［香港史上最收得嘅非西片係邊套？］至於非港片十大，其實冇乜好講，同全球嘅（http://bit.ly/2F2cRi9）差無幾。呢十套香港最收得嘅非港片，我睇咗七套啫。留意之前話十套香港最收得嘅港產片我睇咗八套，夠晒愛港片，我估好少人會係 後者多過前者（明我講乜呀可？）。
呢十套戲，實在冇乜好講，pop corn reboot superhero 外傳前傳續集一大堆。真係比較值得講嘅反而係兩套與神同行，係叫做最有原創性（當然都係漫畫改編，對，韓國都有漫畫）。其實最初睇預告時我覺得好趕客，但入場睇又覺得還不錯的。雖則勉強入十大，但夾埋都成億票房。
懶搵，但之前都有韓片入十大，屍殺列車早兩年收七千萬，好堅。七千萬喎大佬！有幾勁？即係，其他有七千萬票房嘅，全部係西片。冇港片冇華語片。亦即係話非西片中，屍殺列車就係史上最高票房。勁未？就唔係你一句韓妹整容韓仔女人型韓國最叻抄嘢可以解釋嘅。
但再數……好似數到我的野蠻女友了。（睇不可靠嘅資料話呢兩套就係香港最賣座嘅韓片）。感覺上韓片韓劇好似開始有啲走入樽頸位，我見佢地本土票房都破唔到之前紀錄。
日本片呢？有啲惡搞。香港人哈日，但日本電影其實唔多人睇，或者你可以話日本人唔拍大片—而日語大片又未必理外國人口味。日本票房同香港票房口味可以好唔同，例如 海賊大亨 之類在日本好收得，香港差不多仆直。而日本狂收嘅 跳躍大搜查線２，香港票房亦唔係嗰回事。
所以，靠乜呢？就係動畫。如果冇記錯，近N年入到十大嘅，都係動畫（你不如數下邊套非動畫在香港收得？好似神探伽俐略都OK？）。收得嘅係 STAND BY ME 哆啦A夢，都係五千萬不夠，一集嘅與神同行差不多，有排未追到屍殺列車。第二係新海誠嘅 你的名字。，三千萬左右。第三數到N年前 千與千尋。但 千與千尋 到當年香港十大（第三添，當年三千萬唔夠已經入到），你的名字。 反而係冇入香港十大的。
其他種種，時間關係唔特別講。泰國片 人妖打排球 入過香港十大（當年成個香港都冇乜人睇戲），千幾萬咋。出貓特攻隊 打破咗呢個紀錄，但事隔十八年了，通脹都唔止。而出貓特攻隊 當然入唔到香港十大。
台灣片方面，那些年 同 我的少女時代都入到香港當年十大，前者收六千萬，後者四千幾。同日本片一樣，當地收得嘅香港未必得，狂收嘅海角七號，香港票房普普通通啫。
幾乎收漏咗印度。印度電影好長時間在香港係不入流嘅，2009年嘅《作死不離3兄弟》（3 Idiots）就打開缺口，的確係好片一套。之後嘅印度片普遍都算幾獲好評，講反映社會環境呀男女平等呀教育制度呀咁，反大陸嘅更加樂於嚟抽水話人地掂。但現實係，其實印度片係叫好不叫座嘅。《作死不離3兄弟》評價真係極佳，上咗好耐，我以為好多人睇。原來只係收兩千萬左右。到《打死不離3父女》，原來已經係香港史上最賣座印度片，都係兩千萬左右咋。多過泰國少少，但同日韓台冇得比。
以上種種資料較為零碎，絶對有機會寫錯，勿屌。屌都細力啲。
又，到底有冇人話到我知，香港最收得嘅非動畫日本電影係邊套？神探伽俐略（當時好似聖誕上）？
