如果沒有愛情（上）
民國19年，我要結婚啦，嫁畀張家大少爺。
雖然我無見過大少爺，但阿爸話，佢身材高大，仲去外國留過學，有文化有知識，係一個好優秀嘅丈夫。
有文化嘅人，當然要做大事。
我嘅責任，就係幫大少爺打理家務，生兒育女，等佢安心去做大事。
為咗結婚，我做咗好多準備。
婚禮用嘅鴛鴦被套，係我一針一線親手繡嘅；讀書人要用腦，我就去學煲補腦嘅湯水。
無幾耐就係我最期待嘅婚禮，新房內，蓋頭被揭起，我終於見到我要相伴一生嘅丈夫。
佢個樣好好睇，但佢嘅表情一啲都唔開心，佢用一種困惑而無奈嘅眼神望住我，問：「你鍾意睇咩書？」
「書？」我呆一呆：「我唔識字。」
大少爺點點頭：「對唔住，阿花，我哋唔可以做夫妻，包辦婚姻係封建惡習，依加要嘅係自由戀愛。」
我手足無措：「但係，我哋已經拜咗堂。」
「我哋無共同語言，無思想交流，係做唔到夫妻㗎。」
大少爺好認真咁講：「我已經有女朋友，係我嘅同學雯雯，只係我阿爸以死相逼，一定要我娶你......」
女朋友？我強調：「我明啊，男人風流好正常，我會同雯雯好好相處。」
「唔係，你唔明。」大少爺嘆一口氣：「總之，等我勸服阿爸，我就會同你離婚，到時你再揀個合適嘅人啦。」
離婚？結婚第一日，我嘅丈夫就話要離婚。
我無比茫然，我仲想講啲咩，大少爺已經爬咗上床，一手扯起張鴛鴦被，擺喺床中間，形成一條界線，涇渭分明。
「將就一晚，聽日我會買地蓆，我瞓地下，你瞓床。」大少爺聲音冰冷。
自此之後，我就開始咗有名無實嘅夫妻生活。
老爺奶奶對我好和善，大少爺都無虐待我，但除咗正經事，佢幾乎咩都唔同我講。
我好想靠近佢，但我無能為力。
去街市買菜，有時會聽到人講近來嘅新聞，據講，近排報紙上有好多離婚啟示。
支持者高呼自由戀愛，解放糟糠之妻，反對者就話，女子被離婚後，無處可去，甚至有人自殺。
唉，我好似見到自己嘅將來。
喺街市度，我同幾個女人做咗朋友，大家同病相憐，都被身為知識份子嘅丈夫嫌棄。
今日傾計嗰陣，講到我嘅情況，大家都好有共鳴。
吳嬸皺眉：「阿花，過多幾年，老爺奶奶見到你家大少始終唔接受你，都唔會想一世拖住個仔，遲早會同意你哋離婚㗎喎。」
「我明啊，邊有父母可以管仔女管一世。」我苦笑：「新婚第一晚，大少爺已經講到明。」
吳嬸眼珠一轉：「當務之急，就係要生番一兒半女，有仔女就無咁易離婚，到時老爺奶奶實企喺你嗰邊。」
我都好無奈：「我哋依加仲係分開瞓。」
「邊有男人唔好色，你都生得唔醜，係無機會啫。」
吳嬸神神秘秘咁講：「我同賣豬肉嘅豬肉榮好熟，佢個親戚開藥舖㗎，叫佢開番啲壯陽大補藥，偷偷畀你家大少食啦。」
趙姨就唔同意：「問題係，佢家大少係出面有女朋友嘛，叫咩雯雯，心有所屬，點會理阿花呢？」
趙姨出謀劃策：「首先要趕走個雯雯，佢係女學生嚟，阿花你去學堂大鬧，話佢係狐狸精搶你老公，等佢無面見人，自動離開你家大少。」
「但係，我未同大少結婚，佢哋已經談緊戀愛。」論先來後到，好似我先係後來者。
趙姨不以為然：「呸，乜嘢戀愛！你哋有父母之命，媒妁之言，先係正經夫妻。」
陸大姐插嘴：「趕走一個雯雯，仲有千萬個雯雯。女人最緊要，係捉住男人個心。」
我嘆氣：「大少都唔同我講嘢，點捉得住佢個心？」
「佢唔同你講嘢，你可以同佢講嘢。」
陸大姐教路：「男人最鍾意女人溫溫柔柔，含情脈脈，你主動哄吓佢，嗲吓佢，冰山都會融化。」
三個女人，三個做法，我究竟應該聽邊個話？
下集：http://bit.do/e4wZo
將專頁設定為「搶先看」/ "See first"，最新故仔馬上睇！
浴缸有女人頭髮：https://goo.gl/bosGnQ
我嘅職業係：死神：https://goo.gl/7Y45rr
#短故 #短篇 #小說 #陳美濤 #廣東話 #粵語 #tomatochan #如果沒有愛情
