【靴專訪】流浪年輕中場：周家樂
.
最近，阿靴邀請咗今季新加盟流浪嘅年輕球員周家樂傾下偈。當日，阿靴去咗家樂細個時踢波嘅主場：三家村足球場，藉機會了解呢個球場對家樂嘅意義。家樂當中亦講到自己响職業足球路上嘅狀況，以及談論到自己鍾意嘅波Boot同埋原因。
.
靴：細個時，你响三家村足球場踢球長大，球場對你嘅意義係如何？
.
家樂：記得自己約14歲時，個時仲係中學時期，自己會放學後同同學去球場踢波，一星期會踢成兩至三次，個時同朋友去跟隊，踢到球場熄燈為止。呢個球場令自己搵到唔少樂趣，亦令自己鍾意咗足球。另外，而家有啲時候，覺得自己練波練得唔夠好，都會去呢個球場踢波，拎返個自信。
.
靴：响三家村足球場裏面，最深刻嘅一幕係？
.
家樂：最深刻嘅係好多人一齊跟隊踢波，有識有唔識嘅，非常之熱鬧。
.
靴：19/20年度上面，你响菁英盃分組賽上，代表理文响八場賽事上陣，覺得自己嘅表現如何？
.
家樂：覺得有好亦有唔好，好嘅係對傑志嘅時候，自己交出咗一個助攻，最終球隊亦可以打和，諗返轉頭，呢場比賽係自己最開心嘅，因為會感覺自己幫助球隊出咗一分力。唔好嘅地方上面，就係呢八場比賽睇到自己嘅不足，特別响力量與體能，畢竟職業賽事會有唔少外援，一有對抗就會知道自己唔足夠。
.
靴：青年聯賽你主要踢嘅係中場中，職業賽事上位置有無唔同？當中點樣適應？
.
家樂：自己响理文踢波嘅時候，位置可以話係多變，於八場菁英盃賽事上，左閘，攻中，防中，翼都踢過。我會覺得呢個係一個學習，始終教練叫到自己踢邊個位置，自己都會學習點樣踢得好，同時可以提升自己嘅意識。適應上自己就覺得唔算太辛苦，最重要係清楚位置上嘅角色，加上自己都會睇世界各地嘅聯賽，當中會觀察唔同位置上面嘅走位同配合，自己响比賽上面都會學以致用。
.
靴：將會响職業聯賽踏入第三季，你覺得自己最需要改善嘅地方係？
.
家樂：最重要係，頻率需要再加快，特別响跑動同均速上面，體能亦都需要再加強。
.
靴：今季你正式加盟流浪，你自己又有甚麼期望？
.
家樂：希望自己可以有更加多嘅上場時間，希望唔係踢淨係菁英盃，响聯賽上面都期望有更多上陣嘅機會。
.
靴：流浪足球隊裏面，你最欣賞嘅球員係？
.
家樂：一定係林嘉緯，佢係近十年來最佳中場之一，之前佢踢傑志嘅時候，自己都會入球場睇佢踢波，而家可以同佢同隊踢波真係難以置信。
.
靴：你最欣賞林嘉緯嘅地方係？
.
家樂：自己非常欣賞佢响比賽時嘅意識，思維，觀察力，以及護波能力。响自己心目中，佢係一個非常具智慧嘅球員，亦係一個好好嘅學習對象，自己遇到唔明嘅地方，都會成日請教佢。
.
靴：你最鍾意邊對波Boot？
.
家樂：自己都試過唔少牌子嘅波Boot，自己會較為鍾意三間嘅Copa，因為Copa質料係袋鼠皮，感覺非常舒適，亦可以帶嚟唔錯嘅球感，不過我會比較鍾意有鞋帶嘅版本，因為感覺會更加貼合自己嘅腳形。除此之外，自己都鍾意一剔嘅Tiempo，因為同樣都係用上袋鼠皮嘅質料。
.
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas Top Sala Lux: https://youtu.be/R7Win_I5PQw
【波Boot實測】白飯魚: https://youtu.be/-dbvs0_YgiY
【波Boot比較】五對驚喜釘Boot: https://youtu.be/vzDRe25kkrM
白飯魚鞋牌子 在 MM｜70年代大熱「白飯魚」原來有3隻色？筲箕灣 ... - YouTube 的推薦與評價
MM # 牌子 嘢// 70年代大熱 白飯魚 有綁帶唔綁帶原來有3隻色？盲測平價39蚊 白飯魚 VS 370蚊法國帆布鞋邊對好著啲？ 白色帆布鞋面，配上綠色或黑色橡膠鞋底 ... ... <看更多>
相關內容