【港殤】
今日係南丫海難5周年，呢宗39人罹難嘅慘劇，相信所有香港人都記得。
5年過去，政府有冇兌現當年話要提升海上安全嘅承諾？海事意外數字有冇下跌？意外調查制度又有無改善呢？
直到今日，海事意外調查仲係交畀海事處轄下嘅意外調查部跟進，不過一旦意外牽涉海事處失職，呢種做法就如同「自己人查自己人」，啲問題隨時收收埋埋無人知！
點樣可以更公正調查？外國唔少地區好似英美、加拿大同日本都有獨立調查機構，而民航處今年亦響應國際民航組織要求，將民航意外調查部獨立出來，直接向運房局負責，所以我提議海事意外調查部脫離海事處架構係完全有先例嘅做法。
林鄭上任之後，公民黨就特首百日期望同施政報告，見過佢兩次。佢講就話歡迎我嘅提案，希望佢唔係得把口，嚟緊十月公布施政報告就自有分曉！
