英國鄉下妹（4） 變咗Google Translate？
阿女開始放暑假，叫做响英國上咗幾個月pre-school。其實我完全唔擔心佢學唔學到英文，我只係會介意佢將來識唔識講廣東話。至於識唔識中文，我知道無得擔心亦無得迫，將來唔肯學都無計，反正我唔多信响厘個全世界係一定要識中文先有飯食厘個邏輯。
除咗每個星期番一日兩個鐘中文playgroup之外，同埋响屋企講下廣東話同story time。跟本上就無乜特別培養什麼中文興趣，最多都係食飯嗰時睇下香港新聞同電視就係咁多。不過，從來佢都對香港嘅電視都無興趣嘅。只要有得揀，任何小朋友一定揀兒童節目，而香港實在係無有趣嘅本地兒童電視節目。而响英國嘅兒童電視節目又真係要有幾益智，就有幾益智。要幾有純娛樂，就有幾純娛樂。
如非必要（即係佢唔睬我嘅時候😡），我其實真係無乜同個女有全英語嘅對話。而佢除咗自己玩，自言自語嘅時候，又真係全程同我係講廣東話溝通。所以，我確實唔多知我自己個女嘅英語水平進步咗幾多。
早兩日，佢同我講：「有個同學仔放完暑假就讀「大學」呀。咁我幾時讀「大學」呢？」我咪同佢講，要大個女，勤力讀書咪讀大學囉，無咁快喎。咁佢好堅持話有朋友仔暑假之後讀「大學」，我就只唯有問佢乜嘢大學啦。原來佢話「係Big School，咪大學囉！」我同老婆就緊係笑到儍啦😂
但係我細心諗下，原來個女响番學及生活全英語嘅世界同屋企差不多全中文嘅環境之下，原來佢個三歲幾腦仔裡面，發展咗一個翻譯系統出黎。係唔洗人教，亦無需要培養嘅。我覺得翻譯得啱唔啱唔係重點，而係佢個腦裡面係多咗個咁嘅能力。
所以，我明白到跟本唔需要好似啲香港中產咁，番英文嘅學校都唔夠，專登要請個菲律賓工人，又要响屋企同出街自己同個小朋友講啲唔三唔四嘅英文（嗰啲「Jayden呀，stop啦，no呀。」「Listen to mama，o唔ok呀？」）。
因為家長日學校嘅caretaker話我個女其實响學校好多嘢講，同時佢每幾日都會同公公、婆婆同嫲嫲facetime，佢有時會好有耐性咁介紹佢啲玩具角色嘅英文名比佢地知，話比佢地知係乜嘢黎。佢尋日同我講，嫲嫲係唔識英文嘅，婆婆同公公就識小小。咁我又發現到，原來响佢嘅世界入面，已經係知道同邊個同乜嘢情況佢係會自動轉語音功能嘅。
我完全唔係亦唔覺得自己個女特別叻，只係佢比我知道小朋友响語言發展方面，跟本上係會因應環境而自然會配合同調整。係完全唔需要催谷，或者要特別上什麼班去學。只要比到適合嘅環境佢地，佢地自然會習慣同學習。因為我响英國嘅中文playgroup裡面，都會見到一啲華裔父母，明明上緊中文playgroup，亦知道佢地識講廣東話。但係點都係都要講英文溝通，結果就係小朋友完全無興趣，亦同時完全唔明白。
#英國幼兒教學 #小朋友嘅雙語能力 #根本唔洗教 #自問都唔識教 #英國學中文 #唔用又點識
