［自從識咗泰妹，我躺著也中槍］
(2) 戴住頭盔蜈蚣彈
自從開咗舖以來，每日都搓our breast去搞好貨櫃cafe，可以話已經到咗人體極限，瞓醒都好似差唔爆電嘅感覺。有日，小弟好不容易忙完一輪，諗住坐低撚下電話，臀部剛坐暖之際，好不幸，小弟又一次中槍...
正當小弟腦神經繃硬過椰子殼，諗住瑟縮係一角，突然感覺周圍異常寧靜，彷彿走進咗異度兇間，身後突如其來幾下深呼吸聲，接著係頗有節奏感嘅撕撕聲，節奏越嚟越急亂，我個心都開始亂起嚟！
作為身經百戰嘅「中槍專家」，有咩緊要得過戴返個頭盔，我立即嚟一個蜈蚣彈，彈去泰妹身邊，用最殷勤嘅聲線，配合剛烚熟嘅狗頭，請示泰妹有何效勞，佢兩眉一合答道：「啲冰好硬呀！」我零考慮，即搶走泰妹手裡劍(冰剷)，我扮口乖：「我最鐘意剷冰、剷雪同剷屎，以後等我嚟剷吖～」
無錯！無論係啲冰好硬，甚或冷氣好熱之類，都可以成為泰妹發射導彈嘅理由。睇到𠵱到，大家係唔係覺得今次有驚無險，搞掂即閃呢？正當小弟都係咁諗，準備除低頭盔，我又聽到未來戰士子彈上膛嗰下「咔咔」..
剷冰任務剛完，有不速之泰客點餐：「我要xyz丫～少甜少冰拎走唔該！」佢講得太快，我O咀，然後望住泰妹求救。雖則我泰文未至於bb班，但對於外國人，要活生生硬接機關槍式泰文掃射，總會有跳制嘅時候。泰妹對住我講：「佢要xyz呀！」嗰一刻，我個咀比個英文「O」字更圓。泰妹無名火起，再狠啲、大聲啲重覆一次：「都話要xyz咯！死蠢...」(死蠢兩個字我加落去嘅，因為佢表情已經講晒)。最後都係要尚大人自己出手搞掂個客。
𠵱件事鎖咗係我腦海監獄入面兩日，我趁泰妹心情大好之時，同佢講咗個故仔。話說有一次，阿Tony渣打完拳想去揸揸水，入到廁所鎖門除褲，突然有人嘭嘭聲大力拍門：「喂～開門呀！」阿渣問：「邊個呀？」對方話：「我呀！開門！」阿渣好嬲大聲問：「邊銀個呀？開緊大呀！」對方無名火起，再狠啲、大聲啲重覆一次：「我呀！」故事述畢，泰妹大笑兩人傻仔。我就同泰妹講，兩日前我哋正正係𠵱兩個傻仔。佢心裡明白我想講咩，但咀巴卻很pk：「有咩？無呀，我邊有咁做過呀？」然後佢走埋嚟摸下我個死人頭，乖乖乖...
唉，都係嗰句啦！間唔時襟下制姐，我識做嘅
～_～
_ _ _ _ _ _ _ _
想知我上一槍點中，可以睇睇
#［自從識咗泰妹，我躺著也中槍］
(1) 眼明手快夾銀仔
