米迦 Micah：一隻無賴蠢熊的故事
從前就有條村，村入面就住咗好多戶人，其中有一戶人嘅屋主就係一隻得小學程度畢業嘅熊嚟，佢就叫做「維尼」。
有一日，維尼屋企漏煤氣，而維尼亦都發現呢個問題，但佢又唔識整。咁喺呢個情況之下，正常嚟講應該要揾個人嚟整至係嫁，但維尼就無咁做，佢反而就將屋企反鎖，鎖住啊跳跳虎啊豬仔果啲喺入面，然後就走咗出去村口坐。
啲鄰居聞到維尼屋企傳出異味，就去村口問維尼：「你屋企係咪發生咗咩事啊？點解咁大陣煤氣味嘅？」維尼極力否認，重好風騷咁邀請大家去佢屋企食蜜糖。好多鄰居都半信半疑，所以都無理到維尼。
無幾耐之後，水管工人Mario行過維尼屋企，諗住食口煙，點知一點煙，維尼屋企就成間爆炸，Mario被炸到重傷入院，而且場爆炸重炸爛哂人隔離鄰舍啲屋頂啊窗門啊大門之類。
見到自己屋企搞成咁，個個村民自必然都好嬲啦，就拉大隊去咗找維尼晦氣。維尼一見到成班村民，就搶先就話佢自己屋企就無漏煤氣，但就發生咗煤氣爆炸，肯定係啲別有用心嘅人將啲煤氣灌入佢屋企，所以就搞到佢屋企爆炸，炸到熔熔爛爛。不過佢話佢都已經揾咗裝修工人嚟整返自己間屋，所以叫大家唔使擔心，而呢個搞到佢屋企煤氣爆炸嘅人會俾佢牢牢咁釘在歷史的恥辱柱上面嫁喇。
呢個時候以超人為首嘅村民就質疑維尼點解唔肯早啲承認佢屋企真係漏煤氣，就算維尼自己唔識整佢哋都可以幫手整，唔使搞到炸到成村啲屋都炸爛哂咁話，質問點解重要喺度講大話。
維尼就反駁話依家呢場爆炸都已經影響哂成村人，已經成條村嘅人嘅事嚟，大家應該共同面對呢樣挑戰，同時佢亦都認為超人應該集中精神喺整返超人自己屋企上面，唔係將超人自己屋企做唔好防範而爛咗嘅責任推卸喺維尼度，咁樣嘅批評係不得人心，因為維尼認為超人指責維尼嘅努力對超人自己整返佢自己屋企係毫無幫助。因此維尼就話大家應該放低成見，同心協力一齊重建呢條村咁話喎。
然後就......無然後喇！因為呢個故事重連載緊，故事劇情發展就只係嚟到呢度，所以大家有興趣嘅話，不妨放長雙眼睇埋落去。不過老實講如果我係村民嘅話，我就肯定動議逐呢條無賴蠢熊出村，費事陣間呢期玩煤氣，果期玩石油氣，下期玩沙林毒氣，咁你哋就大劑喇。玩死佢自己事小，搞埋你果下事大嘛。村民們，諗諗佢啦！
#無恥是爽
#無恥則無敵
#為禍人間就係呢啲
延伸閱讀：
中國外交部促美方集中應對疫情 勿推卸責任
http://news.now.com/home/international/player?newsId=384055&refer=Share
