第七篇：白色巨塔（香港醫院轉介爸爸去日本繼續睇醫生）
2016年11月，匯率是100円：6.98HKD (終於跌！）
爸爸過嚟沖繩，其中一個原因就係養病（是一種非常罕有的病，唔係糖尿病，但係我哋想睇嘅醫生，係糖尿病中心阿頭～）。11月剛剛返香港睇醫生，醫生命令我要定時打針，否則情況會惡化。所以唯有聽話，拿着轉介信去找醫院。（我要再次多#謝瑪麗醫院的醫生和護士，好感激佢哋咁照顧我！）
有新相識的日本朋友做同醫療有關的工作（其實係Mia同學爸爸！），介紹我地去新都心一間中型醫院：大浜第一病院。因為睇過很多有關於醫院的日劇，所以對日本醫院有些避忌。勢利嘅醫生、權力鬥爭嘅主管、唯命是從嘅下屬, 病人要送禮....太過深入民心，所以入門口之前好緊張。
首先，要打去約醫生先。因為病情複雜，喺電話同護士講解過個病，提及有朋友介紹，醫生答應，然後預約。
預約當日，泊咗車，開心發覺係免費停車！（香港政府醫院都收幾十蚊一個鐘！）。但係那些車位，應該係全沖繩最窄嘅車位！但係竟然比香港車位濶好多！
早上9:00, 入到接待處，只需要填啲好簡單嘅資料，電話地址姓名，比張國民保險卡佢，醫院就俾咗一個文件夾，連簡單流程表同每人一張嘅記錄卡。連人帶文件夾將我哋扔咗去專科部門！非常之爽手，整個過程5分鐘之內完成。
到咗專科門診，等左15分鐘左右（我有理由相信醫生睇緊封英文轉介信），就見到我個醫生。佢嘅解釋非常之詳細，解釋左起碼10分鐘，比到病人好多信心。（我哋相信佢因為我嘅病，做咗好多前期功夫）。
見完醫生之後，話要抽血、驗尿、超音波掃描. （心諗死啦，雖然有保險，但係日本肯定好貴，同埋要等好耐...驚唔夠時間接阿女放學）。佢哋轉頭將我分流去化驗部門。 抽血驗尿，連等候時間，唔駛10分鐘。跟住做超音波掃描，等候時間幾分鐘，但係掃描掃左10分鐘，非常仔細！兩個鐘頭之內有報告！時而10點幾，所以我同佢哋講，12點到先返嚟。佢地都冇問題。
12點鐘準時返到。醫生立刻接見，幾分鐘後走得！去咗嗰個部門嘅結帳部，5分鐘左右出左張單。
跟住我哋就攜同記錄卡去自動繳費機度付款。無錯係自・動・繳・費・機，好似你去食拉麵嗰啲或ATM。插張卡入去，就會顯示你要比幾多錢。比完錢，部機就會打一張紙顯示付款內容同一張收據，跟住走得。成個過程快到無論！比香港私立醫院快好多好多好多！
到咗大家最關心嘅價錢：驗乜驗物超聲波睇專科醫生。正價只需要¥15000！咪住呢個只係正價！我哋買咗國民保險，只需要比三成，最後我哋要比嘅錢就係¥4500,即係$315港幣！平到爛！即使冇保險，例如遊客過嚟睇醫生，你都只係比＄1000港幣！ 你喺香港搵間醫院嘅專科醫生收呢個價錢俾我睇！或者沖繩應推廣醫療旅遊～醫院裏邊好多英文指示，我相信有需要，佢哋可以用英文溝通。（例如爸爸住院，阿媽同亞女可以去玩，不停send 相比臥床嘅爸爸睇，出邊天氣幾好～）
收得咁平，以為呢間醫院好渣。錯！佢裏面嘅醫生，最少有一個非常有名，日本政界的人也會來找他做手術。我未試過喺呢間醫院做手術，估計設備都唔會差～呱～ 這是一家中型醫院，所以有些科目沒有。例如冇婦產科！
講到呢度，大家唔好誤會這些是福利。其實系醫療保險。住喺日本，就規定一定要買醫療保險。可以係私人或者國家承保。國家承保費用，係根據你嘅收入而定。我們一家人，一年要付約二十萬円保險費！（大吉利是，希望唔使回本！）
重有，醫院D嘢好食！又有靚景睇！仲要平,仲要送野飲！仲要近市中心！可以將佢擺入去風景餐廳類別～ hahhahah!
P.S. 日本好多地方會見到有整骨院，原來國民保險包按摩！唔係，正式係骨療法/整骨術/結構感知學 Osteopathy。入到去你同佢講邊度痛，佢哋就會幫你＂整骨＂（似針對部位的泰式按摩），你有保險，只需要比三成。半個鐘頭，你只需要比1000幾百円。非常之抵！有些有針灸，每次比人拮只是貴少少。媽媽自從生左Mia腰骨痛，明明瞓地下幾個月好左又痛返，宜家去整骨院醫緊，希望有效！！醫師話大概去20次（估計2個幾月），整個療程可能港幣1500搞好！！喺香港，可能去2-3次已經冇左1500蚊，因為乜保險都唔包呢種療法！（今年跟奧運選手去幫佢地針灸的醫師就在同一整骨院！期待！）
如果有啲父母，唔好彩要去醫院，可以試吓呢一家。起碼唔係太貴。
URL:http://www.omotokai.or.jp/ohama1/
電話：098-866-5171
急症二十四小時。
醫院地址：Ohama Daiichi Hospital
1000 Ameku, Naha-shi, Okinawa-ken 900-0005
098-866-5171
https://goo.gl/maps/kiyBdB1pCNK2
瑪麗醫院專科門診預約 在 瑪麗安診所 - ajpeace ptt 的推薦與評價
瑪麗 安婦產科診所_線上預約專業女醫師團隊：蔡宜真醫師、王羚醫師、陳麗敏醫師及張仁姬 ... 心胸外科備註: 專科門診診所於週日及公眾假期休息，具體服務時間請看下表。 ... <看更多>