🔍hEat (灣仔)
🎈灣仔皇后大道東202號QRE Plaza 23樓
-----
夜幕低垂，天花板嘅黃燈打落深木色嘅桌子，加上窗外灣仔商廈嘅開揚夜景，整個環境開始變得浪漫起來，可惜坐在對面的她，是個女的。🥲
三心兩意揀嚟揀去都揀唔到食咩，最後我哋奢侈地叫咗個$1388嘅二人餐，作為佢撇甩渣男嘅重生dinner😁。
🥣第一碟上嘅係餐湯，啊sorry，not餐湯，係Lobster soup 龍蝦湯先啱，用餐湯呢個字黎形容佢似乎頹咗少少。有別於普通嘅忌廉龍蝦湯，呢一個龍蝦湯嘅湯頭係清澈嘅，無cream但係卻滑得好似落咗cream咁，每一啖都有一絲絲嘅龍蝦肉，鮮而不膩，令人飲完之後，開始對嚟緊嘅菜式有極高期望。😋
🐟第二碟上嘅係Tuna steak，上層有芒果、番茄加苜宿芽嘅清新配搭，下層則是半生熟吞拿魚。入口鮮而開胃，半熟嘅吞拿魚，毫無腥味，一絲絲嘅口感，質感係豬扒同魚扒中間，非常特別。
🦪第三碟上嘅芝士菠菜焗生蠔，如果以四個字概括，我會用「恰到好處」黎形容佢。啱啱好嘅鹹度，啱啱好嘅生蠔熟度，啱啱好嘅芝士份量，再加埋嫩口無渣嘅菠菜，入口似生還熟，無論鍾意食生蠔，定係平時唔食生蠔嘅人都絕對會愛上。
🍴緊接落嚟嘅第四道菜式就係溫泉蛋鵝肝，鵝肝食得多，溫泉蛋亦都成日食，但係兩者交融嘅配搭就係第一次嘗試，用筷子戳破溫泉蛋之後，輕輕將其與鵝肝拌為一體，加上少少醬油，呢一個西日合璧嘅菜式，竟是出奇地合拍，溫泉蛋中和左鵝肝嘅油膩感，並將鵝肝嘅幼滑口感發揮到極致。
🍽溫泉蛋鵝肝食到一半之際，第五道大蜆就送到我哋嘅枱上，一邊影相一邊聞到泰式香料嘅香氣飄入鼻腔。大蜆浸泡係有少少似青咖喱，又有少少似白汁嘅醬汁之中，將本來就鮮甜嘅味道再推上更高嘅層次，非常滋味，另外佢個醬汁真係好味到可以就咁飲，係好飲到完全可以擺係menu作為其中一款湯嘅質素。
🦞每一碟餸菜都驚喜連連，而接下來嘅whole lobster 更係將成晚嘅美味push上巔峰，佈滿芝士嘅龍蝦肉質極為爽彈，蝦膏滿滿，蝦膏除咗就咁食之外，仲可以加落下面嘅沙律菜作為醬汁，每啖入口都係咁無可挑剔。
🐮原本嘅menu仲有一款牛，但係由於朋友唔食牛嘅關係，所以餐廳好貼心咁幫我哋轉咗做白汁蘑菇意粉，簡簡單單嘅一碟意粉喺廚師嘅烹調工架下都變得豪不簡單，入口彈牙煙韌，黑椒同菇菌嘅香氣互相交融，食完飽肚又滿足。
🍰最後雖然食到好飽，但係我哋仍然對最後送上嘅甜品感到滿心歡喜，熱辣辣新鮮焗起嘅朱古力心太軟加上凍冰冰啱啱整好嘅檸檬柚子雪糕tart，一熱一凍，前者苦甜，後者酸甜，兩款嘅甜膩度都balance得是那麼的恰到好處，若要喺成餐飯裏面雞蛋裡挑骨頭，唯一就係個心太軟中間嘅朱古力可以再流心多少少，除此之外，呢餐確實係可以評作為幾乎完美的一餐。
-----
👶🏻B仔整體評價：8.4/10個👍🏻
👶🏻B仔抵食程度：7/10個👍🏻
👶🏻B仔環境評分：8/10個👍🏻
👶🏻B仔味道評分：9.5/10個👍🏻
👶🏻B仔回頭機會：9/10個👍🏻
-----
#swallowhongkong
跟住我一齊吞食香港啦！🤤
#swallowwanchai
#finedininghk @ hEat
