咗支唇膏，第二日個樣就變番廿幾歲咁樣，支唇膏都消失咗。
下集：https://bit.ly/3vn60Wz
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我女朋友要湊孫
