【波多嘢‧記憶】當你懷念十幾年前嘅利物浦人腳…身邊緊係有條友笑你呢樣嗰樣
#波多嘢專欄系列
東網評述 發夢做評述員·蘇雞 - 蘇肇朗 Sochick 筆：
利記當年奇蹟奪冠可能有啲球迷都真係未出世，當然唔明白當年係何等震撼，場波係點應該睇返片都知，不作詳述。不過想同大家分享吓05歐聯決賽之後發生嘅事，有睇開專欄嘅朋友都可能有印象，小弟係九十後(九十頭)，當時讀緊小學，係亞視免費直播歐聯嘅時代。
決賽完咗第二朝，我仲係要返學，點知有趣嘅事就發生。小學雞返學要早會排隊就一定架喇，點知早會嗰陣有個阿Sir出嚟宣佈利物浦奇蹟地拎歐聯冠軍，我排緊隊都心諗點解會咁搞笑喺呢道宣佈？仲未夠呀喂，佢仲話會喺當日小息喺禮堂播放重溫利物浦如何神奇奪冠，大家都知場波前前後後都搞咗成兩個幾三個鐘，一個小息點播得哂？結果呢位阿Sir係馬拉松式播放，一到小息就去播，結果足足播咗成個禮拜先播得晒，而我就喺學校成個禮拜嘅小息坐喺禮堂足本重溫成場波。
依家諗返自己日日走去睇都有啲痴線，但其實諗真啲嗰個阿Sir仲痴線，竟然咁有毅力，我依家都仲對嗰個阿Sir好深印象，好記得佢播咗成個禮拜歐聯決賽。佢仲講過咁做嘅原因係想令同學領略到永不放棄嘅精神，結果我真正感受到「永不放棄」嘅精神唔係從利物浦身上，而係從呢位阿Sir身上。希望「李Sir」你見到呢篇文章，你嘅行為其實令我幾有體會。唔知你仲記唔記得我呢位學生呢？
又，呢個禮拜國際賽周，利迷唔洗撳救命鐘驚利記失分。反而仲有班當年歐聯奪冠嘅Legend會出返嚟娛樂吓大家添喎，謝老四、希比亞、路爾斯加西亞等等都會亮相晏菲路着利記波衫落場踢波。
東網 睇體 ontv Sports免費直播
23/3 星期六晚 23:00 利物浦傳奇隊 VS AC米蘭球星隊
Liverpool FC Supporters Hong Kong
利物浦 Liverpool Kop End
My Heart is Red - 利物浦綜合分析
利物浦-永遠的紅戰士
球迷世界 - 利物浦
香港利物浦官方球迷會 lfc.org.hk
