《蘋果日報》【雲文子教路 余逸思沈殷怡水晶鏈擋小人 Hailey練美娟雪卵等桃花】
疫情籠罩全球一整年,新一年將有新開始,人人也盼望能慢慢恢復過來,另有一翻新氣象。ViuTV找來了得令女藝人余逸思(Yoshi)、沈殷怡(Shirley)丶陳俞希(Hailey)與練美娟(娟姐),跟有玄學天后稱號的雲文子師傅拍攝一輯賀年節目《開運旅神團》為大家開運。
4個單身女神走在一起,話題難免圍繞着求姻緣催桃花,她們希望得到雲文子師傅的加持,尤其在新一年覓得如意郎君。她們學習在家擺風水陣、圍着鮮桃花順時針行3圈等催旺姻緣的妙法。雲文子先送上水晶鏈,並教路如何擺桃花陣:「東方係今年桃花位,催旺方法『貴神』主愛情、婚慶,『天英星』為吸引力、魅力,喺東方放置一隻粉晶象或一對鸚鵡公仔,就可催旺桃花,令感情發展順利。」
Yoshi為求令桃花更旺,搞笑地將水晶鏈放進內衣,雲文子聽後沒好氣說:「我嗰啲唔需要咁嘅,戴就得㗎嘞。」而Shirley的手鏈竟忽然斷了,大家嘲笑她爛桃花,Shirley說:「都唔知桃花有幾爛先可以斷咗,師傅話幫我擋咗啲小人,其實小人一直都有,希望擋咗就冇事啦!」
其實4位女神戀愛趣事多,娟姐拍拖次數有7次之多,她笑說:「我爛桃花比較多嘅,今年師傅私下畀咗個粉晶座我,擺咗之後新對象真係有出現,相信會越嚟越好。」Hailey也拍過8次拖,現時單身的她暫時不想拍拖:「我嘅取態係低調,就算結婚可能大家都唔會知,可能有咗小朋友大家先會知,因為我事業心幾重,甚至乎係因為要小朋友先會結婚,以前會諗25歲結婚,30歲生小朋友,而家30歲都過咗,其實40歲都可以生小朋友嘅。」此時娟姐更相約Hailey一同雪卵,Hailey說:「好呀!我已經諗過,35歲都未生就會去雪。」
而有3次拍拖經驗的Yoshi,大嘆以往都是爛桃花,不過一直喜歡小朋友的她,希望今年遇到真愛,笑言望能夠閃嫁閃生,她說:「我鍾意小朋友,都想快啲生,都想小朋友有爸爸,因為我住嗰區旺丁,所以暫時駐守,希望繼續旺丁添丁,都可能閃婚㗎,不過生小朋友就慢慢計劃。」而有3次戀愛經驗的Shirley坦言現時不着急於拍拖:「做嘢先,我又真係冇乜追求者,好多都係虛無飄渺嘅。我鍾意戴眼鏡、哨牙同瘦嘅男仔,如果你覺得係嘅請follow我。」
至於被問到想將桃花催得更旺,雲文子師傅說:「避免喺東方放香薰瓶、使用香薰精油擴香機,容易惹來霧水姻緣。不過如果廚房爐灶位於此處,可盡量多啲用明火煮食,能加旺愛火,令愛意更強烈。」
最後,雲文子師傅提點女神的催桃花增運飾物與增運顏色,屬狗的Shirley刑太歲,要戴兔形飾物來化解,增運顏色是黑與綠色;屬蛇的娟姐今年是非之年,適宜戴上鎖鏈形圖案或飾物,紅與綠則是增運的顏色;屬雞的Yoshi是學習之年,宜戴星星圖案或飾物, 增運顏色是紅色與啡黃;而屬龍的Hailey犯太歲,適宜戴橢圓形圖案或雞形飾物,並宜穿戴綠色、紅色的服飾來增運。
#雲文子 #奇門遁甲 #風水 #玄學天后 #Yoshi 余逸思、Shirley 沈殷怡丶Hailey陳俞希丶練美娟 娟姐 Florica Lin
Search