【KFC都進軍素食市場？】
大家有印象的話，應該記得我講過自己係chicken killer，非常鍾意食雞，基本上任何煮法都無任歡迎，而炸雞更加my favor。雖然KFC炸雞方面不算特別出色，但勝在密密轉款式，加上總有一間左近，正合乎我懶人之選。不過鍾意還鍾意，食得多始終有罪疚感，轉食素炸雞又點睇呢？
上圖並非整蠱大家，KFC的確宣布同人造肉公司Beyond Meat有合作計劃，推出綠色桶裝素炸雞，開始時會先試水溫，只有亞特蘭大其中分店進行1日限定。有留意開美股消息的朋友，應該知道Beyond Meat自 5月上市後升勢凌人，由上市時股價25美元，曾經大升高見239美元，反映市場對人造肉未來充滿憧憬。無他，現今愈來愈多人講求健康，牛肉豬肉雞肉排住隊出事，轉做食素一定較安全。Beyond Meat用植物蛋白生產人造肉，標榜不含脂肪同膽固醇，口感又拍得住真肉，自自然然有龐大增長潛力。
我雖然不是素食者，但間中都貪得意幫襯素食餐廳，我自己幾歡喜Beyond Meat人造肉質感同味道，尚可以成為真肉替代品。另一方面，自從全球各地興起素食趨勢，加上名人素食者效應，好多朋友都因為健康同環境保護等原因開始素食生活。根據Green Monday最新「港人素食習慣調查」，「死硬派」食肉獸比例比4年前更大減近五成。所以長遠而言，只要價錢稍為入屋，我對香港未來素食市場發展抱有信心。
