[雲呢拿貴過白銀，咁馬達加斯加🇲🇬發達未？］之前好多傳媒報過，而家一噸雲呢拿貴過一噸白銀（對，雲呢拿只用好少，但銀點先叫「用得多？」，所以講咩鑽石貴過水之類，其實冇乜意義。咩單位先？）。
非洲嘅馬達加斯加（對，荒失失奇兵），世界第四大島（澳大利亞唔當係一個島，正如美洲唔係一個島，歐亞非亦都唔係一個島），亦都係雲呢拿最大生產地，佔全世界八成。咁，就梗係發咗啦？你估都估到唔係。飲咖啡夠非洲豆牙買加豆啦，佢哋發咗未？係星巴克個老闆發咗啫，而家仲搵夠去選總統添。一向嚟講，有資源唔係發達保證，至少國家唔係。有所謂嘅「荷蘭病」。委內瑞拉就夠多石油啦，發咗未？（就快爆煲。或者話都爆咗好耐，有機會再講下）
點解馬達加斯加盛產雲呢拿？原來有段故事。有啲人食咗幾十年都唔知雲呢拿係乜。其實係植物，蘭花屬嘅嘢，由雲呢拿豆提煉。雲呢拿原產地係墨西哥，法國佬帶去非洲—但種唔到，因為冇蜜蜂。最後有條十二歲嘅托布發現可以用手傳粉。你要多謝佢，唔係佢你都冇得食雪糕。咁做乜第度唔種得馬達加斯加種？因為馬達加斯加窮到仆街，先會值得用人手咁做。第度嘅睬你有味。
咁因為天氣差，失收，本身需求，同埋更多嘅炒作投機洗黑錢等等，雲呢拿價就越炒越貴。暫時就只有血鑽，冇血雲呢拿。但因為奇貨可居，偷呀搶呀就見怪不怪了。你種雲呢拿？問過我支槍未？而家農民直頭組武裝自衞隊保衞雲呢拿了
而家啲友，就連種嘢食自給自足都放棄，全部改種雲呢拿。反正有錢，怕乜冇嘢食？啲女仔都唔返學，嫁畀啲雲尼拿大莊。人人買車買電視—而明顯地平時佢哋連油錢都畀唔起。到爆煲就知味道。嘿。
但，一如咖啡豆一樣，發達嘅農戶，就佔好少數啫。最多都係買架車咁。真正發大達嘅，當然係中間人，出口商，同埋勾結到鬼佬大廠嘅人。所以識英文好重要（馬達加斯加官方語言係法文，係喎，好多非洲托布都講法文的—你仲覺唔覺得法文好浪漫？）
當然了，雲呢拿仲係洗黑錢嘅好工具。點解？因為啲黑錢係當地貨幣，拎去買雲呢拿就掂—因為雲呢拿係少數可以出口，換返轉美金嘅東西。得咗。
而其實大家都等睇幾時爆煲，五年前一公斤雲呢拿先廿蚊美金，今年炒到六舊水，而家已回到五百蚊。到時嗰啲賣埋條底褲去種雲呢拿嘅就知味道— 而其實以人均GDP計，馬達加斯加係全球最窮十個國家之一（對，窮過北韓，其實好多地方窮過北韓）
