不如簡單講兩套上期積落睇左又無寫嘅戲：
【《#逃獄兄弟》】意外地好睇，輕鬆好笑，完全唔需要執著逃獄方法work唔work，用喜劇包裝就對佢要求唔會特別高，對佢同場景不同視角反覆介紹人物出場嘅手法有驚喜。張繼聰完全翻揼《P風暴》角色，譚耀文條線寫得幾好，柏天男又係抄PrisonBreak，張建聲就唔夠戲份發揮。第二集劇本製作中，樂見香港有多啲呢種大眾化、比較低成本、有好多甩漏又無乜所謂raw raw哋嘅片。
.
【#唐人街探案3】事前特登為咗第三集睇返一同二，基本上整個系列（無睇劇集）都幾鍾意。《唐人街探案3》無講到咁衰，不過中間叉開咗去玩遊戲的確淡化咗主線麻麻地。第一集密室殺人第二集連環兇殺，今次主命案去返密室殺人但絕對無第一集set得咁好。個人喜歡電影裡面熱鬧歡樂氣氛，好多時間都笑得開心，追逐打鬥一集比一集多及大型。多錢洗無罪，唔止有能力請到日本大明星，但反而投入過多動作大場面，下下通街千人斬咁款，花更多時間落去把案件深化會好啲。佩服戲中做到大量封街實景拍攝，一流特技下的澀谷十字路口，視覺呈現解謎更多樣性（可以話抄考再進化Sherlock Mind Palace），而王寶強人設係有啲煩不過睇開就可接受，真係唔覺得套戲爛，新年睇熱熱鬧鬧全場反應都幾好。
