【龔成問答信箱】(Q22741-Q22760)
Q22741:
Ar sir, 股票係唔係呃人既呢?
龔成老師︰
股票本身係一種集資和投資工具,同世界上所有工具一樣,都無對錯之分,係中性。
呃人與否,係視乎背係相關人士,有無令用股票這類工具漏動,去合法,甚至合法地騙小投資圖利。
我地買股票就是買入一盤生意,有些生意會騙人,但有些公司會真心做生意,長遠價值不斷增長,因此,我地買入前,一定要小心了解「該盤生意」。
我地唔係無方法,去避免騙人生意。
我地可以選股一些大型企業,或者有質素的ETF,作為投資目標。
如果係中小型個股,就一定要知道佢質素、行業前景、財務狀況等,才去投資。如果你連間公司點賺錢、行內有乜優勢、點解未來有發展和增長潛力,都答唔倒自已,咁就要停一停,唔好投資住。
------------------------------------------------
Q22742:
龔成老師你好, 請問8083中國有贊質素如何?現價合理嗎?謝謝你
龔成老師:
中國有贊(8083)集團主要於中國從事經營電商業務及支付服務業務,業務分類如下:
(1)電子商貿:透過電商品牌「有贊」提供各種有關虛擬批發及零售之線上及線下解決方案及服務,如「有
贊微商城」
以有「有贊零售」等SaaS軟體產品及人才服務、面向開發者的「有贊雲」PaaS雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。
(2)第三方支付服務。
(3)一鳴神州:提供第三方支付系統解決方案及銷售綜合智能銷售點裝置。
(4)一般貿易。
近年業務發展快速,生意增長力,不過,現時估值高,業務變化較,整體有好大的不確定性。加上佢過往在核數師報告出現過「保留意見」,盤數可能有古怪,雖然已是數年前的事,但都會扣分。
佢不是無潛力,但風險較高,這刻投資值博率不高。
------------------------------------------------
Q22743:
龔成老師,想請教你呀。我中女一名 未婚,我手持左幾隻科網股,仲要高位果時入,而家賬面 - 20幾萬,流動資金得番10萬。
我700同9988有月供,有聽你講佢地長線ok, 咁美團如何呀? 應該等定放左佢趁700 9988低入手?
冇左20幾萬 係有啲擔心。希望你可以指點下我個pro folio可以點
700 :649入 x240股=- $53700
3690: 399 入 x400 股=$-82500
9988: 238入x860股=-$69000
另外手持以下,
1137: 14入 x 7000 =-$32000
1211: 243入 x539 (月供)
1830: 7.2入 x2000
謝謝!
龔成老師︰
你唔好用買入價或帳面賺蝕,作為判斷一隻股票優劣的標準。你應著眼佢本身有無質素,如果有,中短期價格波動,令到出現帳面虧損,係無問題,照可以長線持有。
但如果係無質素,就算而一刻是賺定蝕,你都要將佢沽出。重點分析的地方,係企業質素,而非股價上。
睇翻你現有持股,從質素上睇,其實係無問題。但近期不少中央政策出台,都令都投資不確定性大左。但這些股票長線核心質素,暫時未見有明顯影響。
較大問題係,你這些股票買入價都偏貴,所以才出現較大虧損。而且你非常集中係新經濟股,特別係科技類。佢地雖然有增長潛力,同時風險都較高,你現時持有得太多。
以你年紀,潛力股(你持有的都是這類)可佔約4成,餘下應用以下平穏增長股。若你投資經驗較淺,潛力股比重,要再調至2成以下。到你學到一定投資知識,才慢慢調高。
建議你沽出部份,特別係美團(3690)和港視(1137)這類不確定性較高的潛力股,去換碼至平穏增長股,令組合更平衡。
另外,為了避免你再買貴貨,再有新資金的話,我建議你先利用月供模式,去做增值。透過平均價值買入法,去減低買貴貨風險,對你而言會較理想。
------------------------------------------------
Q22744:
老師,想問如果可買美股,買TCEHY 可以當月供分注嗎?
龔成老師︰
Tencent Holdings Ltd ADR (TCEHY)同買港股騰訊(0700)係無大分別,我地分析是否值得投資時,都係睇佢長線企業質素。
騰訊受政策因素影響,中短期弱,企業的賺錢能力會略減,以及企業估值都會略減,不過,政策影響未到核心性,無令到企業無法賺錢,只是賺錢減少。
這企業長遠仍有質素,有發展力的。佢最有價值的,就是「平台」,這亦是現世代好有發展的資產。
佢業務模式係提供平台,如通訊平台、交易平台、入門網站、遊戲平台等,而收入來源則是其廷伸的服務,如增值服務、網絡廣告、電子商務交易等。
過往的業績理想,又身處長遠有增長的行業,加上擁有重要的資產,即龐大的客戶群,將來發展各業務都有相當的優勢,這都是騰訊值錢的地方。不過,政策會令其賺錢能力減,不過,長遠騰訊仍找到賺錢方法,簡單來說,就是現時定了新的遊戲規則,而企業要時間去適應,中短期賺錢能力減,但長遠會慢慢好轉。
現價合理區中間,分注或月供,都係可以。
------------------------------------------------
Q22745:
請問老師,700 長遠點睇
龔成老師:
1)騰訊(0700)受政策因素影響,中短期弱,企業的賺錢能力會略減,以及企業估值都會略減,不過,政策影響未到核心性,無令到企業無法賺錢,只是賺錢減少。
這企業長遠仍有質素,有發展力的。佢最有價值的,就是「平台」,這亦是現世代好有發展的資產。
佢業務模式係提供平台,如通訊平台、交易平台、入門網站、遊戲平台等,而收入來源則是其廷伸的服務,如增值服務、網絡廣告、電子商務交易等。
過往的業績理想,又身處長遠有增長的行業,加上擁有重要的資產,即龐大的客戶群,將來發展各業務都有相當的優勢,這都是騰訊值錢的地方。不過,政策會令其賺錢能力減,不過,長遠騰訊仍找到賺錢方法,簡單來說,就是現時定了新的遊戲規則,而企業要時間去適應,中短期賺錢能力減,但長遠會慢慢好轉。
------------------------------------------------
Q22746:
你好 龔sir,因為近年市況都好差,之前d貨一直壓住,尤其藍月亮,抽新股中左,到溝貨溝到12.8蚊,而家跌到6蚊樓下,我應該繼續持有定可以再加注呢?
龔成老師:
藍月亮(6993)不是劣質,但最新業績令人失望,由於上市前的數據幾靚,因此,有可能佢上市前執靚盤數,這亦是我對新股/半新股有保留的原因。
佢最新的中期虧損約$4400萬元,去年同期純利約$3億元。虧損主因是市場上,其他平台出現過剩的較低價產品,導致佢定價策略及產品在市場上的價格體系受到干擾。
為統一產品在市場上的定價,佢向其客戶提供若干折扣以穩定產品的市場價格,此類折扣對其於上半年的毛利率產生約9%的負面影響。
相信中短期未必強,但長遠,其實又不算好差,佢成立於1992年,擁有衣物清潔護理、個人清潔護理和家居清潔護理三大系列共73個品種的產品。
佢係中國洗衣液有龍頭地位,加上毛利率高,賺錢能力強。睇翻佢之前的資料,以零售額計算,藍月亮在洗衣液市場、濃縮洗衣液市場及洗手液市場的市佔率均為第一。
整體有質素,不過之前貴,現價算是合理區中間,你有貨可持有,加注不是不可,但暫時小注。
------------------------------------------------
Q22747:
老師,1177 近期有能力上到$7.5 嗎?
龔成老師:
唔分析短期走勢,但長遠無問題的。
中生製藥(1177)是潛力股,人口老化令佢長遠有唔錯的增長,無論是政府投入的行業資源,又或是人民生活質素令可控制資金上升,都令人們更在醫療方面投入更多。
佢已建立一套完整的商業系統,有多個已賺錢的藥品類別,同時毛利高,可以不斷將錢投資在新藥裡,這模式運作很好。
但這類藥物企業,難免有一點風險,因此要久不久檢視,中短問題不用理會,但如果有一些核心性的問題,就要再全面分析。
就這刻來說,這股可以一直持有,因為商業模式理想,高回報,不斷再投資令股東利益快速增長。加上睇翻佢的業績,保持增長,這令企業價值有實際的上升,令股價得以支持。
現價合理區中上部,有貨可持有,分注或月供可以,這股可以長線持有的。
------------------------------------------------
Q22748:
龔sir,我喺9988股價185時入咗貨,應該止蝕還是相信公司繼續有持好?
我目的係持中長線
但見股票不斷落,驚股價如果不斷落,我是否應該止蝕?
龔成老師:
我持有比亞迪(1211)13年,先有較明顯的收成。
我地買股票就是買企業,要耐心等企業成長,而不是著重短期股價!
你應該減少睇股價,多睇企業年報。你耐心持有就得。
阿里(9988)有質素,中短期一般,但長遠仍有增長力,之前貴,現價去翻合理區。
係業務層面,擁有相當的優勢,不少業務處於壟斷狀態,同時增長理想。加上正不斷發展延伸業務,這都會成為企業增長的潛力,預期增長會持續,這是阿里最大的賣點。
以企業的長期發展計,這股的確優質,但股價都有一定的波動,現價算是合理翻D,但都不是大手時候。
始終將面對內地監管可能收緊,因此風險度增加左,不過,我相信佢的整體優質度仍在,內地不是不想佢賺錢,只是想規管佢。佢已建立好完善的業務,因此本身是無得輸,只是賺多賺少問題,現時監管多左,點都會影響賺錢能力。
對於這類優質、有發展,但現價未算特別平的股票,小注分注投資,或月供,是較好的方法,算是平衡了風險與增長的考慮。這股可以長線投資的。預佢現價約合理區中間。
------------------------------------------------
Q22749:
0305, 投資價值如何?
龔成老師:
無人能預測短期股價走勢,投資者只能從長遠角度分析。
五菱汽車(0305)質素算中等,業務都不算差,潛力度有的,但同時都有風險。
近期產品銷售不差,但我地分析時,唔可以只用咁短時間,就去決定一間企業品牌。這個平價車模式,可否能為佢持續增長,依然係一個問號。
以佢過去幾年,最高單年純利都不足2億,但現時市值好高,已經係唔平。近期此股急升了不時,此刻投資有一定風險。
如果以長遠角度分析,佢主要業務為於中國從事汽車零部件、發動機及專用汽車之製造及銷售業務。為中國商用微車發動機及汽車零部件之領導製造商,製造設施設於柳州及青島。
最近有中國品牌電動車大賣,而五菱汽車有做供應所以在當中有利益,因此都有潛力度。
不過,考慮到近期股價上升不少,這刻投資價值博率未算高。最好回翻先考慮。
------------------------------------------------
Q22750:
老師,3690 四百元及三百元有貨,美團是否有實力?是否可以等下?
thx
龔成老師:
美團點評(3690)有潛力的,但最大問題是估值難,之前貴。
佢過往一直虧損,到近一年,開始有正現金流,這是一個實質的利好因素,因為之前一直在燒銀紙,現時初步見到成效,不過,估值的方法好虛無,因為現時的市盈率仍過百倍。
如果有利好消息,佢可以上好多,但如果估值修正,股價可太跌。
只可以話,潛力是有的,現價唔算平,之前明顯貴,之後回翻好少少,大約合理中上部,不過,一定不能大注。小注持貨,是較好的做法。
如果你持貨佔組合比例%多,宜減。
如不多,可守。
------------------------------------------------
Q22751:
大師,富途跌咁多,係咪合理價啦?
謝謝
龔成老師:
富途(FUTU)有增長力的,但業務波動,有危有機類。
佢係一家在線經紀公司,提供一站式在線投資服務,騰訊(0700)為股東。該公司通過網上平台提供服務,其中包括香港、中國大陸,以及美國股市的市場數據、交易服務和新聞源。
佢以經紀佣金,以及手續費服務的形式產生收入。
這企業雖然有發展,但現時市盈率好高,股價變化大,要留意風險。好難話現時是否合理。
這股小注都可以,長線有增長力。
------------------------------------------------
Q22752:
龔 sir,近排股市有所調整,目前有什麼具潛質而又便宜的新潛力股可以買來長線持有?因為現時那些潛力股都偏貴。謝謝指點。
龔成老師:
安碩恒生科技(3067),終於去翻合理區,佢有長線投資價值。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。所以有長線持有價值。由於基金有30隻股票,比起單一股票,風險能減低。
這基金上落較大,現價大約在合理區中間,因此,這刻不能大注投資。
最好的策略,就是月供,或自行分注小注慢慢收貨(例如每月買一次、或2個月買一次),總之慢慢入,不能用盡現金,原理如同不斷儲貨,這樣就能平均買入價,減少風險。然後就長線持有。
------------------------------------------------
Q22753:
老師 可吾可以問下你意見。419 華誼騰訊娛樂 應吾應該繼續持有
EPS 低到零,ROE/ROA 又持續負數,毛利率升但淨利率又持續下跌,總資產又係愈來愈少
仲有冇其他數據去分析公司個情況,麻煩老師了
龔成老師︰
華誼騰訊娛樂(0419)主要提供線上線下健康及養生服務,以及傳媒業務,質素不太好。
生意不佳,多年持續虧損,投資價值不高。
其實你見到佢,除左每年都蝕錢外。無論營業額、毛利都一直在倒退。基本上,你可以斷定這企業質素有限,不宜投資。
------------------------------------------------
Q22754:
成哥你好,我們情況是這樣的,我們夫婦二人加奶奶,家住屯門山景邨257尺單位多年,單位已以租者置其屋方式買入,一直想住得舒適點,唯資金追不上樓價。
前年大病一場(cancer),痊愈了,決心找自己舒適生活,減輕生活煩惱,亦想趁奶奶身體健壯時搬開享受一下自由時光,但我們二人資金只有九十幾萬,二人月入共有$41000,
可負擔$13000-15000供款一個月。(但病過的我買樓後留番至少三十萬現金比較理想)我們的計劃是將來奶奶需要時可接她過來住。
所以都幾難搵,依個時侯我們竟然抽中了居屋,有機會選購山麗苑
現在問題是,想請教一下你的意見,山麗苑比較偏遠,無論照顧奶奶及返工都是,但兩頭家咁樣供山麗苑比較無痛,我們應選擇嗎?定還是市面上我們仍有私樓選擇嗎?
以我們資金是否太危險,如果買市面私樓,突然有需要(病)放樓回山景邨住,賣樓容易嗎?可否給沒有置業經驗的我們少少意見,謝謝你!
幾方面應該怎樣平衡?
龔成老師︰
坦白講,以你們現時預算和收入,市場上可選擇私樓唔多,而且呎寸都會好細。
其實山麗苑作為自住樓,以你們現時財務狀況,相信會係一個較好選擇。
但你們除了價錢,都要考慮多2點。首先,一定要確保自己長線"供得起"。
第二,你們要從生活角度(例如往返工作地點、家庭生活、照顧你奶奶等),去考量這個地方是否適合。講緊唔係短期,而係長線10-20年。
如果這2點都係過關,其實你買入係可以。至於再有餘下資金,你先要保留部份,用作應急。再有餘力,才去投資優質股,進行增值。
------------------------------------------------
Q22755:
老師,其實點解要用月供方式,例如港鉄0066一首2萬蚊,假設月供5000蚊,要供4個月才買到一手,但如我用2萬蚊可直接入一手,
係咪只係因為平均成本法這個原因,只是平衡番個買入價?
而你建議用平穩增長股去增值,是否因為你分析港鉄係有增長力,長揸多年後,這隻股價會升,而令財富增值?因為如果keep住月供十年,會hold住好多貨,
要假設佢股價升,先可令財富增加。
我持有呢d貨︰
0005匯豐1600股,
1088中國神華500股,
1398工商銀行5000股,
2388中銀香港
是否應該放左佢,用黎投資其他股?
如月供股票,或開股票戶口,你建議用邊間銀行比較好?我儲蓄用hsbc,所以順便在hsbc買股票。
巴菲特同你嘅書,首選你建議睇邊本較適合。謝謝您!
龔成老師︰
無錯,月供目的係希望透過平均價值買入法,去減低你買貴貨風險。這個方法,比較適合不懂估值的初學者。若你對估值定平貴有足夠經驗,直接買係可以。
港鐵(0066)有質素,可長線投資。佢是全港唯一的鐵路營運商,加上政府會比佢地產方面的優勢。長遠正面。
佢2020年出現虧損,主要係由於物業重估所造成,這只是一個會計上數字。扣除這部份影響﹐其實佢今年都係有盈利。
雖然近年有不利因素,影響了中短期盈利,雖然會扣分,但最核心的本質不變。
睇翻資料,港鐵過往正常年份,一年可以賺$160億,就算扣除物業重估,都有過百億,當中包括了鐵路經營部分,以及物業的發展、物業的租金收入。基本上,每年都過百億的。
物業發展部分,長線正面,收租部分,無問題。
因此,長遠發展仍是正面的,會有一定增長力。這股可長線投資。現價大約在合理區中上部。
而你現時持有股票,都係有質素。我地唔好成個組合,只集中係3,4隻股票身上。
最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能高於組合30%,同一股不能高於組合15%。要平衡,建立後長期持有,不是買賣賺差價,而是成為你財富組合一部分。
你現時持股,最大問題係集中晒係銀行業。你可以沽少少,換至其他優質股。如果唔想沽,就用新資金去慢慢平衡翻個比重。
至於用邊間銀行,無特別建議。除了收費,你可以睇翻邊間較方便你,咁就可以。
------------------------------------------------
Q22756:
hello sir~想請教下你~我手上冇物業,想愛嚟自住,做9成按揭,你覺得wetland 300尺$5xx單位值得入手嗎?thx~
主打_WETLANDSEASONSBAY.pdf
本身返工/住都係葵涌
龔成老師︰
參考其他附近樓盤,其實個叫價都有少少貴,主要係新樓關係。這就是我經常叫大家,盡可能都唔買1手樓,因為當中溢價,會令大家比多左成本。
如果這個是你自住樓,只要滿足到你長線生活所需(未來10-20年),而且又有信心長期供款都無問題,咁就可以。
但若你係諗住暫住,遲些有錢再換大屋,你就要留意。因為佢本身地理位置較偏,加上單位呎寸都較細,其實投資價值唔會好高。
而且,佢周邊生活配套一般,另外,你返工在葵涌。
若你真的打算購買,你最好到實地周圍走走,幻想下將來生活模式(例如買生活用品、食飯、娛樂等),真的覺得無問題,才好考慮。
反而我建議你在葵涌區找物業,會較好。
------------------------------------------------
Q22757:
請問龔sir 9988 仲有冇前境,想係190蚊以下建倉
仲有1211 長遠發展真係非常好?好多專家都話好 想問埋龔sir先決定買唔買 想放佢3至5年到
龔成老師︰
阿里(9988)有質素,中短期一般,但長遠仍有增長力,之前貴,現價去翻合理區。
係業務層面,擁有相當的優勢,不少業務處於壟斷狀態,同時增長理想。加上正不斷發展延伸業務,這都會成為企業增長的潛力,預期增長會持續,這是阿里最大的賣點。
以企業的長期發展計,這股的確優質,但股價都有一定的波動,現價算是合理翻D,但都不是大手時候。
始終將面對內地監管可能收緊,因此風險度增加左,不過,我相信佢的整體優質度仍在,內地不是不想佢賺錢,只是想規管佢。佢已建立好完善的業務,因此本身是無得輸,只是賺多賺少問題,現時監管多左,點都會影響賺錢能力。但長遠仍是有發展的。
比亞迪(1211)係潛力股,業務發展理想,研發不斷進行,汽車賣得好好,電池技術發展得很好,行業前景良好,企業長遠發展正面。
但這股經常都處略貴水平,大約去翻$135先算合理。如果本身有貨,可長線,但預佢股價波動。
如果唔夠貨或無貨,而又想買入,只建議月供,在$180以下先月供較好,但如果真的好想儲貨,同時現金足,現價以小注模式去月供,都可以的。
又或者可考慮GX中國電車(2845),這基金的目標是追蹤Solactive中國電動車指數NTR「相關指數」表現緊密相關的投資回報。
持股中最重就係比亞迪A股(002594),以及與中國電動車產業有關的股票,中國因為能源問題,長遠一定要發展電動車,這是大方向,故此股有一定投資價值。
------------------------------------------------
Q22758:
龔老師午安,不好意思打擾了,你係否用緊富途?呢間如執笠,有沒保障?很安全嗎?
上星期去咗hsbc間問左,佢話沒“月供美股“功能,為什麼?請問富途有月供美股嗎?
龔成老師︰
我不是在用富途,但其實香港監管唔差,富途都算安全。
《證券及期貨條例》下的投資者賠償制度設有投資者賠償基金,會為因中介人違責而蒙受損失的投資者提供賠償,每人上限50萬賠償。
若合規銀行或證券行出現破產,你投資證券之損失,可以從<投資者賠償基金>中,獲得最高50萬保障。
當中賠償細節,你可以參考翻<投資者賠償有限公司>網站,會有較詳盡解釋。
其實在一般的情況,就算股票行倒閉,你的貨都無事,因為佢只是中間人,你的貨無影響,除非佢中間有造數,例如每次你買貨,都無同你買。
至於匯豐點解無月供美股,我都唔清楚。至於富途有無,你要自己去了解翻。
但美股其實可以1股股買,你自行每個月定時定額買貨,其實都做到月供的效果,不必一定要用月供服務。
------------------------------------------------
Q22759:
龔sir,你好!我今年26歲,想向你請教,我剛轉新工作,新工作月薪約4萬,每月供樓1萬元(目前出租給別人)。因為上班地點太遠,剛買了車,所以流動現金只有15萬。
目前持有以下股票:
1691 2000股 $22.5
3690 200股 $281.2
6969 1000股 $47.5
9666 500股 $79
6823 2000股 $10.76
6823打算長放當少少收息股,其他基本面我看都是有營利能力,請問可否繼續持有?
另外現在每個月可以再支出1萬元作投資,請問現時我的組合是否有任何股票需要賣出,或可以增加甚麼類型的股票?謝謝你!
龔成老師︰
你現時持有股票,都係有質素,適合長線持有。當中思摩爾國際(6969)和美團(3690)由於不確定性高,加上監管風險高左,長線不宜持有太多。
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你26歲,應以增值為主,香港電訊(6823)只係收息股,增長力不高,不太適合你這個年紀。現貨照持有係可以,但不要再加注。
未來時間,建議你用「平穏增長股」 + 「潛力股」作組合,去創造一個增值平台。
現在你每月先用5成儲蓄做月供。其餘先儲起,用一邊月供一邊儲蓄的策略。
由於你投資知識不高,因此可較集中在平穩增長類股,至於潛力股,只宜小小注(不多於3成)。最好是你先提高投資知識,等到你有一定知識和經驗,才慢慢增加潛力股比例(大約5成)。
現時大市只是合理區,你現有15萬資金可以先投入多少少,用"分注"形式,慢慢買貨。餘下部份,就連同每月所儲倒的資金,就等大市出現一定程度的下跌,才大力度掃貨,然後長線投資。
------------------------------------------------
Q22760:
龔sir 你好,我都同意你用月股分階段入貨,但有時用月供的價唔好,我見中銀而家有個碎股易佣金0.25%,牛牛都有碎股單,但唔識加埋其他雜費,
用邊個買抵d,因為想分開買幾隻,手續費每個月加埋都唔平
龔成老師︰
其實你買碎股和月供,一般都係經紀佣金、印花稅、交易徵費等。因為每間銀行都唔同,你可以打去客服,查詢下邊個方法最抵。
但如果你係初學者,我比較建議你月供。因為月供就係透過"定期定額"供款,去平衡你買貴貨風險。
如果你唔識估值,去定平貴。自己去決定買貨價格,有機會令你買貴左,影響長線回報。
若用碎股方法較平,你就要幫自己每月定個日子,好似月供咁做。每月就在當天,不理股價,直接用同等金額去買碎股,咁都可以做到月供效果。
記住,係你未真正學懂估計前,唔好去自己定平貴,去經常調整每月儲股策略,好易出事。
當然,如果手續費佔比真的好高,你可以考慮用「自行分注」,例如每隔2、3個月買一手的方法進行。
又或者月供一些指數基金,就可以做到「平衡投資組合」這動作。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
百佳電子印花換什麼 在 龔成 Facebook 的精選貼文
【龔成問答信箱】(Q17541-Q17560)
Q17541:
你好,而家我覺得人生好迷失,我畢業就出黎創業,到而家28歲結束所有生意,跟住做過跟車保安好多吾同散工,為左救交租,為左生活,當中落差,我覺得好難受
人生好似已經無意義,過往創業無打工和工作經驗,都吾知點樣靠打工搵到錢,原本選讀左建造業課程,但身體腰骨天生吾好
長期太勞動又頂吾順,岩岩申請左公屋,不過單人申請要好長時間,當初因為做生意不利,所有股票都賣曬,我應該點做?
1.學一種外語,裝備自己,去外地發展
2.返澳門安穩打份工,夜晚去澳門隊訓練,打波係我鍾意既運動,不過就無錢途,不過人會較開心和輕鬆
3.繼續留係香港,可能試下搵政府工安穩工作。
因為就30歲,都吾知可以點做。
龔成老師:
我反而睇到,你比人擁有的優勢。
你試過創業,反映你有一定的生意經驗,要成功一盤成功的大生意,一般都要經歷幾次生意失敗,你已經行在相關的路道上,之後睇你的心態。
你已經得到比同年人更多的生意經驗,之後就睇你有無本事用出來。
另外,你提到會「返澳門」或「留香港」,即是你是一個兩邊地區都有住過,有聯繫的人,你可以從這些方向去尋找生意機會。
同時,你提到「去外地發展」,反映你的心態是能夠向外發展,你的視野並不是窄的,你要好好想一些不止是香港的生意。我想信以你內在的潛力,並不是跟車保安同散工,試試想得更闊。
如果你認為28歲結束所有生意,就等如你無生意能力,你就錯,因為做生意有失敗是好正常的,你唔好因為咁樣就否定自己。加油!
------------------------------------------------
Q17542:
龔sir,你好,我兒子現在是一位F.4學生,他非常有興趣於股票及基金市場的這些投資活動, 現在亦開始學習怎樣有技巧地買賣股票!
請問這類型學生如果將來讀大學的話,那一科目會是關於這類型投資的事項可以介紹入讀?
還有,請問如果他將來都向這方面發展的話,他的工作類型可以選擇那些行業啊?
龔成老師:
這問題無超出,只是近期太多問答要覆,回覆一般要多天。
首先,我會建議佢睇書,從書本上了解,以佢地年齡,我相信都睇得明,我自己都是18歲開始睇書。
以下是我認為適合初學者睇的書,部分要到圖書館找的:
《我十一歲,就很有錢》
《經濟蕭條中,七年賺$1500萬》
《富爸爸,窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪?》
《人性的弱點》
另外,我的書都很適合初學者的。
書本在三聯、商務、誠品都有得賣。由於部分書在一些書店已斷,所以若你見唔到,問下職員就得(又或向職員訂都可以)。
以下是我的12本書:
《80後百萬富翁》(第8版)
《80後2百萬富翁》(第4版)
《80後3百萬富翁》(第2版)
《財務自由行》(第6版)
《大富翁致富藍圖》(第4版)
《50優質潛力股》(第3版)
《50穩健收息股》(第3版)
《50值博倍升股》(第1版)
《股票勝經》(第3版)
《選股勝經》(第2版)
《年報勝經》(第2版)
《5年買樓4部曲》(第1版)
另一方面,佢可以向工商管理學科類別發展,佢可以多向老師問有關入這類學科現時的要求及方向。
佢有興趣有股票,無論是為自己將來的投資股票,還是事業上的發展,工商管理類別都是較大路,日後的發展也不差。
你可以叫佢睇晒上面的書先,之後有機會,可以報我的課堂,我相信對佢有一定的啟發。
------------------------------------------------
Q17543:
龔Sir 你對於未有盈利而財務穩健既股票如平安好醫生、Tesla既睇法係點?作為一個價值投資者係咪應該避開呢?
龔成老師︰
未有盈利的企業,估值主要係基於投資者對企業"前景"架期望。但無人知個期望係唔係一定出現,或者幾時會出現。
如果結果不似預期,股價就好大機會出現較大回調。這些不確性,就會係投資這類股票的風險。
平安好醫生(1833)可以話係潛力股,但就屬於較高風險的類別,我自己會比較怕投資這類。
首先,佢地的上市年期不算長,加上上市時是市場熱炒期,當時估值過高,對這類股有少少保留。
業務上,佢的確是高增長,同時業務有發展潛力,但睇翻佢地的財務數據,平安好醫生仍處燒銀紙狀態。唔係一定要避開,但投資時必需控制注碼。
而TESLA都係同樣情況,Tesla 2019年第3季才首次出現盈利,未來是否維持,會唔會出現資金短缺,無人知。
其實你睇好電動車,可以考慮比亞迪(1211)。佢有一個大優勢,就是中國因素,因為電動車最重要的是配套,所以國家支持相當重要,而中國對電動車的支持是正面,公共交通的訂單亦不斷給比亞迪。
比亞迪先在公車市場打穩陣腳,然後保持進攻私人市場,這是理想的策略。跟TESLA相比之下,比亞迪早已有盈利,這一點十分重要。
Tesla過去要不斷在市場各途徑集資,以維持營運及研發,但比亞迪已有正現金流,可以憑以戰養戰的模式,去穩健地發展新項目,資金鏈斷裂的問題較少,這是一個很有利的因素。
這兩間公司是全球電動車市佔率最大的兩間,但電動車始終是新興的產品,到真正全面普及仍有一段時間,當中總會存有不確定性,所以我在選股時,選了資金鏈較佳的比亞迪。
但比亞迪現時偏貴,要等佢回最少2成才是合理區頂部,到時才可慢慢分注入貨。
------------------------------------------------
Q17544:
Hi, 龔老師!How are you ? 我每日都有睇你嘅資訊!Thank you for taking your time to share your experience.
我想請問下如果我想月供!
2800, 823, 2388, 12, Hsbc
以上股票要選三個,我可以選擇邊幾隻?想供五年長線投資
我現在已經有樓700萬但只作收租!租金$14000
共他定期投資六百萬4% 回報!大約240000 一年息!
股票
74555 股 0003
40000股 6823
200股 0823
500股2388
我目標係想五年之後大約有五十萬以上年利息收入!🙏🏻
以上係我嘅投資組合! Looking forward to hearing from you ! Million thanks !
想補充!我現在係美國!之前諗住報你股票班、早在一月已叫你助手留位上你五月股票班!但因為coronavirus 所以我唔敢飛、取消咗我嘅回港行程.
我仲有一個問題唔係好明...點解2800 係成個股票組合中嘅比例要佔多啲?
Thank you!
龔成老師:
你現時持有的基本上都是有質素的股票,因此—可以長線投資。
至於所選的月供股票,都是有質素及可以進行的,盈富(2800)、恆基(0012)、領展(0823)。
不過,增長力就不算強,所以,如果你想組合的增長力增加,可以加入少少較有潛力的股票。
雖然你目標想集中持有收息股,但你都可以用「先增值,後現金流」作方法。即是先投資有增值類資產,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
至於盈富(2800),在組合佔多D都無問題,因為這是一個50隻股票的組合,你持有能有「平衡風險」的作用,同時可以補足你自己選股的不足,因此就算佔一半以上,都無問題。
希望疫情盡快過去,到時見!
------------------------------------------------
Q17545:
你好,龔成先生,我係上個月先開始投資嘅萌新,有d問題想你比d意見:
1.最近投資左中芯(981),均價35.55,由23開始分注投資到41.85,本身到40已經覺得高,但見討論區一直話中芯未來會前景光明,係國家意志,所以又開始係40價位投資落去。結果上市之後股價就一直跌緊....
想問下係唔係所有回流A股上市嘅公司都係上市前炒起,上市當日就會跌番去之前未炒起嘅價位?
見好多人將中芯同之前中石油同中車比,佢地係咪真係有可比性?
最重要嘅係......中芯會唔會可以上得番之前嘅價位?如果會嘅話大概要等幾耐左右?
2. 經過呢次教訓,我希望可以學習點樣搵到一間公司嘅合理估值同估價,講問老師建議我睇咩書比較好?
希望老師可以解答一下我嘅問題
下面呢部份希望可以唔好share出去,一開始投資中芯見一直升,所以問左屋企人借錢,又買左牛證同借左孖展炒,點知而家跌到咁甘,我好迷惘唔知點算
暫時一股都未賣,因為一日未賣出去一日都係浮虧,但好多人話一定會再跌落去,到底我應該而家即刻止虧好,定係等佢升番上去好?
龔成老師:
1)就算一間公司再優質,都可以「貴」。
中芯(O981),發展正面,業務將以快速增長,但如果股價的增長遠遠超過企業價值的增長,股價去到某一個位,都會下跌。
所以,你唔能夠只分析因素,同時要分析企業價值,這股近期炒作較多,其實已經到了貴的水平。另外,凡炒作多的股票,都要較小心,投資唔好大注。
這股如果你持貨太多,就要賣出。
至於回流A股因素,每次都不同的,但的確過往都有唔少股,當回流A股,港股就會下跌。另外,投資股票,最重要賺翻企業質素與平貴。
另外提翻你,根據統計,大部分散戶都是輸錢的,你聽網友意見,相信大部分都是無價值的意見,你應該用一些「真正賺錢的投資方法」,建議你盡快了解下,全球投資最賺錢係邊個,佢用甚麼方法。
2)《股票勝經》《年報勝經》,建議你盡快睇。
------------------------------------------------
Q17546:
你好,有啲股票投資想問吓!
本人持有
1818 5000股 9.64買入
3 4000股 13.68買入
853 3000股 41買入
這個組合應該繼續持有嗎?
龔成老師:
招金礦業(1818)是商品企業,質素不算好高,投資價值中等,持有可以,但長遠來說,又唔值得持有太多。
煤氣(0003)仍是有質素的,但增長力弱左,不過有得守,只要唔好太多貨就無問題。
微創醫療(0853)主要專注於治療血管疾病及病變的微創介入產品,潛力是有的。但現時股價都貴貴地,你要注意風險,如果小注無問題,太多就宜減。
------------------------------------------------
Q17547:
你好龔老師,我去年拜讀了你幾本書,在讀之前本已跟丈夫共有一自住物業,有幸在2009年買入,現價大概900萬。
當時已想稍後再買樓收租,所以讀完你的財務自由行,更覺得可以實行,就將自住物業轉到我個人的名下,再套現作為首期,希望可買到樓。
當時樓價高企,覺得短期內未必買得到,就打算將自己的現金,及部分套現出來的資金,買一些股票,同時跟丈夫二人在空餘時間去不同區域看二手樓。
計劃好像很好,不久後股市開始跌,我也就開始入了點貨。我自己心想股市會跌,樓市通常要稍後才跟隨,本沒想到會很快買樓。
但丈夫看中了一個新樓盤,覺得地點非常好,有升值潛力,因為市況問題,發展商的優惠好像很吸引,在9月的時候就買入了一個近800萬的單位。
由於前境越來越不明朗,丈夫申請按揭也遇到很多波折,蝕賣了一些股票,托賴還是順利完成了交易,聽聞已有業主開始收樓。
但現在我遇到一個很大問題,就是本來我和丈夫的工作尚算是較穩定的,但我早幾天被辭職了,我突然有點不懂得去想可以怎麼辦,所以想請教你。
現丈夫收入大概5萬,我每月要還款大概萬6,丈夫收樓後每月樓宇支出會由萬8升至3萬。若然能夠順利將新樓租出,每月也還是入不敷支大概萬5元。我當然希望可找到新工作,亦打算儘量縮減日常開支,但市況不好,真的說不準我會何時找到新工作。
現在我持有2, 1093, 1177大概13萬,現金32萬,一個隨時可對現的退休保大概13萬,外國基金大概20萬,公司應會發出大概10萬的final payment。
我今年37歲,丈夫39歲,若果找到新工作,我們當然希望儘力保留現有物業。我到底應該怎樣打算?
1. 可以的話兩年後賣,不用雙倍印花稅,但可能要將現在持有的股票、基金、保險等全兌現(若果不能順利租出)
2. 盡快賣新樓(雙倍印花),雖然蝕了但應有錢餘下,買股票或基金慢慢升值再另買物業
另外,我有點生意的念頭,很想在未找到工作時慢慢試一試,如果你有建議都請話我知。
龔成老師:
如果之前已順利做好按揭,這樣最煩麻的已經過去,接下來,最重要是你地的「供款」,首先,要留意一定的現金作防守,所以暫時唔好進行投資。
有現金你就可以買到時間,令你地有資金慢慢守,同時你在找工作上及之後的財富配置上,可以較有彈性。
可以的話,應盡力保住物業,因為這是資產,唔應該比短期情況影響到。同時,物業買賣成本貴,你地會因此而有一定的開支。
所以,你第一步是「留現金」,第二步是「找工作」,第三步是「賣股票及保險」,第四步(最後一步)是賣樓。
如果可以的話,唔好進行第三四步。
至於你想搞生意,要在零成本下進行,你可以試,但這刻建議你地留現金去守。
雖然近期市道差左,但不是不元可找到工作的,只要你肯做,應該無問題。
------------------------------------------------
Q17548:
Hello 龔成老師。本人現年30歲, 係一個理財小白,明白到用資金滾存資金才是增值財富的最好方法。
現時月入大概26K,每月儲大概1萬元,手上有120K現金,加上有70K 基金投資。
如果想5年内達到財富有800萬,有什麽投資好辦法?月供股票是一個好選擇嗎?謝謝老師指路明燈
龔成老師:
如果5年要去到$800萬,你要非常進取先有機會做到!
首先,要集中投資潛力股,你要比市場早一步找到,另外,你要不斷尋找股票,相信你每星期要花大量時間去選股。同時,你要大量增加投資知識。
同時,你要找資較高風險,較高潛力的類別。當見到有機會,就集中投資(當然這是高風險)。
總之,過程是一個高風險行為,同時難度好高。
建議你降低你的投資目標。
------------------------------------------------
Q17549:
我29歲
目標35歲前買到500萬樓
月儲10K
現有
2388 - $23.9@6500
2388 - $23.8@2500
338 - $2.16@8000
386 - $4.61@2000
386 - $4.6@4000
請問需唔需要轉下組合?
或增持邊一邊種股?
龔成老師:
你上述的組合,增長力中等當中股票不是無質素,但以你的年齡及目標,其實可以投資較有增長力的類別。
阿里(9988)、騰訊(0700)、港交所(0388)、舜宇光學(2382),但就要明白波動性比上述會高少少。同時由於現價唔平,你唔需要心急這刻增加,你可以等回少少先。
小米(1810)處合理區中上部,都可考慮。中國鐵塔(0788)則合理,都可考慮。
另外,以你的年齡,財富仍有一定的增值力,建議你多增加投資知識,在選股、企業估值、投資時機上落功夫,對你長遠財富有好大影響。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q17550:
想問你意見,今年底會推綠置居,即公屋住戶可抽籤申請買現有公屋貨尾單位,價錢平好多。你話如果抽到,買居屋還是公屋好?
龔成老師:
其實政府樓在投資的角度,一定唔及私樓。
因此,一般都會以自住的角度行先,你要睇下邊度方便自己,邊度好住。另外,如果可以用較少資金,而得到你在自住上差不多的項目,當然會考慮資金較少的。
至於投資角度,居屋一般都會比公屋好,但這個因素可能在這次的分析,未必是首要考慮。
------------------------------------------------
Q17551:
老師 我係一個90後 28歲 打工仔
今星期開始睇左你既 80後百萬富翁 睇左一半已經另我對錢 同賺錢既概念轉變
一路已黎既迷糊都開始清晰起黎 依本係我近十年第一本有恒心睇落去既書 我亦都買左2,3百萬富翁 同 財務自由行 決心睇晒去學更多錢 同投資既野
我依家環境非常惡劣 希望黎緊有機會參加你既投資班
純粹有種感激 睇左你既書覺得自己都可以做到 更加有恒心學習thx
龔成老師:
加油!我自己都只是一個公屋長大的香港人,正正由於屋企細,一直都好想有天可以有夢想物業,這成為我的動力。
你已有「潛在動力」,之後就要好好發揮,創造自己的命運,你要保持進步,希望有日在堂上見到你!
------------------------------------------------
Q17552:
龔成老師你好,我心中有一個疑問想問問你。
我看到很多收息股現在的股價很低,想現在買入等待日後股價上升,達成(財息兼收)。
但身邊很多朋友說要買入潛力股,可是如果收息股在日後回到比較合理或貴的水平時,我又覺得不太值得買入。
假如在較便宜的時候買入,等待到日後派息增長,本來5里派息變成了6里7里。不是更好嗎?
本人現在持有6. 電能實業 1000股 平均價 44.3
66. 港鐵公司 1500股 平均價 40.59
778. 置富產業信託 6000股 平均價 6.96
1310. 香港寬頻 2500股 平均價13.41
6823. 香港電訊-ss 4000股 平均價 11.47
我考慮加入大快活,恆生,宏利,粵海投資,這是好選擇嗎?
如果本金只有50萬,你會建議持有多少隻股票呢?
本人現在的持倉又有沒有問題?謝謝你的解答
龔成老師:
其實最重要是平衡,建立一個適合自己的組合。
潛力股的增長當然可以好吸引,但同時間,風險都可以高,每個人承受風險能力唔同,唔好比人影響。
收息股,增長力當然不及潛力股,但好處是有派息,股價相對較穩定,因此不同人有不同的配置。
如果你本身比較保守,就集中在收息股,就算投資潛力股,都只能佔較少的比例。
在較便宜的時候買入,等待到日後派息增長,本來5里派息變成了7里,這方向是正確,不過,部分收息股由於經濟弱會影響生意,因此中短期可以較差,要慢慢先能增長翻上去。
你現時持有的,都是不差的收息股,可持有。至於想加入的4隻股,都是有質素的,可加入,平均去入就得。
你可以動用$25萬,分注投資,餘下現金就等機會。
------------------------------------------------
Q17553:
請教下對2018看法長線看多少錢
龔成老師:
瑞聲科技(2018)有質素的,這股有平穩增長能力,長遠有發展,但你預佢不是爆升的類型,只是基本增長。
所以,如果要上升一倍,相信要4-7年的時間。
------------------------------------------------
Q17554:
老師,想請教老師 3309 希瑪眼科 係潛力股嗎?值得長線投資嗎?
鑒於現今趨勢 傾向電子化 而電子產品對眼睛嘅傷害不少 青少年近視 視力退化 視網膜問題 青光眼
白內障問題 相信會日益嚴重 咁對眼科嘅需求亦都會大增 而希望眼科擁有一流嘅眼科醫生
同醫療設備 公司亦都致力開拓大陸市場 佢嘅股價近年亦都上升左不少 想請教老師 這公司升值潛力高嗎?是倍升股嗎?先多謝老師回答
龔成老師:
希瑪眼科(3309)有質素的,佢主要於香港及中國內地提供眼科服務,及銷售視力輔助產品及醫藥產品。
另外,睇翻佢,都尋找加大在中國擴展業務,係2019年透過收購眼科醫院於昆明及上海拓展服務網絡及在惠州設立一間新眼科醫院。
除了一線城市,佢亦係昆明及惠州等二線城市拓展服務網絡。
這股在業務上,的確有吸引力的,相信生意將會不斷擴大。不過過現時估值都唔平,現時估值略貴,基本上已反映了企業的增長力。長線投資不是不可,但就唔建議太大注。
------------------------------------------------
Q17555:
龔sir:之前都問過你意見,我$5買入6088,呢段時間都上升好多,不過都突破唔到$5,我都揸咗好耐,我又唔想$4.5走,所以問下意見,你覺得我要止蝕嗎?
龔成老師:
一隻股票持有與否,最重要睇質素、前景,而優質度亦會決定你持貨比例。而你的買入價、短期股價走勢,都不是分析的因素。
FIT HON TENG(6088)有一定的質素,但企業本身的L賺錢能力唔算好強,平穩增長型,並不是潛力型。這股可持有,但又唔算好值得持有好多。
------------------------------------------------
Q17556:
老師你好,我係投資新手,正準備月供四隻股票,分別係盈富基金,中銀,港鐵同金沙,每隻各$5000,請問合適嗎?或者有其他建議?謝謝!
龔成老師:
這4股都是有質素的,盈富(2800)是一個組合,所以金額應該較多,例如$10000。而其餘的3隻,金額$3000。
你可以長期進行,現價已經是合理區,可開始。
但要留意,你唔好用盡現金,即是你每月除月供外,都要儲到一些現金。第一,你是新手,留現金是一定要。第二,現時大市未算平。
另外,當你有一定的知識與經驗後,可以加上其他較有增長力的股,會令你的組合更加平衡。
------------------------------------------------
Q17557:
雖然阿sir話優質股係長期向上,但係果時未上你堂買左匯豐同領匯,轉頭跌到咁,真係嚇親我。
而家靠睇盈富同港交所賺錢黎安慰自己,一想到而家買,平均買入價就會拉高,就會有d心魔。
我而家手頭可以投資既錢大約有兩萬蚊左右。
咁睇返我個組合好似都係水桶2,有金融(?)、地產、綜合類、銀行。
如果我想加多一隻,應該就要加水桶1。我個腦淨係浮到比亞迪同金沙,阿sir重有無推薦呢?
另外就係d人一路唱話港紙好快變廢紙,我應該去買金定換外幣(想換英磅)比較好啊?
唔該晒你呀
龔成老師:
我地投資,以「組合」的模式去運作,當中一定有較好、有較弱的,最重要是整體性。
組合應該有不同的行業,新舊經濟,各類增長,這才是平衡,如果你銀行類較多,宜減翻個比例增持翻其他的經濟類別。
你可以考慮比亞迪(1211)、騰訊(0700)、小米(1810),由於現價都唔平,所以可以等回少少先入,又或小注月供,你可以同時入這幾股,只要總資金合世較少就得(即是將你原本打算入的一筆錢,分成3份去入,有效分散風險)。
至於港紙,完全唔需要擔心。
------------------------------------------------
Q17558:
老師,我現時投資如下
Stock 股數(買入均價)
2388 1500 (23)
0001 1000 (56.15)
0005 400 (47.1)
0066 1500 (40.05)
現有可動資金30萬
有一物業月供約17000
每月可儲約3至4萬
現時是否不宜追貨,其實想入0700,但依家好貴,唔知會不會回落至380以下?
龔成老師:
現時組合,較多銀行及舊經濟,我地最重要是建立一個平衡的組合,你最好平衡翻少少。原有的股票可持有,不是無質素,但增長力不強。
騰訊(0700)要落翻$380好難,但你其實可以用月供,又或分注模式投資新經濟股,而不是一直等股價跌。這刻唔少相關股的確唔平,但我又唔建議你完全無貨,所以可以先小注,等跌先正式入。(如果你本身怕風險,就入小小好了)
現金$30萬,這刻唔建用太多,反而每月的儲蓄,可以更有效運用。
------------------------------------------------
Q17559:
老師 我現持有 241 ($22.15) , 2328 ($7) 823 ($幾隻股 62.75) , 想長hold 等大市升
或有什麼股現價好建議呢。
龔成老師:
這些股都有質素的,你可以長線持有,但要留意阿里健康(0241)的風險會較高,雖然潛力大,但唔建議持有太多。
至於其他股,如果平穩增長類的有:盈富(2800)、銀娛(0027)、恆基(0012)、中銀(2388)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:阿里(9988)、騰訊(0700)、港交所(0388)、舜宇光學(2382),但就要明白波動性比上述會高少少,現價唔算平,要小心控制注碼。
------------------------------------------------
Q17560:
龔sir,我想問點解好多投資者都話騰訊阿里⋯潛力大可以買,但佢地自己反而係冇入貨,唔係好明佢地心態,係因為新經濟股科網股波動好大,同埋唔係佢地一直以黎投資策略嗎?
另外想問比亞迪有冇機會落番合理價先入手,因為我想入一手,如果冇係$70入係米貴左D,定可以入吉利,會唔會冇比亞迪咁大潛力?
同埋網易你點睇佢前景,畢竟佢係網易二哥,騰訊目前價位太高了,係米可以投資係網易?
以現家潛力黎睇,9988、1211、175、9999,阿sir你會點排,認為買邊隻先比較合理?
9988佢有機會柒藍,現家入佢之後係米會有機會大升?
因為我係投資新手,己經買左隻1928,下一隻唔知買邊隻好,目前有5萬現金係手,見好多都升得好誇張落唔到手,希望呀sir俾D意見,幫我解答問題
龔成老師:
這個世界有唔少人都是「講多過做」,例如我一直話比亞迪(1211)$40平,一年前在$60,唔少網友話跌到$40會入,之後到了今年3月,去到$3X佢地又驚,真正入貨的人唔多。
好多人都只是得個講字,其實你唔需要理,我做人的方式,就是只求做好自己,唔理別人!
你預比亞迪在$70以下投資會較好,如果$7X就月供好了。
另外,你唔好只集中投資新經濟股,要建立「平衡組合」各類股都要有,你上述講的4隻股,都有增長力的,都可考慮,但都唔平。反而盈富(2800)現價合理,可以分注投資。而金沙(1928)都可長線。
至於網易(9999)有質素的。
先講講佢基本業務,佢創立於1997年,為用戶提供優質的內容和服務。以中文門戶網站起家,並推出了至今仍在發展的媒體及電子郵件服務。
2001年,戰略擴展到在線遊戲業務領域,根據App Annie的數據,按2019年iOS 及Google Play綜合用戶支出計算,集團現已成為全球第二大移動遊戲公司。
2006年, 推出有道業務,後已成為在紐交所上市的智能學習平台;2013年,推出音樂 流媒體平台網易雲音樂;2016年,開設電商平台嚴選,迅速成長為一家主流的自有品牌商品平台。
佢而家提供超過140款手遊和端遊,涵蓋遊戲類型廣泛。集團並內部孵化並發展出一系列創新且成功的業務,包括智能學習及其他業務,如音樂流媒體平台、自有品牌電商、互聯網媒體、電子郵件服務等。
整體上,佢業務有一定的優勢,以及仍有增長力。
不過,現時唔算平,同時市況波動,因此唔建議太進取,而小注投資是可以的。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
百佳電子印花換什麼 在 龔成 Facebook 的最讚貼文
【龔成問答信箱】(Q13761-Q13780)
Q13761:
你好,龔老師,本人最近在朋友推介下,開始閱讀你的facebook,真係獲益良多 。
我同老公今年都踏入50歲了,一直好努力好努力儲錢, 雖然有留意投資分析, 但係始終未敢行動 ,淨係識得將啲錢放喺銀行做定期, 所以回報一直好低好低, 好擔心到60歲退休時無咩錢用。
剛巧看到龔老師片【50歲 ,部署退休的策略】,覺得情況跟我差不多,所以想向你請教一下。
我同老公月入穩定,扣除日常支出後,打算每人每月月供股票$40000,合共$80000。 擬作月供的股票如下:
⑴ 恆生 $10000
⑵ 盈富 $10000
⑶ 中電 $8000
⑷ 港交所 $7000
⑸ 領展 $7000
⑹ 港鐵 $7000
⑺ 平保 $7000
⑻ 恒基 $6000
⑼ 長建 $5000
(10) 金沙中國 $5000
(11) 中銀香港 $4000
(12) 煤氣 $2000
(13) 比亞廸 $2000
請問以上月供股票的金額分配是否ok?
另外, 我同老公還有一些現金,部分做了短期定期(3、4個月的),尚有大約200萬現金可分注投資股票 ,打算分注購買以下股票(已手持一些匯控作收息用途) :
港燈、工行、香港電訊、 置富、 陽光、 深高速、 建行 、越秀、 匯賢、 冠軍
請問以上股票是否有重疊?應如何選取? 現時是否可以 分階段入市?
唔好意思,問咗咁多問題,因為真係好迷茫唔知點樣做。麻煩你給予一些意見,謝謝!
龔成老師:
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
以你地的年齡情況,以及還有10年退休,這刻應著重「增值+收息」。
同時,到接近60歲時,慢慢增加收息的比例。
你上述所月供的,基本上都是優質股,都是平穩增值股,方向正確,慢慢因你近60歲退休,到時收息股的比例,應該要增加翻。
另外,你月供的隻數太多,有點散,其實只要組合中有盈富(2800),已經是一個平衡組合,其餘股的隻數不用太多。
你可以月供:
⑴ 恆生 $10000
⑵ 盈富 $18000
⑶ 中電 $8000
⑷ 港交所 $7000
⑸ 領展 $7000
⑹ 港鐵 $7000
⑺ 平保 $7000
⑻ 恒基 $6000
⑼ 長建 $5000
(10) 金沙中國 $5000
這樣在管理上會好少少。
至於你持有的$200萬,的確可以投資你上述所講的股票,因為這些都是收息股,同時有質素。
但要留意,你要同時留有一定的現金,唔可以用盡$200萬去投資股票,記住,我地要建立一個平衡的組合,在可承受風險的情況下,合理地爭取回報。
因此,你可以部分投資於這些收息股,但要留意,我見同時有幾隻銀行股,合計的比例不能過多,不要超過$60萬。
------------------------------------------------
Q13762:
龔成老師, 想再向你請教 財務安排問題。
我和先生今年38歲,有一個8歲囡囡,先生是公務員每月收入三萬多元,計劃60歲退休,而我是全職家庭主婦。我們一家現居於公務員宿舍,每月租金約$1600。
我們剛剛賣掉一私人物業,還掉按揭後,有大約600萬現金。由於父母另外兩樓宇物業均有我和先生的名,所以如要再買新物業,則需付雙倍印花稅。
因此,想請教龔成老師,現階段我們應如何利用這現金作財富的增值而達財務自由呢?懇請你給我們一些意見。非常感謝你!
龔成老師︰
以投資角度考慮,現時物業值博率不如股票。而且你已有另外2個物業,故建議你這筆資金用於股票較好,透過股票組織一個長線增值平台。
我地會運用「先增值,後現金流」作方法,初期投資較有潛力的股票,晚期漸漸轉成收息型股票,為自已創造穏定現金流。
你這600萬可先分為2份,一份用"分注形式"投資在平穏增長股︰盈富(2800)、金沙(1928)、恆基(0012)、中銀(2388)、港鐵(0066)、煤氣(0003)、港交所(388)、長建(1038)、粵海(0270)、領展(823)、深高速(0548))或潛力股︰比亞迪(1211),中生(1177)或福壽園(1448)。
至於餘下的一半資金,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。
------------------------------------------------
Q13763:
你好,331嘅質素如何?
合理價系幾多?
龔成老師︰
豐盛服務集團(0331)主要係於香港、中國內地及澳門,從事機電工程服務、建築材料買賣、環保產品貿易及提供相關工程諮詢,亦於香港從事清潔及廢物處置管理服務、回收及環保處置服務以及洗衣服務。
過往生意都有穩定的增長,而盈利都是,但企業的規模較細,因此風險較大,同時規模效益不高。但以佢現時的估值計算,價格是在合理區。
你可以投資這股,分注買入就得,長線持有,但就不建議投資得太多,始終這企業有點風險。
------------------------------------------------
Q13764:
老師,您點䏲1177中國生物製藥?
龔成老師:
中生製藥(1177)是潛力股,人口老化令佢長遠有唔錯的增長,無論是政府投入的行業資源,又或是人民生活質素令可控制資金上升,都令人們更在醫療方面投入更多多
佢已建立一套完整的商業系統,有多個已賺錢的藥品類別,同時毛利高,可以不斷將錢投資在新藥裡,這模式運作很好。
但這類藥物企業,難免有一點風險,因此要久不久檢視,中短問題不用理會,但如果有一些核心性的問題,就要再全面分析。
佢商業模式理想,高回報,不斷再投資令股東利益快速增長。加上睇翻佢的業績,保持增長,這令企業價值有實際的上升,令股價得以支持。
但現價就有少少貴,有貨可持有,月供可以,亦可以等回落先正式入,這股可以長線持有的。
------------------------------------------------
Q13765:
老師你好。最近有休息日子看了你的文章,很想創業。
但上網找尋有關知識,但仍不足沒有頭緒創業方向及相關知識,甚至迷茫不知自己決定是否正確,只知道打工是最蠢的賺錢方法。可否給予意見或引導我思考一下,感謝你
龔成老師:
你要從你的興趣、強項、認識的事著手。
例如你本身對某類產品很有興趣,你會在那裡買?如果你在網上買這產品,這個網站的模式如何?
你最初要有學習的對象,你先尋找一些自己認為不錯的商店,了解一下佢地的商業模式,最始好大型及小型都有,先以小型作學習對象,然後就試下佢地的模式,能否成為你創業的方向。
你最初創業,可以先從一些低成本的網店、網上買賣著手,然後再一步步發展。最好唔好做得太雜,要專注在某一範疇,等人容易記得你。
------------------------------------------------
Q13766:
老師你好.我想問167前景如何:我現在非常煩惱,因我入了一球貨、同留意老師一段時間.覺得老師見解獨特,唔似一般分析員。
老師、我真是不知怎麼辦才冒昧打擾你!這筆錢是我和老公這幾年的儲蓄,真的不想全部蝕掉,所以才想老師给我一點意見。萬分感謝
龔成老師︰
萬威國際(0167)主要從事設計、開發、製造以及銷售及推廣多種電子消費產品。此股質素不佳,企業年年虧損,無投資價值。
加上2018年核數師的意見出現「不表示意見」,反映賬目「有古怪」。雖然你投資了不少重要資金在此股,但長遠還是賣出這股較好。
你要明白一點,買股票如買企業,企業質素和長遠發展前景才是最重要的考量。因此在投資一隻股票之前,必需花點時間去了解這盤生意。
年報、新聞、企業資料,這是一定要知的。基本上花一小時做資料分析,已可以對企業有基本的認知,你會發現這企業數年來都在虧損,沒有投資價值。
所以,你現在要做2件事。第一,每反彈就將你手上的167慢慢沽清。第二,你在再投資其他股票前,要先進修投資方面的知識。
你可以睇多D有關投資的書或我的《股票勝經》,裡會有教你點樣有系統地選股。而我的股票班,都會講5種選股的方法,教你點樣由2000間上市公司中,選取有質素的股票,相信會幫到你。
股票班時間方面,你可以留意我FB公佈。
------------------------------------------------
Q13767:
龔sir, 若果合理區的範圍有時頗大,有合理區上中下部。兩隻相似的優質股之間也有機會一隻在合理區頂部,一隻在合理區底部。
我的意思是假如兩股差不多優質,前景增長力也大致差不多。那麼有時候我們會把合理區頂部的那隻賣出,換到買合理區底部的那隻嗎?
龔成老師:
這都是一個投資策略。
但前題是,你進行的估值要正確,因為估值無一個絕對的答案,你要有一定的經驗及知識,先可以話對企業估值有一定的把握力。
假設你投資正確,你將合理區頂的股賣出,轉成合理區底的那股,都可以,但我會建議兩者有明顯差距才會做,否則會好易變成「轉來轉去」。
------------------------------------------------
Q13768:
成哥 我而家月入2萬8 雖然我知道你唔贊成借錢投資 但我今年已27歲 之前投資仍曾經試過失利 眼見方間置業首期大約要準備二百萬
又希望三年後可以結婚 所以最後我都膽粗粗咁比銀行說服借左38萬用作投資 0.13% 實際年利率係3.07 分三年還
但借完後而家又開始擔心自己借咁大筆錢 會再次失敗 起而家呢個市況想作中線投資 所以都想問一下成哥意見 317 345 966 1177 788 2388/11 1818 3147
以上都係我既心水股 如果成哥有另作介紹 我都會考慮 當然風險自己承擔 我希望簡三至四間股份作投資 本人覺得自己偏向進取
短期唔太大既跌幅係可以承受 但始終係想中線投資 所以都唔想會長期坐艇
龔成老師:
借貸投資,不是不可,因為這都是創富的其中一種方法,但當中一定有危有機,你要明白這點。
同時,我地一般只會在「有明顯機會」的情況,在會進行借貸投資,而現時大市只在合理區,因此這方法的值博率只算一般。
至於你現時已借,運用上就小心,建議你投資一些較穩健的股,如果就你上述的股票來講,置富(0788)、恆生(0011)、中銀香港(2388)都可考慮,中生製藥(1177)、維他奶國際(0345)則可小注。
另外,你亦可考慮盈富(2800)、恆基(0012)、金沙(1928)、港交所(0388),小注香港零售股。
------------------------------------------------
Q13769:
想問問呢,你多數既分析教人儲蓄投資
我都明白
因為我32歲 打自己工 做教練 月入3萬左右
我一個人住家人物業
只需交水電管理費
每月儲到15k左右
5月開始月供5千港鐵
持有兩手比亞迪
排緊公屋 7年後有機會用綠表買居屋
同時因為打自己工 好難請假
諗緊係唔係應該買醫療同危疾保險約$2000/月 分擔風險
萬一有唔舒服即刻入私家睇?
還是你會建議儲多2千
留返個市大跌入貨?
龔成老師:
理財策略中,我地應該攻守兼備,保險類是一些防守性產品,在理財中都有當中的角色作用。
因此,適當的保險都要的,但你就要視乎自己的需要去買,無絕對話買幾多的,視乎你想將多少的風險轉嫁比保險公司。
當做好防守後,你就要進攻,投資股票就是其中一部分。你現時持股,都有質素,但就最好加入盈富(2800)去進行月供(可能要減少少港鐵(0066)的金額),以建立更為平衡的組合。
------------------------------------------------
Q13770:
龔sir,想問1115西藏水資源,你睇唔睇好??
至從無左中鐵呢條大水噉,2018年開始跌到依家,近日傳聞有小股東被斬倉,股價急瀉七成,於是我0.57買入左兩注,中線持有可以嗎?
有冇機會仲上返2蚊既水平??
龔成老師:
西藏水資源(1115)出現根本性改變,這類企業要分析其實好難,因為之後的變化無人知,對盈利有幾多影響無人知,風險度會高。
所以,你要明白當中的風險。
由於有根本性的改變,要上翻去好難。
只可以話小心,小注不是不可,但唔好期望會翻去過往高位。
------------------------------------------------
Q13771:
老師 我原本供緊 2800 2500$ 2388 1500$ 今個月開始有鬆動錢 可以供多兩隻股票
1. 恒基地產 12 1500 同埋1928 1500 會唔會太保守 同埋 我想買少量收息股 有冇邊隻可以介紹,或有冇咩地方可以改善
龔成老師:
你可以加上恆基(0012),其實金沙(1928)本身的股息都好好,你可以加入,視為收息股。如果想再加,你可以考慮香港電訊(6823)、置富(0778)。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q13772:
成哥, 想問下你意見。抽到今期居屋的話, 是否仍買入? 本身不用交租有屋自住。在投資方面, 居屋是否仍有優勢。希望收到你的回覆。謝謝。
龔成老師:
居屋有一定的自住價值,但投資價值就不及私樓。
因此,你買入與否的最大因素,一定是從「自住」的角度去考慮。
如果你長期有自住上的需要,只要地點價格合適,你就可以買居屋,因為居屋所支付的現金流,始終較私樓少(無論是買私樓或租私樓),對每月現金流有著數的。
因此,只要有自住需要,就值得買。
------------------------------------------------
Q13773:
阿Sir,關於物業投資。睇你嘅書,喺累積資產嘅角度,第一層物業,你建議用最高按揭成數去投資,呢個我明白認同。
而問題係按揭年期,是不是應該拉到最長呢 (例如25年),但又想15年內財務自由,咁按揭年期點決定好呢?
(將會用書中所講的888甚至666儲物業)
龔成老師:
你應該拉長年期,因為這考慮到資金的成本。
最主要的原因,是由於現時是一個低息環境,我地借多少少(但唔好買大金額物業),同時拉長供款期,目的就是令我地有更多的剩餘資金,以及每月的還款金額較少,令我地每月現金流較多。
只要好好利用資金,只需付出較少的利息成本,例如2%,然後將資金進行投資,只要回報有5%以上(即是有3%的息差),已經是有效利用資金,可以為我地有效地創富。
而這個物業年期,你可以當你多年後,有一定的資金時,進行還款或改變,所以你這刻,不用擔心太早會因財務自由,而要強行減少供款年期。
------------------------------------------------
Q13774:
請問302怎樣?
本人高位$4元買入2萬股
龔成老師:
中手游(0302)這類股,業務變化大,因為本身的行業不確定性高。
佢主要透過合約安排於中國從事手遊發行及遊戲開發業務,提供多種類型的手遊,集團透過IP授權(從版權方取得IP授權後委聘第三方開發遊戲)及遊戲代理(代理自第三方取得的已開發遊戲)兩個渠道獲取遊戲。
現時佢獲得超過31項IP的授權,如「傳奇世界」、「龍珠Z」、「航海王」、「火影忍者」、「擇天記」等,大部分遊戲均在第三方發行渠道發行。
過往財務數據理想,增長快速,但這類手遊行業,加上新股,估值十分困難,不確定性好高。
只可以話,這股有投資價值,有增長力,但股價一定會好波動,企業估值不確定性太高,所以風險高。這類股,你小注持有都可以。
如果你持貨太多,就減部分,如不算多,就持有住先。
------------------------------------------------
Q13775:
您好,本人現計劃月供股票$10,000,預算供15年便屆退休年齡。
有以下心水股票,請問應如何選擇及$10,000 怎樣分配?
盈富、港鐵、中銀香港、煤氣、中電、領展
謝謝!
龔成老師:
你上述的都是有質素的股,都可以進行月供,盈富(2800)可以佔$2500,其餘可以每隻供$1500。
你可以過8年後,開始調整組合,到時減少供上述的股票,同時慢慢增加收息股。
因為我地進行人生財富累積,會以「先增值,後現金流」作模式,所以當你接近退休年齡時,慢慢將財富分配較多至收息類。
因為當你退休,你最重要就是守住財富,同時著重現金流,而不是增值。
------------------------------------------------
Q13776:
龔成老師,想請問近期新上市亞盛醫藥B,6855,中,長線,是否有潛力,謝謝
龔成老師:
亞盛醫藥(6055)這類新上市的股,我無仔細研究,因為新股一向的風險較高。另外這股最大的問題,是未有正式的盈利。
佢主要從事生物製藥業務,核心治療領域包括癌症、HBV及衰老相關疾病。到目前,佢共有8款候選藥物進入臨床開發,正在進行28項臨床試驗和21個在全球範圍內提交的IND(試驗性新藥)。
企業不能話無潛力,但不確定性實在太高,是較高風險的類別,有危有機,只可以話,如睇好佢的產品將來市場發展,小注投資都可考慮。
------------------------------------------------
Q13777:
龔成老師,我想問如果一公司股票市賬率很低,是否影響他的融資能力?
龔成老師:
不一定是負面。
因為銀行在衡量企業的價值時,會同時考慮企業創造現金的能力,以及本身的資產價值,甚至是有否抵押品。
無論是銀行或市場,一定會分析當中的資產價值,資產質素,資產的會計價值,這些因素會影響企業的賬面值。
而市賬率,就是考慮現時股價與賬面價值的比率,銀行最主要考慮當中的賬面值,而未必是現時市場如何衡量這企業價值的指標。
但如果市賬率很低,銀行都會找出當中的因素,但分析點不是市賬率低,而是當中的資產質素。
------------------------------------------------
Q13778:
龔成老師:你好 小弟今年29歲, 冇乜投資股票經驗,有幾個問題想請教你。
問題1
流動現金有300萬。我想透過投資股票 用六年時間 將三百萬 變成一千萬, 該怎樣投資和幾時入市?
問題2
最近買咗你的書 50 值博倍升股第二版,還有什麼你的書介紹?增值自己
問題3
08金融海嘯到現在已超過十年, 我係唔係應該等下一個浪嚟嘅時候先入市?到時應該買什麼呢?(如何分配)
問題4
最近有很多朋友都說買黃金
於是買了約11萬中銀紙黃金(大約1510入)
在11月頭的時候以18.80 5250股 買了1787 山東黃金
現在金價跌左,是否應該再入貨?
請問老師你點睇金價?金價的走勢能反映山東黃金嗎?
山東黃金現價是16.42,如何部署?
龔成老師︰
1) 要6年間由300萬升到1000萬,年度回報率要近25%。如要用股票做到這個回報,要承擔十分大風險。因此,單靠投資根本無法做到你目標。
所以,你一定要靠其他方法,例如《財務自由行》所講的5種方法,其中一種就是「做生意」。你可以試從你興趣、強項,去投入生意中,相信是這是一個較可行方法。
2) 我最新出的《年報勝經》和早前的《股票勝經》,《選股勝經》。
以下是我認為適合初學者睇的書︰
《我十一歲,就很有錢》
《經濟蕭條中,七年賺$1500萬》
《富爸爸,窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪?》
《人性的弱點》
3) 其實,我地不是要「估後市」,而是做「策略」。我地無人知跟住個市會升會跌,幾時到再出現股災。我地唔會知,但我地可以測量現時市況的狀態,從而作出合適對策。
恆指現時27000大約11倍,仍不算平宜,但已在合理區較低部份。這時候,我地的財富組合中,應該持有一些股票資產,同時持有現金,若你沒有股票資產,財富不會增值,若股市上升,你都不能受惠。
你尚年輕,投資可以進取些。你可以將現有一半資金,用分注投資形式投放在平穏增長股︰盈富(2800)、銀娛(0027)、恆基(0012)、中銀(2388)、港鐵(0066)、煤氣(0003)、港交所(388)、長建(1038)或潛力股︰比亞迪(1211),中生(1177)或福壽園(1448)這些有增長力股票上。
另一半資金持股市大跌,才入手掃貨。
4) 首先你要明白,黃金是貴金屬,有「終極貨幣」之稱,是人類自古以來的貨幣,因此,有持有價值,而現時我地的現金,一定長期貶值,所以黃金長期會向上。這裡說的是實金,而不是黃金股。
另外,黃金主要用來平衡黑天鵝事件出現的風險,故不用佔財富比例太多,只要佔1-3%就得。
至於山東黃金(1787)上市不足2年,我一向都新股半新股都無興趣,因為真實面要慢慢先見到。這些半新股估值困難,加上佢財務數據好一般,只建議小注,同時你要明白當中的風險。
------------------------------------------------
Q13779:
龔成,我有$30萬本金,想做中長線投資,可以有咩選擇
龔成老師:
要睇你的年齡、財政、風險承受程度。
就一般人來說,盈富(2800)是較多人都適合的,這是平穩增長型的投資項目,適合你中長線投資。
另外,以下亦是一些優質、平穩增長類的股:金沙(1928)、長建(1038)、中銀(2388)、港鐵(0066)、恆基(0012)、港交所(0388)。
現時大市處合理區,可以一邊投資一邊留現金,暫時可以用$15萬,分注投資,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q13780:
龔成老師,有學說指最近美國減息反映經濟轉弱,對全球股市都會有好大影響,全球即將進入熊市。咁我地應該點處理:
(1) 正在「分注買入」同「月供」既股票?
(2) 如果有新既目標股票,係咪應該等熊市見底先再買入?
(3) 手上持有既股都係風險低既公用股,但我睇往積面對金融風暴,公用股都係會跌得好甘,我地係咪應該轉一D股票做黃金/黃金ETF避險呢?
多謝老師指點
龔成老師:
美國減息,的確代表當然經濟,有轉弱的可能,但我地進行投資時,其實是長期的財富配置,所以,又唔一定要好擔心經濟中短期問題,同時往往有危有機的。
1)保持進行就得,反而我地會希望中短期跌更多,等我地可以買更多平貨,只要長遠上翻去就得。
但就要同錯,每月有現金剩,因為可能日後跌市會出現買平貨機會。
2)要睇這股票的優質股,如果是好優質的股,就算在合理區,都可以分注投資,只要不用盡現金就得,因為無人知佢會唔會跌落平宜區。
3)唔需要轉來轉去,無人知之後的股市是否「一定會跌」,你記住,無人知的。
大家睇過去,都會好易見到所謂的答案,但當身處這刻,其實存有好大未知數,所以,我地只要做好平衡配置就得。
現時整體大市處於合理區,你原有貨只要是優質股就繼續持有,另外保持月供,同時留現金就得。
----------------------------------------------
多謝各位提問,若然你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。
另外,由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。