《我哋日日都玩緊「估領袖」》
大家都做過細路，兒時有個好無聊嘅集體遊戲，叫「估領袖」。一班人，無啦啦有個人係領袖，領袖做咩，大家就跟住做，有個局外人就估返邊條友做緊領袖。呢個遊戲亳無樂趣可言，個領袖係無領袖才能，佢撩鼻屎再擺進口食左粒鼻屎又好，瘋狂摑自己都好，大家都跟住做。跟住做動作個班傻仔都無樂趣，個遊戲永世都玩唔完，要不問因由跟住做。
※※※※※※※※※
香港人而家就係日日玩緊估領袖...
你問啲細路「你大個想做乜？你理想係乜？」，佢哋會毫不猶豫咁答「我呀媽想我做乜」。通常都係幼稚園英文教科書個啲職業，doctor，teacher，nurse，accountant，pilot 個啲。
培養個人興趣，就培養「今期流行」嘅興趣。呢排興「創新科技」，小朋友嘅興趣就係寫program。大學揀科，人人都揀醫科，law，會計，商，咁緊係照跟啦。
搵工，人人都考公務員，跟左咁耐無理由唔跟，又跟。 大部份人都考唔到公務員，退而求其次跟大圍入大公司做野。再痴心妄想地覺得「只要入到大公司，就會成為葉榮添。」
入到大公司，人人OT唔敢走，跟左成世，當然要繼續跟。大家好似去紅磡殯儀館守夜咁OT。唔理有無野做，坐得愈耐，對公司愈有「孝心」，只要唔好太有個性，跟大隊唔好離開「靈堂」，努力做「孝子」就有得升職架啦。
升左就要跟隨「習俗」，以「奶奶」嘅姿態教導下一代「孝子」。未到退休個日都唔好俾飽飯佢哋食，灌輸一種「跟大隊」態度俾班細嘅知「你而家受嘅，我以前都受過哂」。
終於做左「領袖」，做左呀姐，當然要每日「早朝」，當自己係皇帝， 拉布式開會。無論我嘅instruction 幾on9，大家都要跟，因為我以前都係咁跟。
※※※※※※※※※
人生係有希望嘅，但個希望肯定唔喺香港...
「邊個做緊領袖？大家都唔care，最重要係跟大隊，跟跟下，我有一日就會做到領袖」... er… 我覺得，一個人嘅快樂係建基於自己嘅自由意志，你嘅意願同走勢唔同，點解仲跟？做到領袖都唔見得有樂趣啦。
如果你好唔開心咁玩緊估領袖，喂，回頭是岸，唔好再跟啦，自己想做咩咪做咩囉。
※※※※※※※※※
PS. 每次聽到親戚讚美我跟到大隊，入大公司打工真叻女，我都覺得好on9，本身我跟大隊，我已經覺得自己on9，仲要俾你班on9讚美我。正如一個入到大台TBB做茄哩啡，有咩咁叻？真正嘅叻，係你可以離開大隊，再鬧返人點解跟大隊。你睇下黃秋生，自己離開大台，再俾大台邀請佢返大台屌大台。我...就係想咁。
