12個月嘅Project -Say Your Dream- 終於圓滿結束，壓軸我搵咗一直好欣賞好欣賞好欣賞嘅《辦公室日報》板主聶瞳。等佢同大家分享一下佢對於「夢想」嘅睇法，一個世紀Crossover。
Project -Say Your Dream- 十二月號
《夢想與理想》feat. 聶瞳
大家好，我係聶瞳，收到全職獵人嘅邀請去寫一篇文，我好快就答應咗，直至開筆時再研究下係咩主題，原來係講夢想......弊喇！我冇㗎喎！
由細到大都冇夢想就呃你嘅，唔係話咩「做人冇夢想同條鹹魚冇分別」，而係我細細個嘅夢想通常不設實際，阿媽梗係想啲仔女做醫生律師工程師，不過我完全冇興趣，亦自問唔係呢方面嘅料子，讀書時期的確有幾樣嘢係好想做嘅，你聽完就知道我點解冇一樣係成功，因為當中包括－－－職業網球手、職業足球員、歌手......咁大家明啦！
小時候嘅夢想係好單純，森柏斯型喎！作為一個網球員，每年都要游走世界各地參與比賽，一時喺紐約，一時喺溫布頓，一時喺巴黎，一時喺澳洲；職業足球員賺錢喎，先唔好講咩C朗美斯呢啲級數，就算係普通一個英超球員，幾萬鎊人工係好濕碎，青年軍嘅人工都有成一萬鎊，英鎊喎，講緊周薪一萬鎊，唔係月薪喎。
不過未講重點，打網球同埋踢足球我都唔係好叻，呢樣先大鑊，莫講話英超嘅熱刺，相信連港超嘅傑志都唔會收我。
如是者，我大學畢業之後就當然冇達成以上任何夢想啦，戇居居又話要搵嘢做投入社會喇。由於屋企環境好差，父母離婚，加上我爸爸長期欠債，所以現實環境根本唔容許我去揀工，最普通嘅文員、Sales、CS、侍應......我通通都做過，而因為我係家中經濟支柱，所以即使搵唔到office工，中間嘅空檔我都唔會畀自己冇收入，最痴線試過去做桑拿浴室嘅locker職員，麵包學徒都做過。
當你生活都成問題，仲講夢想呀？我唔敢諗呀，先幫助屋企度過難關，再填飽個肚，應該比較實際啲。
後來我做咗記者就穩定咗，諗住成世都做傳媒，安安份份啦！我頂佢個肺，紙媒開始被淘汰，我想安份都唔得，輾轉間由朋友介紹去咗做HR，唔記得同你哋講，我由細到大最憎HR，每次interview見到佢哋啲嘴臉，我都好想一棍兜頭就扑落去，不過世事就係咁，係呀，我做咗HR喇。
再後來因為有同行嘅朋友轉咗去做headhunter，我見佢做得幾開心，又跟埋佢轉，點知一做就幾年，做下做下開咗個page，寫下寫下又多咗另一份職業－－－作家。
做作家係咪我嘅夢想？唔......從來冇喺我check list出現過，再講白啲就係偏離軌跡，但你問我而家係咪過緊理想中嘅生活？我會答你係。我從來冇諗過要坐擁幾多家財，住一層幾多呎嘅樓，買一件幾貴嘅衫，唔係要呢啲，我只在乎而家嘅生活係咪自己想要。
夢想係好遠大，好遙不可及，佢可以用嚟燃燒你嘅小宇宙，但係我哋一直畀生活嘅巨輪推住走，現實生活中有好多嘢要取捨，否則我都唔會走咗去桑拿室工作。
同樣地，6月之前，我平均一個月有16至20隻廣告，夠我豐衣足食，穩住旗下員工嘅生活，不過人生充滿變數，一場反送中運動，所有嘢180度大轉變，廣告商最鍾意喺邊種page落廣告？答案係平行時空嘅page，總之你唔好要佢嘅品牌同政治掛勾，咁對方就鍚晒你，可惜我又唔得，多次出post發聲之後，手頭上嘅廣告如雪片紛飛咁樣取消，大幅跌到得返幾隻，take side嘅後果就係，員工有糧出，我冇。
但你而家再問我呢個仲係咪理想中嘅生活，我依然會答你係，因為我深信自己做緊正確嘅事，好多嘢唔係用錢嚟衡量，做人冇公關會食屎，做人冇良心都一樣係食屎。
其實無論係夢想又好，理想又好，都唔應該係編制出嚟，亦唔係靠把口講出嚟，而係靠自己慢慢摸索同埋一步一步行出嚟，當中一定有好多枝節，令你行咗冤枉路，偏離原定軌跡，不過唔緊要，無論係得與失，成與敗，總會有得著，甚至搵到另一啲新方向，最重要係be yourself，過自己喜歡嘅生活，留住身邊嘅同路人。
