我本來係荃灣人，屯元天對我嚟講好陌生，幾個月前搬咗入嚟之後，行嚟行去都係屯門，聽講元朗有老婆餅好出名，所以決定去睇下，點知出錯咗朗屏站，唉，新搬嚟真係新搬嚟，唔熟路。
消息話有人遊行集會，但我步出車廂之後發覺根本冇，一個人落單就有，兩個人拍拖都有，只係weekend嘅緣故，真係好多人出去行街，多到喺朗屏出閘都用咗10幾分鐘。喺西鐵站落樓梯嘅時候，後面個媽媽帶住一個十幾歲嘅小妹妹，我聽到媽媽咁講：「嗱！我哋應承咗大家㗎喇，唔可以畀daddy知今日出嚟呀，得唔得？記住喇，唔好畀daddy知呀！」我鼻頭一酸，香港人點解出去行街都要瞞住屋企人？連行街嘅權利都冇，真心可憐。
沿西鐵站口行出去，有個阿婆街坊同成班路過嘅人講：「加油！婆婆支持你哋，小心！」我又有種想喊嘅衝動，其實呢個世界冇廢老，更加冇廢青，廢唔廢唔係用年齡去決定，係用良知同埋分析能力去決定。
幾經辛苦終於行出西鐵站，人雖然多不過好平靜，突然聽到人講有防暴警察，百思不得其解，只係作為一個純粹路過嘅屯元天街坊，我只有跟住人群走，喺元朗廣場嘅橋上，又有速龍小隊上橋趕人，由於廣場內有幾間食肆照常營業，一時間湧入廣場嘅人同埋食完嘢出嚟嘅人撞個正著，大家慌忙躲避，其實一個唔覺意就會出現人踩人，確實好危險，有一對街坊裝夫婦明顯好嬲，佢哋話：「西鐵嗰次你哋遲到，而家咁早到，換得切衫嗱？」
廣場內警鐘響咗，我同一眾街坊要出返去，聞到好大陣催淚彈味道，辛苦。路邊另一對年約50幾歲嘅夫婦起爭執，老婆向老公大嗌：「走啦！我叫你走呀！」老公答：「我唔走，要走你走先，我點都唔走！」元朗果然係一個好特別嘅地方，大家似乎要排除萬難行落去，但係見到佢兩公婆因為咁而嘈交，我雙眼有啲通紅，可能只係催淚彈嘅影響。
隨住第一枚催淚彈出現，我手機開始響個不停，好多讀者、朋友、家人，仲有work緊嘅marketing透過whatsapp同inbox傳嚟慰問，收到晒！
同時間有媒體推post，催淚彈呢頭放完，我見到張致恆啲新聞彈上嚟，DLLM關我咩事？邊個想知道一個人渣男歌手點樣食女？我隨即uninstall個app。
街上所有人都鬧緊警察，你係咪以為後生仔先有呢啲火氣？其實唔止，我目擊另一類鬧得最恨嘅人，係師奶！呢股怒火突然間被淋熄，原來有兩個消防員路過，所以人人都鼓掌、歡呼、大叫加油，作為headhunt感受更深，點解世界上會有兩個職業嘅形象同民望差咁遠？一個天一個地。
返到屋企，電話冇電，順手開咗電視，一開就係tvb，一直掃落去，而家先知佢有5個台，而呢5個台係冇一個直播緊元朗現場實況，呀！新聞台有，不過播咗一陣－－－佢去廣告。
外面烽煙四起，tvb歌舞昇平，其餘4個台都係繼續吃喝玩樂，真心想同tvb新聞部員工講幾句：「你哋轉去第二間啦，我相信讀新聞系嘅人都有理想，唔好畀管理層拖垮你嘅事業，催毀你嘅熱情。」
香港市民而家出街都係一場戰爭，我喺屋企開電腦又係另一場戰爭，呢排已經keep住有五毛留言搞事，仲有一啲殘體字名稱嘅account inbox我，話會集體檢舉個page，慶幸部份讀者知道仲有另外一個page搵到我，如果辦公室日報冇咗，我哋去另一邊見面啦！
以上係一個屯元天街坊嘅自由行經歷，或者我只係發夢，但我知道好多香港人都發緊惡夢。
渣男歌手 在 [新聞] 比王力宏更渣的男星是？狗仔抖線索- 看板Gossiping 的推薦與評價