多謝你
"因為我發覺觀塘已經紅到再無組織會再為市民發聲，我唔做，原來就已經無人會做。"
『觀塘音樂噴泉系列』區議員回應評價(好忙直接睇24)
之前呢我地就做左過『問問區議員對音樂噴泉既回應』，由唔係好知區議會點解有呢個決定，到問問吓，越問越想問吓自己，究竟點解香港會出現咗咁畸形嘅議會，點解一個so-called 有公民提名一人一票符合國際標準真普選嘅區議會會搞成咁？究竟呢個係議員定係市民嘅問題？(唔得閒直接睇24)
喺呢個打電話問議員嘅行動入面，我重新認識咗我哋觀塘嘅區議員。有少少評價，我希望可以好中肯咁表達到我對佢哋嘅意見。
1.我從來無諗過會俾區議員cut 線。喺觀塘區議會內，原來唔只一個會咁做。世界級嘅區議員有兩個，一個叫劉定安，另一個叫施能熊。
2.有一部份議員嘅聯絡方法非常落伍，根本就存心唔想市民搵到佢。得個辦事處電話而又永遠唔喺辦事處，come on，依家2015年啦，俾個手提電話號碼都得啩。議員太多不能盡錄，各位可以上區議會網頁睇吓佢哋提供嘅聯絡方法。
3.不過有班一打就搵到嘅就要讚(其實唔係基本咩？)，包括蔡澤鴻、馬軼超、顏汶羽、何啟明、謝淑珍、黃啟明、姚柏良、馮錦源同葉興國。
4.特別想講係陳俊傑，雖然係打唔通，但佢即時send 咗個mms 俾我話佢開埋會，之後亦都有覆，真心唔錯。其實只係㩒一個掣，一個電話function，但就係做同唔做嘅問題。不過之後感覺就唔係幾好，因為陳俊傑佢答得好差之餘，仲話有電話入收咗我線。
5.除咗陳俊傑嘅借電話遁，同場加映溤美雲嘅借case遁；柯創盛嘅借揸車遁；徐海山嘅借朋友遁；陳耀雄嘅借開會遁；蘇麗珍嘅借活動遁。遁之前佢哋都應承會打返俾我哋，但到今日都未覆，可能仲忙緊。
6.我唔評論潘進源係咪吹水，但佢有句我係非常同意嘅 - 「無論你住藍田又好，住沙田都好，你打得嚟，我就要盡力答你嘅問題。」有啲議員只識推嚟推去。你喺區議會有票㗎，可以答唔知嘅咩。表表者係委任果批，林峰同林亨利。姚百良我唔知幸災樂禍定點，佢都推咗俾潘進源。
7.潘進源講嘅九成支持係因為民建聯聲稱做過一個一千人回應嘅問卷，問卷嘅問題係問觀塘應唔應該發展旅遊業，觀塘海濱公園應唔應該加設施，之後無限引申去九成市民支持起噴泉。
8.陳振彬比較特別，因為佢唔喺香港，所以只係打咗一次，希望大家留意。Anyway其實我都好怕同佢傾，驚佢傾傾吓會叫我收聲。
9.另一個唔喺香港嘅係葉興國，長途只係講咗兩句，所以問得唔夠詳細請見諒。
10.黃啟明要幫佢澄清一下，因為佢果區同音樂噴泉算近，所以佢嘅態度唔太堅決係可以理解。
11.有幾個係可以好詳細講到俾我聽來龍去脈，蘇冠聰講佢提議過關於醫療嘅方案，蔡澤鴻講之前海上噴泉方案係點，何啟明講目標群眾，陳汶堅講埋隔離區，都係我比較深印象嘅。
12.至於負面嘅，有黎樹濠、馬軼超同陳俊傑。黎樹濠真心廢，叫佢答一句支唔支持都唔敢，問佢做過乜又話要睇開會紀錄，根本唔知自己做緊乜；馬軼超實在太懶，而且不以為恥，又答得甩甩咳咳。佢話架lift 佢有份倡議，但之後跟進嘅會議完全唔出現，其實根本係韜人哋光；陳俊傑淨係識話「我唔覺得」，我話遠佢又話「我唔覺得遠喎」，我話幫唔到民生佢又話「我唔覺得幫唔到民生喎」，毫無理據支持。
13.何啟明嘅態度以區議員嚟講係唔合格。不論打嚟嘅係學生又好，居民又好，甚至係唔關事都好，解答諮詢都係你嘅職責。居民唔係你嘅員工，唔係你嘅子民，我哋只係同你唔同意見唧，你就一句「我好唔滿意你嘅態度」，咁呢個又係乜嘢嘅態度？
14.都讚吓馬軼超，佢問點解唔叫旅發局搞，我係贊成嘅。
15.大部份嘅議員都講咗句幾令人失望嘅說話，就係街坊唔關心呢啲嘢。我都企過街站，無人理嘅感覺係幾慘嘅。但我個人感覺啦，個個都怨得，就係區議員唔怨得。因為你果份人工，就係要你做呢樣嘢嘅。你同市民溝通唔到，問唔到佢哋意見，係你嘅失職，唔好委過於人。而最終市民企出嚟反對，就更加唔好話「做乜唔一早講」。係你諮詢不足，唔好怪落我哋度。
16.而五千萬起音樂噴泉，街坊其實係關心嘅。
17.有啲俾手提嘅都搵唔到，我都唔知想點。洪錦鉉係要強烈譴責嘅，佢俾嘅電話號碼有三個，但個個都無人聽嘅；徐海山個電話通咗一次就唔再通，唔知係咪block咗我；譚肇卓同鄧咏駿都係打手機都搵唔到。
18.區議會秘書處都無人聽。點解我會打去秘書處呢？因為謝淑珍話佢唔喺個重點計劃小組入面，但我喺個開會list 係見到佢個名，長期缺席，我唔知邊個出錯，總知個感覺就係非常兒戲。
19.張順華死都唔講支唔支持，仲要人去佢辦事處傾，我唔知佢係想服務街坊定麻煩街坊。
20.我要強調，麥富寧係真實對白。
21.有啲聽錄音會有趣啲，我就唔講啦。有機會會放俾大家聽。
22.我都驚俾人搞，希望觀塘區議員如果唔覺意睇到嘅，會認認真真諗吓我呢個觀塘居民講嘅嘢，而唔係尋仇。
23.我希望做到以事論事，唔好同我講點解讚某某政黨，連民建聯都讚。對唔住，我講嘅唔係立場，而係態度。
24.如果大家都有耐性睇到呢度嘅，我希望大家都有耐性睇埋個總結。我加入呢個組織嘅最大目的，就係反音樂噴泉。因為我發覺觀塘已經紅到再無組織會再為市民發聲，我唔做，原來就已經無人會做。
我唔知大家對社區嘅感覺係點，對觀塘嘅感情係點，但我唔想呢個地方變得騎騎呢呢，更加唔想見到一邊喺度起噴泉，另一邊見到啲貧窮戶仲係每月三四千蚊過日子。我唔知自己可以做幾多，更加唔敢諗可以改變世界。但我相信，要改變世界，先要改變自己。唔好再等人救，唔好再等其他人做，我哋都可以為我哋嘅社區貢獻更多。加入我哋，大家一齊為自己嘅社區而努力，一齊為自己相信嘅價值而爭取，我哋值得一個更好嘅世界。
文:陳澤滔
