之前已經黎過呢間餐廳，記得佢地有午市套餐，加上新張期內有折，所以再訪。餐廳位於金百利廣場，上面都幾多食肆，所以平日食飯時間通常都要等好耐電梯，至於今日因為係週日，都少左一班辦公室嘅客人，較為輕鬆。裡面裝潢簡單，位置都幾多，下午茶時間去到人流唔多，遊客都佔半數。配合店面，牆上有好多「魚」嘅圖案，杯墊、名片都係魚形，幾可愛✍️
餐廳主打川菜，有唔少人都推介過烤魚，但由於我地食午飯就唔想太激烈，留待下次再試。午市供應飯麵套餐，定價$35-$76，附送冷熱飲品，選擇挺多，揀粉麵仲有優惠價加配小食，另有麻辣香鍋、小炒、涼菜等，定價合理。
👉水煮牛肉套餐 $76
無論賣相、色水都好對勁，我啲口水已經湧緊出黎😝除左牛肉，裡面仲有芽菜、黃瓜、香菜、粉皮，而且都係啲容易吸收味道嘅材料。牛肉片份量不少，食落嫩腍唔老唔韌，芽菜、黃瓜都好入味，仲有好耐冇食嘅粉皮，粗身嗰隻，幾驚喜，因為我好鐘意呢類煙韌野👍睇個樣就以為好辣，其實比想像中容易接受，一般食到辣嘅都接受到。飯嘅份量好多，而且用辣野送飯一流。
👉萵筍炒四川臘肉 $68
香港唔係好多地方有得食四川臘肉，以往食親都係國內，四川臘肉即係經煙燻過再風乾嘅豬肉，因為各地嘅燻肉、涼乾嘅工序有所不同，例如會用唔同嘅木枝或者葉製成，所以展現嘅味道都不一樣，但總括一句都係煙燻味重而食落帶鹹嘅豬肉。臘肉肥瘦佔半，挑選得宜，煙燻味恰當，口感唔會太乾硬，薄薄一片，送飯一流，加上萵筍係絕配，有獨特香味，食落爽口，唔會蓋過彼此嘅味道。
👉乾煸四季豆 $68
國內做法，香港好多餐廳都食唔到呢隻味道，四季豆炒得乾身，唔會太麻帶少辣，配少量肉碎、鹹菜，十分滿意👌
👉陳麻抄手 $58
一般抄手嘅皮薄身而餡料比較少，配上紅油帶麻辣味道。呢度嘅抄手唔係太啱我地口味，首先皮都夠滑，但肉餡較多，口感有點實，冇乜彈性，略嫌紅油唔夠香辣，有少少失望👎
渝痴漁醉
地址：銅鑼灣記利佐治街1號金百利廣場8樓R1號舖
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
