#爆頭一周年 #我仍然咁_鍾意香港
不經不覺今日已經係受傷嘅一周年，自上年6月12號超過一年時間，自己的確成長同改變咗好多，一直都希望寫一篇文去講吓自己嘅轉變同埋一啲工作上嘅決定，今日就同大家交代一下，解答返大家一個問題：「#究竟Key而家做緊啲乜嘢？」
#從導演變回社工
自從2015年自編自導自演嘅微電影上映之後，係北京行過紅地氈，就走上咗演藝工作者之路，開始擔任導演、演員、司儀等工作，將興趣變成工作，係好多人嘅夢想。
但，6月12號當日，我可以為年青人做嘅嘢都係因為社工呢個身份，我開始萌芽咗一個諗法：「#香港可能多一個社工比多一個導演好！」現在想起呢個諗法都幾幼稚，不過可能對於我來講做一個社工比做一個導演好，起碼唔會因為需要搵食而下下返大陸，仲要同啲藍色人士嘻嘻哈哈...
再加上做咗陣地社工之後令我更加想做社工，希望為香港嘅公義盡少少綿力：「#係公義同夢想之間我揀咗公義。」雖然我將工作同埋興趣分開咗，但我的創作仍然希繼續，創作公司有我嘅拍檔接手，自己希望可以義務參與創作一啲非商業、唔使自我審查、真誠嘅作品。
#沒有培訓的培訓組織
自從2007年，多咗一個培訓師身份，有屬於自己嘅培訓組織，嗰陣時一直都鍾意人哋叫我做培訓師多過叫我做社工，的確做老師係我由細到大嘅理想職業，「我真係好鍾意教人！#幫一個人由唔識教到識真係一件令人好有滿足感嘅事！」
直至2018年，多咗新拍檔，亦開始重組每分鐘，開始有自己嘅培訓中心，希望將來打入內地市場，當時仍然會受邀到過不同內地地方講學，關於心理輔導、九型人格、家長教育等等。但，上年一個反修例令所有嘢化為烏有，亦令我更清楚大陸嘅錢，我係冇本事賺嘅！
毅然放棄自己嘅培訓中心，暫停所有培訓組織嘅工作，同內地嘅培訓市場劃清界線，我阿媽話：「你以前喺大陸建立咗咁多野，唔會覺得可惜咩？」我笑一笑：「唔會！#有啲錢我係賺唔落㗎！」如果要我嵌着良心去賺呢啲錢，我寧願餓死！希望我仍然可以係有生之年透過志願性嘅分享，可以幫到更多人認識多啲乜嘢叫做初心同埋良知。
#再見我的劇場
自從中四開始做人生第一齣話劇，直至而家，除咗會考嗰年之外，我每一年都至少參與一場戲劇的演出或創作。「#戲劇對我來講已經係我人生一個最重要嘅朋友。」大部份機構請我做社工，都係因為我識做戲。10年前，更建立咗屬於自己嘅劇團！
唔知係咪命運嘅安排，上年正正係劇團嘅10周年，而劇團嘅生日正正就係6月12號！自問自己係呢個時勢下係完全無辦法可以專心創作，即使預期會為10周年所創作嘅戲劇最後都要告吹。
再加上喺劇團有唔同嘅立場成員，顧及到佢哋嘅感受同埋擔心，所以到現時為止，自己都仍然未有新嘅創作，但希望喺未來嘅日子我可以為劇團創造出一個有關於公義嘅作品，讓劇迷可以喺劇場裏面知道：「#正義有幾咁重要！」
#永不忘記的萬聖節
望住自己嗰件充滿血嘅外套，有時候打趣喺度諗：「去萬聖節party着住呢件衫去就得，血漿都慳返！」的確每一年嘅萬聖節我都唔會忘記嗰個畫面：
「我嘅血一滴一滴咁樣係我個頭度滴落地下...」
坦白講，相比起其他香港人，呢件事其實好小事，但係起碼都可能會出現一次贏嘅機會。我阿媽話：「即使贏咗官司都可能會好賠好少。」但係，「即使得贏得一蚊都好，都要贏！」為香港人贏返個公道！
「冇錯！我而家提告嘅對象係打我嗰兩個警察嘅雇主 - 政府！」
嚟緊會有一場漫長嘅戰爭會去面對，希望我哋大家都可以一齊努力，贏！一定要贏！香港人一定要贏！
我同好多香港人一樣，都係因為社會運動而改變左自己，我放棄咗演藝工作、培訓同埋劇場，但係我做返社工，搵返作為一個人嘅良知同埋初心。我鍾意我而家嘅工作，真正幫到人，亦覺得好有意義！我記得甄詠蓓講過：「對生活嘅感覺要保持敏銳。」
而我係呢段時間對社工工作嘅感覺，係前所未有咁敏銳。因為可以抱住一個初心去做我嘅工作，一個所有香港人嘅初心：
「我真係好撚鍾意香港！」
祝所有香港人 萬聖節快樂！公義必彰！
爆頭社工 Key 敬上
#撚字唔係粗口嚟㗎 #香港人加油
圖：觀塘已消失的連儂牆
