（繼續鬧大台）
—
作為旗幟鮮明嘅TBB HATER，逢親無線有咩新搞作我都唔太睇得順眼。例如之前力推嘅MYTV SUPER我已經頗為不滿，因為連免費台都搞得咁差咁HEA，仲想去搶佔收費電視市場？為左撈油水，為左將其他競爭者趕盡殺絕，究竟可以去到幾盡而妄顧真實嘅市場需要。
—
而有D野我愈討厭，我通常就會愈留意。近呢一兩日班藝人嘅IG紛紛開POST話自己已經開左「大台網」嘅ACC（究竟係幾自大嘅公司先改得出呢個名？），叫人FOLLOW睇佢地直播，又話有好多野睇乜乜物物，我先發現"BIG BIG CHANNEL"個APP今日正式啟用。
—
之前見到隻設計好流嘅「大明猩」係度跳老舞，原來就係為左呢個APP，亦再一次反映到管理層根本全無市場觸覺，只為CAP水。
—
點解呢？個APP以藝人和KOL直播AND與觀眾互動作招徠，江嘉敏可以即時同你SAY HELLO，好似又幾吸引，但其實只係舊瓶新酒。呢樣唔係FACEBOOK同IG一直以黎做緊嘅野黎？點解仲要自立門戶？原因好簡單，就係因為大台會覺得自己D藝人好紅，足以令全球嘅人去DL呢個APP睇直播，玩活動，分攤埋FACEBOOK,IG嘅市場，廣告源源不絕，自然就賺到開巷啦係咪先？
—
但個事實係，大台班「精兵」係咪真係咁有吸引力呢？姑勿論每個人嘅質素，百貨應百客，但TBB係實際層面上已經比唔到藝人應有嘅機會，就例如黃金時段嘅兩線劇已經比中國嘅作品攻佔左，唔通成個台嘅人都要搶住去加入《愛回家》同《賭城群英會》嘅劇組？抑或去做下一個「是非精」啊？
—
所以搞乜花臣都係假，只係造繭自縛，如果可以比心機去拍多兩線劇，起碼就多最少幾十個藝人有正當曝光嘅機會啦，洗乜去做D無謂嘅直播，本土作品始終係重中之重。
—
而無線嘅連番舉動其實亦只是苦了藝人，有能者無能者俱無上位的機會，用人唯親，咁唯有自己造新聞啦，例如TVB官媒東網嘅慣技，扮「偷拍」，沙灘騎膊馬，著內衣跑步，低胸掃街等等等等，造成百鬼夜行，陰兵借道，牛鬼蛇神出巡嘅局面，都咪話唔傷眼。
—
而搞直播，搞FOLLOWS都係過左班藝人一棟姐，邊個想離開IG而去「迫迫」CHANNEL宣傳自己呀？唔驚有同台人士直接比較而顯得自己有幾咁受「歡迎」呀？須知道佢地D IG FOLLOWERS有幾多係真人黎先得架（如有人有興趣，我教大家分真假），要班明猩從零開始其實好易，始終佢地咁「紅」，係咪先？
—
TVB
Big Big Channel
星夢娛樂集團 The Voice Entertainment Group
See See TVB
方以文 睇電視喇喂
on.cc 東網／東方日報
