【勿演米線與後生陀地】
喺觀塘上咗個麻甩佬，話要去上海街。咁鬼長嘅上海街，問佢幾多號近邊度又語焉不詳，淨係叫我朗豪坊入，簡直係費時失事。
咁去到上海街，我就貼住一邊慢慢行，費事佢突然話要停。「係咪呢度呀？」每過一個街口，我都不厭其煩咁問一問。唔知問到第三次，麻甩乘客終於有「唔係」以外嘅答案：「一定唔係呢度，呢間好差㗎。」我睇唔到乘客眼光望住咩，我自己望出去只見到便利店、餐廳，同幾檔紅色光管。「點差法？服務差？」我學風水師咁拋出模凌兩可嘅問題，按乘客答案而修正自己嘅主語。
「個手法差呀，又話後生陀地，推條唔識講廣東話嘅大陸妹俾我，當我傻仔呀。」雞蟲亦不過是普通人，語氣中貨不對辦嘅憤慨，實在相當熟悉。「北姑當陀地好平常，叫雞都係睇樣睇身材啫，理得佢邊度人。」我諗起嘅係國產凌凌漆嘅著名陀地。
「如果淨係諗住出個火就梗係無所謂，不過我講明要香港女仔，佢咁呃我就接受唔到。」「可能佢真係香港人呢？」我隨口講個可能性，撞中咗麻甩乘客嘅爆點：「佢真係話佢有『生墳爭』呀，我屌佢，呀⋯⋯無屌佢，揸住『生墳爭』同我講係腥港人，食屎啦。」
面對激動嘅乘客，我都唔知講乜好。咁啱停燈位，見到有人拎住譚仔外賣，靈機一觸：
「都愈嚟愈平常啦，買勿演米線咪又係咁，我載親客去安達、水泉澳都係有口音㗎。」「愈溝愈淡，每日150個話自己係腥港人，好多已經係本地大學畢業生，可以考差佬、考政府，選議員，全部都係用我哋啲資源上位㗎。」
一剎那間，我以為佢係選舉助選團，忽略咗佢其實係預備去洩慾嘅雞蟲一名。當然，下一盞粉紅燈提醒返我要落低乘客：「係咪呢檔呀？咁你唔好去恰香港啲女仔啦，搵檔大陸落嚟揸『生憤爭』嗰啲，慢慢屌爆佢囉。有無一蚊呀？無就由佢，你屌埋我嗰份。」
麻甩佬落車後，車廂內隱隱仲有陣汗味，我落低少少玻璃，等晚間嘅乾燥空氣洗擦車廂。去到佐敦道向左走向右走嘅燈位，難免想道，溫熱嘅污水一點一滴咁混入香港，即使偶爾有啲清徹無瑕嘅泉水加入，都同樣令原本嘅香港味淡化。今日嘅佐敦道，聽日可能變姚明街，今日用真港幣俾的士錢，聽日可能要用支付寶先得，赤化無處不在咁發生，偏偏好多香港人為咗方便覺得赤化無問題。你覺得勿演米線好好笑？唔使十年，就會有班陀地笑你講墨丸米線係口音不正。
-------------------------------------------------------------------------
大家可以FOLLOW我嘅
IG：lazytaxihk
同白告作者ACC，入面有啲短篇故事，同一啲生活評論等等。
#lazytaxi
#的士
#taxi
#我的你的紅的
