《回水》
♂：早晨
♀：早晨，今日好攰，尋晚你訓左之後，有個朋友打比我，話要離婚喎……我心諗你結左好似唔夠兩年咋喎，咁快？
♂：唔出奇啊，平均兩對新人就有一對會離婚，好平常
♀：我都知好平常，離完再結都好平常，但下次佢結婚我仲做唔做人情好，家陣咁化學，一陣佢兩年結一次又離一次，我咪大獲
♂：乜你咁咒你個朋友啊……
♀：我太清楚佢喇，我認真覺得佢會，見一個愛一個，當初佢同我講閃婚個下我都唔睇好，但我都好俾面做姐妹，我估中左佢會離，但估唔到佢離得咁快，我做左封大人情比佢，我呢刻好想同佢講，頂你回水比我啦
♂：呢個概念幾好，如果離婚要回水，咁我諗人離婚之前可能會再諗多樣野
♀：但我真係同佢講，佢會唔會同我絕交
♂：嗱，你咁同佢講，呢次唔係回水，而係幫佢儲錢，到佢下次結婚個陣，你再做返人情比佢，其實佢無蝕！就好似小朋友收利是，父母幫佢儲起佢咁！諗起就正，但你最好話我聽你係邊頭，我到時幫你call白車
♀：喂……我真係同佢講左叫佢回水比我
♂：唔撚係啊！！？？？你認真？？？？？
♀：係啊，你知唔知佢講乜！
♂：我唔知，但你夠膽同佢咁講，你同佢都真係幾好姐妹，你確定唔需要我幫你報定警？
♀：你幫佢報就差唔多！！！你知唔知佢講乜，佢同我講，人情係祝福，佢今次離婚一定係大家既祝福唔夠！叫我下次記得再做大份少少！！
♂：你放返低把刀先，為左咁既人而坐監唔值得啊！
♀：唉……依家結婚真係兒戲……認真，我唔會想結婚
♂：係你未遇到一個你愛既人姐，到你遇到你就會想結
♀：我身邊有唔少朋友係覺得時間差唔多，而身邊個位唔太差，咁就結啦，比我就唔得喇……
♂：所以你依家仲單身
♀：我有同你講我單身咩
♂：唔係單身你點會成日覆到我
♀：少年你太年輕了
♂：所以你係有拍拖？
♀：唔好套我說話，你覺得係咩就係咩，我唔會答你
♂：車……如果你真係有男朋友，咁唔該你真係講聲，我唔想到時沉船先知
♀：所以，你喜歡一個人，佢有伴侶你就會放棄？
♂：唔係呢？
♀：如果你好愛好愛佢呢？你會唔會做第三者？
♂：唔……如果我有日做人第三者的話，我諗我真係好愛好愛佢先會
♀：我以為你會好堅持幾愛都唔會做添
♂：我從來都唔會講到咁實，將來既野邊個知
♀：有時係睇你個信念緊唔緊，有人可以完全唔動搖，幾愛都好，都唔會做
♂：對於一個朝早有十個鬧鐘既人講，我對自己信念好有懷疑
♀：咁你要檢討下自己喇！
♂：好，我聽朝就只較一個鬧鐘！
♀：我信你啊！你一定得！
♂：唔得既你記得叫我起身！
♀：係呢，尋晚你有冇夢見我
♂：有啊，好似任何人咁既樣，好激動咁話撐我！
♀：咁一定係你見過最靚既任何人！
♂：我第一日同你傾，唔覺得你係一個咁唔知醜既人
♀：我仲有好多野你唔知
♂：咁麻煩你慢慢講我知
♀：好啊
♂：……你……係咪準備去殺你個朋友，你好反常，咁順攤既？
♀：唔係你覺得我會點
♂：你會串串貢咁講，關我叉事
♀：你唔夠了解我，我連廢都唔會答，由你自己講
♂：但你頭先答好啊
♀：好，又如何？慢慢講，有幾慢，幾時講，你又點知，可能下世我先同你講呢！
♂：唉，你終於食返藥喇！
♀：食屎啦你！
♂：你平時都係咁講野？
♀：講乜？
♂：我想像唔到一個靚女扮出張學友咁款講，食屎啦你
♀：你知唔知，如果你親身聽到我講，你會講乜
♂：唔知
♀：可唔可以再鬧多我幾次！
♂：喂，食多粒藥啦，你又發病喇
♀：你真係好有趣，同你傾計真係幾開心
♂：我都覺
♀：嘻，好，啊……我個朋友又打比我，睇黎今日又有排煩，你訓先啦，聽日再傾
♂：好，今晚希望夢見任何人鬧我食屎
♀：真係夢到聽日話我知，晚安
♂：晚安
——
長傾·不見@道歉
https://bit.ly/LongchatEP13
