《#疫情下聯合醫院生產記》
懷孕20週照完結構已經知道BB係 #大碼B，所以由37週足月開始，已經日日期望BB快啲出世。38週開始，巧兒陪我日日行最少2-3個鐘，希望做多啲運動，BB快啲入盆。
20/1 #預產期 都未有動靜。21/1去做 #產檢，話BB未入盆，約左27/1入院 #催生。24/1 #聯合醫院 打黎，叫我26/1去留 #深喉唾液。
25/1，40w4d，下晝4點午睡之後，開始有少少肚痛，去完廁所都仲係痛，就開始啟動個 #宮縮計時器 app，電話跟身，一痛就㩒，痛完又㩒，就可以紀錄幾耐痛一次，每次維時幾長。入院前當然要徹徹底底洗個頭、沖個涼啦，坐月時就冇得沖得咁爽架喇。沖完又食左少少野，儲力生B。
6點幾去到聯合醫院，答完一堆問題就換左病人衫。上床做基本檢查，發現原來已經開左一度，太興奮，就快見到BB喇！唔知係25號定26號BB呢。
因為我5點食過野，要隔兩個鐘，即係7點先可以用樽仔留唾液做檢測。搞掂之後，就訓係產前房張床認真感受同紀錄陣痛，暫時個痛都未真係好痛。姑娘話如果陣痛3分鐘一次就通知佢地。好在有用app，唔用點記得幾耐痛一次。
10點，3分鐘一次喇，但又未有見紅、穿水，姑娘話如果痛得再密啲就再通知佢地。11點，2分鐘一次，佢地就話預備 #打豆 落產房。打完一個豆，姑娘過黎，話因為我個B好大，驚我生完失血過多所以要打個大啲既豆預備輸血。其實除左陣痛個痛，打豆個痛都係好痛。冇幾耐，陣痛加劇，姑娘幫我墊個暖包係背脊。過多一陣，就用輪椅推我落產房喇。
一出產前房就見到等左好耐既老公，老公未有檢測報告，所以只能夠送我到 #產房 門口。入到產房，駁好晒機，姑娘問我要咩 #止痛。暖包好似都有啲用，所以我要左個 #暖包。姑娘再問要唔要試下 #音樂 止痛，我話好，佢就比左部播純鋼琴音樂既mp3我，不過我覺得一啲止痛作用都冇。反而自己一痛就用 #腹式呼吸，仲有用。
12點，痛既程度不斷加劇，醫護人員真係一個都唔留係產房，由得我自己一個係產房痛。之後痛到真係大叫出黎，唔駛㩒鐘仔都有人入黎。檢查完同我講：「太太，未開夠度數呀，你放鬆啦」我唔係唔想放鬆，但真係放鬆唔到，一痛就好自然用力谷實，真係痛到標晒汗。助產士話：「太太，未開晒你唔好谷呀，BB好辛苦架！」聽到呢句，真係覺得好對BB唔住。
1點，都仍然未 #見紅、 #穿水，醫生跟住就同我 #人工穿水。水一穿，一陣暖流隨即流出，痛楚再度加劇。醫生幫張床變身，展開一對腳踏同扶手，之後話可以用力push BB出黎喇。一痛就要用盡力push，唔痛時可以抖抖。努力左一輪，醫生話要用 #吸盤助產，仲要我簽文件，求其潦隻龜之後，繼續用力push，用埋吸盤，好快就感覺到BB出左黎，嘩，見到佢既一刻，個喜悅真係蓋過左一切痛楚。
因為BB真係大隻，成8.7磅，雖然已經剪左會陰，但仍然有好大既撕裂，所以聯左好多針。應該因為出左檢測報告，佢地主動比我除低口罩，提供 #笑氣 比我去減低聯針既痛楚。btw，成個過程就算係痛到聲嘶力竭之際，個 #口罩 都要全程戴住，終於可以除一除低口罩抖下氣。
可能因為係第二胎，入到產房到生左個B出黎都係大約3個鐘，比起第一胎真係快左好多。同埋，第一胎成日會擔心自己會唔會難產，覺得自己同死亡好近，第二胎就冇擔心咁多無謂野，專心呼吸、用力。生第二胎，生理同心理質素都比較穩定。兩胎生完之後，見到眼前肥肥白白既BB，都覺得自己好叻，I’m so proud of myself 🤭😌😌😌
#疫情BB #公立醫院 #順產 #陣痛 #二胎媽媽
產前房 在 【生產日記(上)】台安醫院單人待產房(40w+1)催生全紀錄 的推薦與評價
【 生產 日記(上)】台安醫院單人待產房(40w+1)催生全紀錄-催生會很痛嗎？ 公開 生產 疼痛排名. Lining禮寧. ... <看更多>