🚫嚴禁劇透
🚫粗口自行過濾
🚫免批評外表人身攻擊
·
[1230隔夜超短劇評][TVB][降魔的2.0][EP02]
·
[Sorry] 我搞錯咗，第一集個時間線係直接接住第一輯結局。第一集彈嗰第一段全錯，Sorry。
·
[讚]
第二季第一集要唔要recall返啲觀眾記憶真係兩難，有觀眾留言話唔使講咁多，又有觀眾留言話係需要嘅因為套劇都隔咗兩年幾。我屬於前者。睇埋第二集，如果將兩集剪緊湊啲，例如減咗第一集鬼夫妻橋段，或者會好睇啲。
·
豪仔喺第一季大結局出現時，我以為佢係嚟報仇。依家豪仔口講就話唔想再見到晶晶白頭人送黑頭人所以阻止小馬降魔，之後聽到啤啤講話小馬為咗守住幻化做佢個樣嘅石敢當嘅諾言而去降魔，然後就決定輔助同教小馬招式。中間仲加埋細個豪仔錫住小馬嘅片段，成件事本來順理成章，但係豪仔同俊仔講話佢要承受害死人嘅惡果，又話命係無得賠。到底豪仔想點呢？佢係一心幫小馬降魔定係仲有其他目的？睇嚟呢個就係第二季嘅重點，暫時嚟講係吸引嘅。仲有豪仔點解會咁高靈力呢？慢慢等佢講。呢啲先係伏線嘛，同第一集差好多。
·
小馬天賦異稟，一下就學識封印又識石化，希望之後仲有啲無諗過嘅法術可以學到，多啲靈異神化嘢。
·
第28期藝訓班畢業嘅關曜儁（前名關梓陽）做俊仔唔錯，我投佢做今集嘅MVP，喺學校祭壇嗰段做得好過喺廁所嗰段。之前喺《跳躍生命線》做學員出班嗰場喊到豬頭咁，《陀槍師姐2020》都有佢份，仲係有戲份嘅角色，潛力人士留意返。
·
[彈]
唔係靠特技嘅我知，但如果特技做好啲就更好囉。
.
我以為min'na ga min'nah有另外一啲意思，依家只係降魔俠變身口號有啲削，希望之後有多啲意義。唔係嘅話大費周章用一集去鋪而小馬當時毫無頭緒有啲浪費。
·
[演員表] 馬國明 飾 馬季 / 胡鴻鈞 飾 莫偉豪 / 黃智雯 飾 莊芷若 / 謝雪心 飾 梁晶晶 / 劉佩玥 飾 貝貝娜 / 韋家雄 飾 陳永廉 / 譚嘉儀 飾 莉莉 / 關曜儁 飾 俊仔 / 李日昇 飾 Teddy / 楊凱博 飾 馬季 / 鄭耀軒 飾 莫偉豪
·
#1230隔夜超短劇評 #TVB #無綫 #降魔的2 #馬國明 #胡鴻鈞 #黃智雯 #謝雪心 #劉佩玥 #韋家雄 #譚嘉儀 #李日昇 #關曜儁 #關梓陽 #楊凱博 #鄭耀軒
