《我真係好多謝香港》
#讀者投稿
雖然做記者嘅年資尚淺，但最近做香港人移民嘅故仔，係第一單我做到忍唔住眼淚嘅assignment。
係機場送別受訪者時，bureau chief問我，當年你從內地來港時，有無好似佢地咁唔捨得、喊得咁淒涼？我諗咗諗：當然有唔捨得啊，特別係最錫我嘅婆婆。不過我知道，準確來講係被大人們告知，去香港係為咗有更好嘅未來嘛～所以都唔係咁傷心，反而係滿懷希望。
與其說我真係好_鍾意香港，不如話我真係好感激香港。
曾經係新移民，慶幸係我讀小學嘅年代，無太多歧視，班主任安排咗幾個同學仔照顧我，所以我好快就適應同融入咗。當年大家會照顧你係新同學，同你講多d廣東話，但唔會因為你而要全世界遷就你，大家強制講普通話。係我要認識香港、融入呢到，我覺得好合理。
第一次親身經歷「民主」同「選舉」係小學時年年開學必備嘅「選班長」。以前係大陸，邊個做班長係老師委任的，年年都係班主任個仔，或者好乖嘅同學。其他人就只有鼓掌的份。當時唔知呢d叫「民主」，但覺得「投票」同「少數服從多數」呢件事真係好amazing！
唔知點解我到而家仲印象好深刻，當日提名我做班長嘅同學，知道我當選後開心到彈起嘅YESSSSS!!! 我當時完全係黑人問號❓「你興奮緊d咩呢？」而家先知原來有得揀，真係可以好開心！
另一個shock嘅位係，原來呢個世界有自薦，係大陸，大家就算心入面想做某d嘢，都會表面上互相退讓。係香港，原來可以有自信，有公平競爭。唔洗怕醜，覺得自己有能力就企出來承擔，至於其他人認唔認同你，就投票決定。無論輸贏，大家都respect結果，因為少數服從多數。
我慶幸係我讀中學嘅年代，有自由辯論呢樣嘢。大家為住自己相信嘅嘢去說服大眾。從來真理會越辯越明，但而家竟然連辯論嘅空間都無。
最近收到一封前輩嘅email，其中一段講到「我質疑自己當初鼓勵你讀新聞嘅建議係咪做錯咗」。係我讀書嘅年代，讀/做新聞係一個見識世界、了解社會嘅好途徑，而家做記者竟然變得如此危險。
我只畢業了幾年，卻不斷強調「我個年代」，我諗無論我自己還是前輩，都無諗過香港會變得咁快、咁陌生。
來香港之前，成日睇一段片，畫面係中環嘅電車係摩天大廈間穿梭，香港真係好繁華，好嚮往來到呢個咁摩登嘅城市。不過其實我係一個路痴，病情嚴重到公司大少少都會盪失路個隻。做咗記者後，被逼要認路啦。好多謝呢個崗位比機會我認識香港。
幾年前同外籍朋友係灣仔食完點心，我盡地主之誼介紹下呢個社區比佢識。駱克道朝早雖然平平無奇，夜晚其實係「紅燈區」。警總係我第一次做突發嘅地方，案情係有人將5包毒品塞入patpat，比人係機場拉咗，所以係到開記者會。溫莎大廈係好多社福記者會都會係到開嘅地方，第一次來嘅時候搵唔到地方，來多幾次就熟咗了。遊行要影高位，通常都會來軍器廠呢條天橋……雖然全部都唔係d咩大事，但呢一座座石屎大廈，因為有一d故事，而變得唔普通。
佢話，從來無人咁樣介紹香港比佢識，通常都係千遍一律介紹邊到有知名景點，邊到有好嘢食。但而家呢條灣仔最普通不過嘅街，比你講完之後，變得好特別。
感激當年嘅香港仲係一個健康嘅城市，比咗好好嘅教育我，見到紅線延伸至教育體系，每次做教育相關嘅議題時，都覺得好心痛。
諷刺嘅係，當年我嘅父母因為香港有較好嘅教育，帶我落來。而家嘅家長為咗比好d嘅教育仔女，而被逼離家。
呢到曾經係幾多人拼命偷渡過關，都要比仔女係到受教育嘅地方；幾多top bankers要來搵真銀嘅國際金融中心，但而家都逐漸散去。電車路依舊，但呢到嘅好多嘢，連最基本嘅核心價值，都變得模糊。
//近乎留白那生命
是這些結伴 讓我擁有過豐盛
以我沾濕的眼睛 對美好光景致敬//
聽 #先哭為敬 見到條電車路有感而發
Follow我哋IG：
🔝最新職位空缺：Fillturegroup
🔝最新職場情報及冷知識：Fillturecareercoaching
🔝全職獵人：Fulltimeheadhunter
灣仔食 在 灣仔為食友, Food in Wan Chai, Hong Kong 的推薦與評價
歡迎分享，新知舊雨，以食會友。切勿作商業廣告及其他非食品用途。一定禁止,及永久開除。謝謝各位.。飲和食德. please add yourself in: 中環為食友, Food in Central ... ... <看更多>