2019年11月22日
華富財經
維他奶的夢醒時份
維他奶(345)昨天公佈中期業績，盈利微升3%，以一隻四十幾倍PE的股來說，這個增長幅度等同是倒退，午後股價曾急瀉12%，埋單跌7%，主席在業績會上仲加多腳，話以往股價過高唔現實，現時股價回落先至正常，主席講得輕鬆，難為了一眾基金，尤其是遲入場個堆，「爽過吸大麻」的夢終於要醒喇。
這些超高估值的高增長股，在股市內的例子非常多，強如騰訊(0700)，在2017年時都係四五十倍PE，但每季出業績都勝預期，所以大基金小股民都唔會覺得佢貴，有買貴就冇買錯嘛，增長夢係無價的，再睇返現時三十倍PE，業務比兩年前更平衡，但個夢醒咗，每樣野都較之前挑剔，再有增長夢就更難。
講返維他奶，其實個夢在6月公佈全年業績時已經醒咗，盈利增長19%，內地業務收入增長25%添，如果是普通一隻飲品股，已經係不得了的成績，但奈何當日是五十幾倍PE，兩年前股價只有十幾蚊，所以只要業績有瑕疵，大行唔like，冇出來護航，個夢自然會醒，一醒就由高位跌兩成半，之後頂在三字頭玩咗幾個月，九月及十月本應是股市的小陽春，但維他奶卻逆市而行，又再次引證到，市場上的資金，永遠都比我們聰明，之前唔明點解咁弱，相信昨天的業績已經給你答案。
高增長高估值的內需股，今年升到爆廠，安踏(2020)升一倍，李寧(2331)升兩倍，海底撈(6862)升一倍，頤海(1579)都167%，幾千億的美團(3690)都有一倍。如果戰友對高估值嗤之以鼻，很可能錯過了大升浪，又或者過早離場，感覺有如冇買過一樣。講真現階段仲衝入去，實在要無比勇氣，因為隨時會成為下一隻維他奶，回望返維他奶的故事，交唔到數、增長放慢是其死因，但由業績唔掂，股價見頂至近日反覆尋底，其實都有一段頗長的時間畀你走人，重點就在於你肯唔肯走，如果自問未能駕馭心魔，就勸你不要入場玩高增長股了。
