近期市況趨不穩，北水時進時出，令到大家都忘記了上周一係北水新貴進入港股通的日子，如果每天去看十大成交，會相當失望，因為以前新貴頭兩日，點都會有一兩隻打入十大，今次就完全無了，是否代表新貴北水唔吼呢，梗係唔係啦，今次就結合webb哥的CCASS數據，去搵返頭三日的流量。
由於港股是T+2交收，所以截至周末，只會有首三天的數據，其實戰友都可以自己落手落腳做類似的分析，先去深交所找港股通調整名單，之後copy過來，所以你都見到青冰個表的公司名字都係簡體，照抄懶得轉啊，然後你去webb-site網站的CCASS數據，找上海中證登的ID (A00003)及深圳中證登的ID (A00004)，就可以找到北水持股數字，咁webb哥的CCASS系統仲會提供"changes"這個功能，你可以找一段時間內，北水持倉的變化，青冰個表就係找3月16日至19日的變化，留意返係T+2，即係代表3月15-17日的北水持倉變化。有晒呢啲數字，擺入excel，用個簡單的VLOOKUP，已經搞掂，記住這今次所講的淨買入銀碼，都係用收市價作計算，與真實情況會有啲偏差的。
北水新貴在首三天，淨買入過億元的只有5隻，分別係泡泡瑪特(9992)、新城悅服務(1755)、世茂服務(0873)、華潤萬象(1209)及恒大物業(6666)，當中只有新城悅服務係比較令青冰意外，再睇其他股份，北水都係偏向買物管為主，而生化B仔呢，得榮昌生物(9995)及藥明巨諾(2126)係有幾千萬元。
留意返這三天整體北水的淨買入只有35億元，但這些新貴加埋有21億元，所以唔算少喇。
P.S: 抄webb-site數據時出錯，請睇返更正的圖表
結論冇太大出入，只係更正後，金科服務(9666)及樂享互動(6988)原來都唔少北水支持喎
