真實遊戲（上）
我哋千辛萬苦，排除萬難，終於打爆咗敵方嘅主堡！
打贏呢一場，我嘅排位又會往上升，真係令人身心舒暢。
主堡爆裂嗰一刻，突然間，我聽到「遊戲開始」。
咪住先，我啱啱打完上一場，仲未跳到結算畫面，未開始打新一局啊。
呢個時候，我發現一件更可怕嘅事。
我唔係睇緊遊戲畫面，我係身處遊戲裡面。
我望吓我隻手，手上果然拎住一把弓箭，我之前一向都玩射手。
「喂，唔好發呆，開始啦。」有人拉一拉我隻手。
我呆一呆：「你係？」
對方舉高手上嘅盾牌：「我係你嘅輔助，放心喺我身後輸出啦。」
我胡裡胡塗俾佢拉住跑，一路跑一路問：「我啱啱打緊機，無啦啦入咗嚟。」
「原來係新手。」輔助點點頭，開始介紹。
呢個地方叫「真實遊戲」，每個玩家都係真人。
遊戲規則同我打機差唔多，都係分為兩隊對戰，目標係守衛自己嘅主堡，並且擊破對面嘅主堡。
講到呢度，輔助突然大叫：「前面有人，係對面嘅法師，射佢啦！」
眼前出現咗一個拎住魔杖嘅女仔，手足無措咁望住我哋。
佢係活生生嘅人嚟㗎，我點射得落？
下一秒，輔助舉高盾牌，狠狠砸落女仔嘅頭上。
女仔被砸到成頭都係血，然後佢一揮魔杖，一個火球就飛向我心口。
我中咗火球，天上又降落一片火雨，我嘅血條不斷下降，最終倒下。
我眼前有一個復活倒數，十秒後，我發現自己企喺復活點，無幾耐，輔助都出現咗。
輔助埋怨我：「你做咩唔射佢啊？」
「佢係活生生嘅人……」我嘅思緒好混亂：「明明係你打佢，點解佢會殺我？」
「低能，人人都知要殺射手先啦。」輔助撇撇嘴。
呢一刻，我先真正意識到，我喺個遊戲裡面。
輔助再次拉住我，叫我去守塔，呢次面前嘅敵人，係一個虎背熊腰嘅大漢。
我下意識舉起弓箭，發動技能，將佢射死咗。
遊戲中，唔係你死就係我亡，而且死咗都會復活，都令我無咁內疚。
無幾耐，我哋打贏咗呢一局。
結算畫面過後，我就出現喺大廳，輔助拍吓我膊頭：「兄弟，你反應都幾快。」
「咪住先。」我捉住輔助：「我點先可以返去現實世界？」
我雖然鍾意打機，但唔代表我鍾意被困遊戲世界。
輔助指一指旁邊嘅告示版，上面寫住「遊戲規則」。
喺「真實遊戲」裡面，每人一日至少要打五局，不設上限。
贏會多一粒星星，輸會少一粒，夠星星可以升排位，排位升到最高，就可以返去真實世界。
「即使完全唔輸，都要贏一百場，先可以離開呢度。」
輔助嘆氣：「而且邊有可能唔輸，有時係贏兩場輸三場，真係好灰。」
我同輔助再傾多陣，大家都幾投契，就一齊玩多兩場，一輸一贏。
我攰到氣都喘埋，得閒打吓機，同被逼打機係兩回事，而且下下都要用箭射到人爆晒血，都幾大壓力。
我忍唔住講：「要升到最高排位，分分鐘要打幾百場。」
輔助加多句：「而且你排位高咗，你匹配嘅對手排位都會同你一樣，即係實力強咗。」
「咁搞法，真係人都癲。」我嘆氣。
輔助突然雙眼發光：「其實係有人會癲，遇到癲嘅對手就好啦。」
我唔明。
「有啲人見升排位無望，一生都要被困遊戲世界，就愈嚟愈頹。」
輔助解釋：「佢哋被強制入場，就索性掛機，匿喺復活點唔出嚟，甚至特登搗亂，我哋咪少一個對手。」
我提醒佢：「我哋有機會抽到癲嘅對手，都有機會抽到癲嘅隊友㗎。」
「咁又係，唉，呢啲嘢好講運。」
呢個時候，大廳中傳來一陣鬨動。
一個獐頭鼠目嘅男人出現，好多人圍埋去拍佢馬屁。
我忍唔住問：「咩人嚟㗎？」
輔助解釋：「佢係近期最勁嘅刺客，已經連勝二十場，大家都想佢同自己組隊。」
「咁就要出賣身體？」我見到有個靚女用個身去痴佢。
「大家喺現實世界都有留戀嘅事，實力又唔夠，可以點啫？」
輔助一臉艷羨：「如果我係靚女，我都想出賣身體啊。」
我望住被圍繞嘅刺客，都有啲羨慕，唔係羨慕有靚女痴佢，而係羨慕佢可以咁勁，勁到為其他人帶來希望。
我要努力，終有一日，我會成為其他人嘅希望，幫我嘅隊友離開呢度。
呢個世界除咗呢個遊戲之外，咩都無。
人唔會肚餓，唔駛去廁所，唔玩遊戲嘅時候，只可以睇吓遊戲嘅裝備列表，同其他人交流吓。
我嘗試交朋友，但每個人嘅諗法，都只係要升排位、要離開呢度，三句不離遊戲心得。
而且大家如果無組隊，可能下次就喺戰場上相見，你必須將刀插入對方嘅心口，仲點樣建立深厚嘅友誼？
唉，我都係快啲出番去，再諗交朋友啦。
我日夜打機，有贏有輸，逆風扭轉戰局，當然開心，
但有時遇到脾氣臭嘅隊友，有少少失誤就互相埋怨，甚至故意搞破壞，又真係好嬲。
呢個係團隊遊戲，隊友嘅影響好大，我開始想組一個固定嘅戰隊。
下集：https://bit.ly/2WABZTD
將專頁設定為「搶先看」/ "See first"，最新故仔馬上睇！
買咗凶宅之後：https://goo.gl/DIQrI0
我係一個三歲細路：http://bit.do/eQuGy
#短故 #短篇 #小說 #陳美濤 #廣東話 #粵語 #tomatochan #真實遊戲
