😢
【有好多人就係小智 奮鬥左20年真係唔知為乜】
前日《寵物小精靈ＸＹ＆Ｚ》終於播出卡洛斯聯盟決賽既結果（小智對艾嵐）。
原本小智有甲賀忍蛙，加上其餘5隻實力好高既小精靈，勝算其實極高。但當所有人以為佢等左20年終於成為冠軍既時候，竟然出現無敵不死噴火龍....令歷史又再重演，小智變成智障一名。
好多人喺網上面辱罵編劇，指官方係咁宣傳甲賀忍蛙有幾勁，點知都係唔比小智有贏既機會。甚至有人話會罷睇、將屋企所有寵物小精靈既遊戲卡帶都dum曬。
但你地有冇諗過我地鬧小智係白痴，其實我地就係小智。
畢左業之後既你真係唔知做乜好，原本讀完新傳之後去做記者，話比香港人知呢個政權下既真相。不過呢幾年黑白事非扭曲曬，冇可能發生既事又不斷喺香港上演，一幕幕你以為係做戲先會見到既事，依家慢慢變成真實。
你知道有啲野已經根深蒂固，喺報社做左嗰幾年連自己都開始被同化，於是你唯有離開，去左一間公司做sales。
一開頭日日返到公司好努力咁搵客，用盡唔同既溝通技巧去幫公司傾生意，因為你真係好想升職去新加坡慢慢歎，依家份人工....？比左屋企人就冇左一半喇....咁多年黎，曾經有唔少機會放喺你面前，你以為自己夠料去升，點知老世永遠都係升你隔離team嗰個....輸既感覺當然好難受，你唔忿氣，覺得自己用左好多時間同心機，點解機會總係流走？
每次升職機會又冇左，個心失落到要死嗰陣，唔知點解都會有女仔主動認識自己。一個有少少霸道、一個最靚女不過唔夠自信、一個幾可愛但太自大、一個皮膚黑黑實實可惜能力太強....戀情同工作一樣咁失敗，有時真係寧願.....
時間過得好快，人生已經到左不惑之年，你仲衰仔到..到左依家仲要問呀媽拎錢，每次打電話搵佢嗰刻，你都好想摑醒自己，究竟你為份工仲要堅持啲乜野。
前幾日又有一個升職機會，資歷同能力根本已經係公司最頂級，但係呢個時候老世喺唔知邊度搵左個人返黎，曾經為前公司搵到過千億生意額...咁點鬥？！戇鳩！？你做咁多野..下..化為烏有..
大家都...搵唔到繼續落去既理由...
