［冇得去日本受惠股！］好似係，除非唔係
1. 昨日真係香港人權最黑暗一天，因為日本禁香港人入境。不過我仲研究緊到底用BNO入唔入到（之前在越南就當你英國人，係入到的），或者囡囡用台灣護照入唔入到，定直頭香港出發都唔得—咁囡囡可以去台灣出發—但入台灣又好似要隔離。很煩，但唔緊要，以香港人咁愛國（當然係日本国），實有人去身先事卒。
2. 講返，受害股，就肯定又係啲航空股呀，酒店呀，東瀛遊呀，甚麼康泰之類嗰啲啦。但有冇受惠股？
3. 有，就係圖中呢隻！
4. 拿，呢啲就真係「冇得去日本」受惠股啦！
5. 咁都認唔到？認到隻企鵝下話！Don Don Don Donki！唔識唱都洗腦洗到你識！
6. 我去呢間係海之戀（型到呢，即係荃灣西）店。亦都冇揀最多人嘅位影。但十點鐘都仲咁Q多人。之前我在尖沙咀店更加多人，可惜唔記得影！（就係因為太多人買晒啲飯搞到我要去荃灣西）
7. 拿，是真的，香港人嘅嘢，去唔到日本，就去Donki當去咗啦！唔通去日本城咩！（上市公司的說）
8. 呀係，Donki，當然亦都係上市的。應該話佢母公司上市，Pan Pacific
9. ，東證7532。
10. 不過，受惠股，就講下笑架啫（而家先講！）。畢竟公司做好多其他生意，而香港亦不過係兩間舖啫。
11. 但又話說回頭，我記得公司講過，香港舖啲生意，比任何一間日本舖都好！咁當然租亦都貴過日本舖啦。
12. 順手講下關於公司嘅二三事：
13. Donki舊年年尾，見租跌，租咗銅鑼灣個舖（百德新街，以前HMV），好似話只係廿蚊尺租。就唔係傳說中嘅租金跌小店回歸啦，實情小店邊食到咁大個場？而正係你食到咁大個場業主先平畀你啫。當然你可以話而家租可能仲平，但邊有早知。同樣地，租將軍澳個舖都係廿蚊尺咋下。反而荃灣西要三十蚊尺，都係timing
14. 又又，應該聽到洗晒腦，識得讀ドン・キホーテ Donki Hote．有冇留意店名其實係「唐吉訶德」。唐吉訶德而家啲小朋友應該當係企鵝店，但其實係本書，好撚經典嘅書。有幾撚經典？4月23日係世界閱讀日。點解揀423？除咗係莎士比亞死忌，亦都係唐吉訶德作者塞萬提斯死忌，同莎翁齊名喎，勁未？唔止，德國有歌德學院推廣德文，西班牙就有塞萬提斯學院（但英國反而唔使用莎士比亞推，（陶傑腔）「呢啲咪自信」）（＊）．點解講咁遠？因為，西班牙文，唐吉訶德係 Don Quixote/Don Quijote（＊＊）。個X就係H音，所以Donki Hote係正確的譯法
15. 我屋企有隻Donki嘅企鵝（隻嘢其實叫Donpen），後來仲有隻粉紅色嘅Donko．但隻Donpen係在名古屋得返嚟的！好似囡囡買夠10000YEN就有得送！特別在佢個心口係唔同的！係個「ド」字！你香港或東南亞嗰啲係個D字！而我到好後期先知佢個心口係個「ド」字，一路以為係唔知咩圖案
（＊）而萄葡牙有賈梅士學院！賈梅士你都唔識？澳門咪有！有賈梅士廣場，賈梅士前地，同賈梅士馬路！意大利嘅就叫Dante Alighieri Society ，其實係但丁學院，應該有人以為係煮意大利粉Al Dente
（＊＊）關於點解一時係Don Quixote/Don Quijote，就真係唔係三言兩語解讀到。正如西班牙文嘅Ｘ可以唔止一個音，但呢度係讀H音無誤
