【MK果實能力者】
MK・Ringo：東江・殺手・大腸桿菌
「非常好喝，非常清甜。」
我哋喺新聞不時都會聽到話東江水嘅水質好差，咩大腸桿菌一時又話超標35倍，一時又話超咗19倍，飲得多又會肚屙咁樣，所以當我哋見到有一位樂隊唧主唱帶著愛國之情，飲咗啖東江源頭溪水嘅時候，大家都好擔心佢嘅安危。
一嚟係擔心佢嘅身體喺飲咗啲溪水唔知會唔會有啲咩事；二嚟就係大家都擔心佢嗰枝水究竟會拎去邊度俾啲咩朋友飲㗎嘛。
咁究竟飲咗或者食咗大腸桿菌超標係唔係就會病呢？ 咁不如我哋都上網Google下啦。
大腸桿菌，學名就叫 Escherichia coli （簡稱E.coli），Escherichia其實係嚟自首位分離大腸桿菌嘅德國微生物學家Theodor Escherich，而“coli”指嘅就係呢呢種菌主要嘅棲息地—我哋嘅結腸colon。 大腸桿菌最主要係棲息喺溫血動物嘅大腸度嘅，咁又因為唔同嘅動物都會周圍屙屎，所以我哋生活嘅環境入面都會充滿咗大腸桿菌嘅。
喺溫度同濕度都啱啱好，加上又多營養，有好多嘅微生物都會住喺溫血動物嘅腸胃入面嘅，大腸桿菌就係其中一種。呢啲叫做正常菌落嘅微生物對人體無害，有部份仲會合成維他命，甚止可以阻止一啲病原體住咗入去你嘅腸道。當我哋嘅去屙屎嘅時候呢，其實大腸桿菌都會跟住一齊排咗出嚟，一部都會喺舊屎上面生存3日左右，之後佢嘅數量就會慢慢減少㗎啦。
問題就嚟喇，點解啲人成日會用大腸桿菌嚟度啲水有幾乾淨嘅呢？
首先，如果我哋搵到大腸桿菌，基本上都可以話你測試嘅項目已經俾屎污染咗㗎啦；其次就係，一般病原體都好難直接咁樣俾我哋搵到，多數都要用特定嘅儀器同一段長時間先可以培養都檢查得到。但係大腸桿菌就唔同啦，佢又生得好快，又易養，搵佢出嚟又易，所以就搵咗佢嚟做指標。
因此當你聽到話大腸桿菌超標嗰陣，唔係話佢個數量超過咗會令人病嘅數量，只不過係話你測試嗰樣嘢曾經俾屎污染姐。基本上，我哋生活嘅地方同角落，都有機會搵到大腸桿菌嘅，只不過係差在有幾多同⋯⋯
「噫，你咁講，驚__咩，飲！懷著愛國之情，飲！」
當然有部份嘅大腸桿菌，例如產志賀毒素大腸桿菌咁樣，佢哋係有能力去自行分泌一啲毒素去破壞宿主嘅腸壁細胞，引致腹瀉甚至係血性腹瀉，亦有可能會發燒同嘔吐。如果情況嚴重，仲可能會有溶血尿毒症，搞到腎功能衰竭㗎。所以話呢，唔係話你飲咗就一定會病會死，但係記得要保護自己，特別係自己有能力避免嘅危險就梗係要避開佢啦。
千祈唔好飲無煲過嘅溪水啊！
Killersoap- The Choice That I've Made
https://www.youtube.com/watch?v=8toC3R8NLj4
（本欄逢周六更新。敬希讀者垂注）
