話都冇咁快，#小怪獸s 滿月喇。滿月當日咁啱又係母親節，出個post留下念先。
呢個月聽得最多嘅說話，有兩句。一，「嘩，我生一個已經夠忙，兩個你點頂㗎？」；二，「嘩，你個樣好攰喎。」關於一，其實我唔係好識點答，因為我哋從來未試過齋湊一個，一嚟就打孖，所以冇得比較。總之每日加埋瞓三個幾四個鐘，而嗰四粒鐘通常要拆開六次嚟瞓，每日喺食掃換瞓食掃換瞓入面無限循環(所以連影相都冇時間gel頭🤣)；不過過咗兩星期，慣咗嘞，又好似冇乜嘢咁。
至於攰，就必然嘅，咁嘅schedule唔攰嗰個應該係Iron Man嚟。但係我時常提醒自己，我再攰，都唔會夠阿太日常攰。我都仲叫可以同屋企人on下shift，又或者喺出去開工嗰陣放下風，而佢就真係要場場正選踢足百二分鐘，有時仲要射埋12碼，辛苦晒妳喇。不過又如佢所講吖，見住兩隻嘢一日一日咁長大，就幾攰都冇所謂。有時返到公司，啲比較後生嘅同事問我有咩感受嗰陣，我都係同一個答法：記住要對爸爸媽媽好啲。養兒方知父母恩，真嘅。
就咁樣，過咗一個月喇。又有人問我對小朋友有冇咩期望？坦白講，其實冇乜。雖然係我哋帶佢兩個嚟呢個世界，但唔代表佢哋嘅人生會由我嚟操控。做父母嘅，唔係幫佢做晒全部選擇，而係要令佢知道每個選擇嘅利弊，然後教佢哋為自己所做嘅選擇負責任。我始終堅持，佢哋嘅人生係屬於佢哋嘅，呢個睇法一直都冇變過；反而係我要時刻提醒自己，唔好變做怪獸家長，唔好成為我細個討厭嗰種大人。律己不嚴，何以律人。
如果我真係可以對佢哋有少少要求，我會想佢哋健康快樂；其次就係，你哋可以發老豆脾氣，但唔該一定要孝順媽媽。媽媽為咗生你哋，真係好辛苦，而嗰種辛苦，係not until你哋做人哋父母之前都唔會體會得到嘅。總之，記住一定要錫媽媽。
再多一樣嘅話，我好希望你哋善良正直。尋日嘅滿月同母親節，叫咗兩邊屋企人上嚟，買外賣懲罰下活一鮮(阿太未食得生冷嘢，叫咗其他嘢畀佢，但就被迫睇我哋食海膽🤪)，喺Petit Kitchen訂咗兩個蛋糕仔慶祝下；邊食邊睇電視，就知喺當今世道，能夠同家人簡單坐低食餐飯，已經變成並非必然嘅幸福。所以，喺亂世之中更加要學明道理，懂辨是非，呢兩樣嘢比好打得同考第一重要太多太多。記住，做一個善良嘅人，只要善良，無論你哋送個乜嘢顏色嘅手袋畀媽咪，佢都會一樣咁開心。
趁住滿月，公布埋佢哋嘅英文名先：#怪獸仔 叫Archibald，有勇氣同真誠嘅意思，我哋通常叫佢做Archie，而 #怪獸女 就叫Audrey；至於中文名，就仲等緊過風水師傅嗰關。
祝阿太做媽咪之後嘅第一個母親節過得開心，祝小怪獸s滿月快樂，爸爸媽媽永遠愛你哋。
我挨之：www.instagram.com/vinceng88
太挨之：www.instagram.com/ahtaidailylife
