《俾想「出走」嘅你》
IG: @ally_blahblah
https://instagram.com/ally_blahblah?igshid=1jtemurbno3q7
「出走」前諗一諗
2020年嚟到尾聲，今日唔講荷蘭，講一講想出走嘅你有乜嘢要考慮清楚。
暑假返香港，同唔少朋友敘舊嘅時候講起都係：幾時走、點樣走、走去邊。
同小學雞作文一樣，其實想要「出走」都要考慮五個W同埋一個H：
What 「咩」
Who 邊個
When 幾時
Where 邊度
Why 點解
How 如何
剛剛提到嘅係最多人留意嘅When，Where，同How 。
What 「咩」（「出走」囉！）同 Who 邊個（自己定係一家人？）對好多人嚟講都好明顯。但最多人忽略嘅係Why 點解。
到底，點解你要出走呢？
唔同人嘅原因可以有好大分別。
之前提過，我當年離開香港，其實係覺得世界好大，想趁後生去闖一闖。
一開始亦唔係立即去荷蘭，反而先去上海。因為我知自己點解出走；而我出走，唔僅僅係為咗去某個地方。
幾年前嘅世界好唔同，當時喺上海嘅經驗直接幫到我後來喺荷蘭搵工。不過，今時唔同往日。幾年前行得通，唔代表今日都可以。
另一方面，好多人盲目想去某個地方，因為「鍾意」，冇詳細考慮居住/就業/生活環境。尤其是係當你對某一個地方認知好少，純粹係「為去而去」，分分鐘唔走好過走。老實，到咗外地唔代表生活無憂。出走左幾年之後頂唔順嘅人大有人在。
要知道，好少人可以have it all，就算可以，都唔一定係 at the same time。
睇多一次剛剛呢句。
呢個時候，其實要排你自己嘅「優先次序」（priority）。
我當時喺英國同荷蘭之間選擇，因為我嘅priority，係能夠畢業後搵到好工。反覆思量，衡量兩國情況，我選擇荷蘭。
有人嘅priority 可能係學業，一定要去頂級名校，咁你選擇可能唔太多。
有人嘅priority 可能係事業，而唔同行業喺唔同國家發展不一。例如做 data science/ software development，或者fintech，其實來來去去都離不開三藩市、倫敦、阿姆斯特丹、新加坡等等，冇理由走去走去葡萄牙波圖（純碎舉例）。
有人嘅priority 可能係家庭，希望子女教育好，咁其實近近地新加坡都幾好吖，唔使走咁遠。
所以記住，認真思考你個「點解」，然後排優先次序，再做資料搜集。你會發現，經過呢個過程得出來嘅結論，可能會同原本想像嘅大相逕庭。
無論如何，我都覺得，有能力的話，越早計劃，越早行動，越好。因為越年輕，精力越旺盛，適應力越強；負擔越少，要顧慮嘅事情越少。
讀碩士嘅時候，二十頭，可以一邊全職返學，一邊返實習，一邊博命搵工。每日訓幾個鐘，輕鬆。讀完第一個碩士，工作一輪，依家二十中，仲可以一邊全職返工，一邊兼讀。但已經唔及幾年前體力咁好，一定要訓夠七、八個鐘。
再過幾年，好難講，分分鐘連兼讀嘅精神都唔知有冇。再過多幾年，屋企人年紀大，好唔好接佢地過黎？應該點樣照顧佢地？
正正因為我一早出去闖，呢幾年無功一身輕，可以毫無顧慮咁闖（托賴，做得還可以），可以用同樣時間，做比別人多嘅嘢。咁有讀者可能已經「唔係二十幾」，可以點？
又回到一開頭，「點解」出國？
大概只有你自己先知道答案。當「原因」非常重要，自己衡量過輕重，非走不可嘅時候。咁就要坐言起行，唔好得個諗字，快啲計畫喇。你越等，過幾年又唔知咩事㗎喇。
當你認清楚自己想出國嘅真正原因，之後嘅計劃自然容易得多。
#移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活 #荷蘭公司 #歐洲公司 #荷蘭生活知多啲 #香港人在荷蘭 #香港人在歐洲 #香港人加油 #搵工 #獎學金 #留學生 #海外留學
