第五回－－家務
俾系統突然升級任務難度嘅兩人，充滿後悔感覺，特別係劉俊文聽到係英雄聯盟時，佢心諗今次死硬，對於女人講，英雄聯盟呢隻遊戲係有好高要求，包括團隊合作、操作技巧、遊戲理解等等，劉俊文玩左五年都仲係中遊份子，佢唔相信李倩盈可以一星期掌握到遊戲。
劉俊文打開遊戲，睇返自己遊玩時數，五年總共有1090小時，而呢個遊戲，好可能係佢人生之中完全消失，同時佢有少少鬆左口氣，如果以抹殺去睇，總好過迫住佢放棄呢個遊戲，忘記總比得唔到更好。
而李倩盈嘅任務，其實劉俊文唔太喜歡韓劇，但要睇完一套韓劇，只係乖乖地睇就可以，連準備都唔需要，或者一念之間就係咁意思。
兩個人將任務暫時放低，生活都仲要過，系統發放嘅日常家務任務，佢哋準備測試一下會拎到幾多積分。
剛剛聽到任務時，劉俊文有諗過用黎刷積分，例如一日掉三次垃圾咁，以前三日洗一次衫，依家每日洗一次，甚至早晚洗一次之類，但系統講明佢係有智慧，唔容許走捷徑或者當佢係傻，所以呢個小心思比佢深深埋入心中，以免系統讀心知道。
家務一向都係由李倩盈主內，劉俊文主外，即係家中嘅事通常由女方處理，例如洗碗煮飯，而劉俊文就出去買野，掉垃圾之類。
經過一日嘅測試，佢哋得出以下分數統計。
日常項目
一，洗碗－100分
二，洗衫－30分
三，晾衫－50分
四，摺衫－50分
五，拖地－80分
六，吸塵－30分
七，扔垃圾－10分
八，洗廁所－10分
九，買日用品－10分
十，買餸－10分
前六項都係由李倩盈處理，後四項係劉俊文處理，得出呢個分數時，劉俊文即時大叫唔公平，有乜可能佢做嘅幾件事只值10分，而李倩盈就有咁高分，如果按每日做一次去計算，李倩盈一日進帳340分，而劉俊文只得可憐嘅40分。
要得到3000分去升級鐵達尼號頭等艙，李倩盈要用九日，而劉俊文就要用七十五日。
同時嘅新發現係，原來積分任務可以增加，當晚煮飯後嘅李倩盈得到系統通知。
【新增積分任務，煮飯，分數為10分，此項目將會納入積分任務中，請宿主努力完善任務系統。】
聽到呢個分數之後，劉俊文忍唔住講左句：「嘩，煮飯用咁耐都係得10分，我個心總算平衡返少少。」
隨後兩人不斷測試唔同家務會唔會可以新增，幾個鐘頭內，佢哋新增左抹窗、叫外賣、洗波鞋、煲水、執夏天衫、洗冷氣、倒吸塵機、清去水糟、換床單等任務，兩個人好似探險一樣去搵出有咩隱藏項目，但搵到新任務都好，分數唔知點解都係維持係5－10分呢個低分數之中，比起吸塵拖地呢種有幾十分嘅任務，新增任務可以話係性價比極低。
李倩盈忍唔住問：「系統你個分數係點計？我頭先煮個飯用成個鐘，洗碗用10分鐘，但煮飯得10分，洗碗有100分？咁我以後唔煮飯只係洗碗算喇。」
劉俊文接口：「下次我哋叫外賣可以叫平少少，分幾間唔同餐廳叫，頭先個餐300蚊得10分，我叫幾次譚仔算喇……」
【積分計算方式需要由宿主自行領悟，或者將積分系統升級到中級先可以查閱，請宿主努力升級。】
系統凡事都以等級同收費處理嘅方式佢哋都習以為常，但從系統行為中佢哋都可以感受到，系統佢設定係有好強目的性，唔係純粹要留難自己。
為左令兩人積分差距唔會差太遠，兩夫妻將家務責任重新分配過，令兩人每日得到嘅分數未至於相差太遠。
但係第二日佢哋實行呢個分配時，一個打擊令佢哋對系統不滿增加到極點，因為第二日所有積分家務都只係維持係5－10分呢個水平，洗碗尋日可以得到100分，但今日只係得10分，吸塵仲只係得5分，當日兩人總共只係得到120分，按呢個計算方式佢哋嘅頭等艙之旅要用兩三個月時間先可以換到，更未計有日系統將分數進一步調低。
前所未有嘅低落圍繞住兩人，興趣任務未解決之餘，積分任務又愈來愈難，好似事事都唔如意咁。
「劉俊文，既然依家無乜特別野做，不如你陪我睇劇，解決左最簡單嘅事先，我哋一步一步做啦。」李倩盈感受到對方嘅沉重，幾年夫妻，佢好清楚劉俊文面對掌握唔到嘅事就會好低落。
劉俊文亦無反對，有個簡單開始都係好事。
二十一集，每集六十分鐘，要睇完都要整整一日，計畫好分三日睇完之後終於開始第一集，睇之前李倩盈特意提醒：「呢套劇我已經睇過喇，今次你陪我睇，真係唔好好似之前咁一路睇一路講，睇故就唔好駁故，乖乖地睇完我就陪你打機，齊心合力過左呢關佢好唔好？」
劉俊文都係識得分輕重嘅人，二十一個鐘，唔訓唔出聲，專心睇，再悶都唔會夠返工咁悶，返工都捱到，煲劇又有咩問題呢？
係和平同平靜之中，劇終於睇完，伸左一個懶腰之後，劉俊文好似解脫咁彈起身，然後走去廚房食支煙放風。
一邊食，佢一邊問系統：「其實你指定英雄聯盟，即係想我以後唔再玩姐，我想知道係唔係每件事都有方法解決，定出呢條問題時，我做乜都唔會做到？」
【系統絕唔會發放無可能完成嘅任務，雖然地獄級難度成功機率唔到一成，但上次兩位宿主都完成過，今次只要兩人齊心合力肯定可以完成。】
「英雄聯盟我最初都要用三個月先上手，依家仲有三日，我老婆嘅資質……我都好清楚，唉，算啦，唔玩咪唔玩，其實都咁大個人，打機都係一種習慣，一種休息，其實跑步又得游水又得，只係我以前下定唔到決心改變自己姐，我有諗過幾時會因為咩事而唔再打機，估唔到會用呢種咁神奇嘅方式，都總算係難得，我認命喇，以後做個唔打機嘅成熟男人都好嘅。」劉俊文無諗住要李倩盈玩，好多野都可以迫，迫你睇劇只要睇就得，但打機你迫都要時間去練習，佢已經幻想出自己迫住老婆玩，然後會炆會嘈，最後不歡而散，與其係咁，不如自己一個靜靜地玩幾日，為自己遊戲嘅人生作一個完美告別。
【宿主願意犧牲自己減少兩人爭拗，特別獎勵積分3000分，希望宿主保持為對方著想嘅心。】
得到三千分嘅劉俊文苦笑，原來自己嘅興趣係值三千分，目前都算係最高記錄，都算對得住咁多年嘅經營。
最少，佢可以保得住李倩盈嘅興趣，佢好清楚李倩盈興趣唔多，最大興趣就係煲劇，如果連劇都唔煲咁仲有咩意義。
【系統有個溫馨提示比宿主，關於李倩盈煲劇嘅任務尚未完成，如果三日之後仲未完成的話，會抹殺呢個興趣。】
－－－－－－－－－－－－－－－－－－－－－－－－－－
下回預告
兩個人一齊，最怕就係表面，陪，唔係個人係自己身邊就係陪，陪你睇完一套劇，但用返工既心態去陪，陪完大家感情又會有昇華嗎？睇完自己都會諗，終於可以做返自己野，唔需要再浪費時間。
劉俊文係唔係完全放棄自己既興趣？到底點先可以完成任務？
積分，又係用咩標準去衡量？
請看下回分解
－－－－－－－－－－－－－－－－－－－－－－－－－－－－－
作者的話：
有讀者留言話新故事同老婆想表達既係差唔多，我好高興讀者會有呢個感覺，最少係佢好用心睇《老婆》同埋呢個新故事。
對於夫妻之間既事，來來去去都係幾樣，而係《老婆》故入面，我已經將我認為最重要既事都寫左。
所以新故事係一個挑戰，到底可唔可以表達出新既意思？
留意開我既都應該會知，我好少會炒冷飯，寫過一次既事極少會再寫，更何況係前後腳既故事。
今次同上次唔同既位係，今次有互動，唔似老婆故，只係一個人表達，一個人思考，我會集中係兩個人共同努力下做出既成果。
而系統同積分會表達既亦係我既新體會，到底感情可否量化，量化會得出咩思考？
另外就係抽獎環節，抽獎我賣個關子先，亦希望出黎效果會比大家有耳目一新既感覺。
希望大家會比多少少意見，我都會睇都會回！
－－－－－－－－－－－－－－－－－－－－－－－－－－－－
我既文字係免費，但免費既通常都係最貴，一個無實際經濟支持既作者並唔會長久，所以希望喜歡我既文字同故事既朋友可以支持我，購買我既書本：
訂購我過往的作品，連結如下
https://bit.ly/3fL9QUH
由於最近比較忙，需要周末先可以處理訂書，希望大家見諒
消失的女人韓劇 在 #消失的女人 - Explore | Facebook 的推薦與評價
這部片讓韓劇女王孔曉振接連獲得大鐘獎和青龍獎的最佳女主角提名，孔曉振在片中的確展現出和韓劇不同層次的演技，從眼神、微笑、輕哼歌曲到令人不寒而慄的表情都絲絲入扣， ... ... <看更多>