「紅色的跑車像是帶著神秘」，每一次你喺街截一架的士，就係一場賭博。
昨日，我喺街頭，揮一揮手，想拉開車門第一架冚旗的來了，「去邊呀？」「九龍灣」「唔過海呀」。
第二架，門都未掂到，佢就走。
第三架，你終於上到，司機禮貌周周，點解？因為係用App Call嘅。
到底，係咪我額頭寫住「過海」兩隻字，問都唔問就知我要去九龍？定係好似啲神婆咁，一睇睇你面色，「你印堂發黑呀」，而的士佬喺車入面Scan一Scan你氣場，「你印堂過海呀」到底佢哋係點樣分到呢？
大約兩三年前，Uber大舉攻港，令唔少香港人覺得終於有出路，「我終於唔使受的士佬氣啦」。好景不常，的士業界猛烈抨擊下，政府高調拉人，結果點呢？依家Uber少咗好多車，貴咗好多啦。
利申，Uber同的士之間，我都係揀的士，純粹因為的士司機熟路好多。不過，政府既然咁支持的士業界改善質素，但何解我又未見佢支持到底？
話說，豐田旗下石油氣金豐4座位的士上年停產，本港代理商引入新款混能的士，即係話，未來的士車主要換車嘅，就焗換呢架混能的。不過，原先石油氣的大約26萬，新混能的就要32萬。「貴咗咁多，緊係唔換，整得就整啦！」畀著你係車主，你都會咁諗。
不過，同過政府朋友傾過，佢話，現時香港1.8萬架的士，有三分一車齡超過15年！你市面上見到嘅五人的士，都普遍行咗15年！15年喎！三年又三年又三年又三年又三年喎！再整？仲可以整多幾多年？
更重要係，香港現時係冇設的士退役車齡，即係只要過到驗車，話知佢行咗廿年，都就由佢行架啦。與此同時，巴士行駛年期係不可超過17年；小巴、貨Van都有15年退役期限。到底係因為「紅色的跑車」硬淨啲？定係因為政府牙力唔夠牌主硬淨？又，明明的士係最貴，但點解就唔可以減低我坐殘車嘅機會？說好的「港府致力推動的士業界提升質素」呢？
再者，依家講環保、講碳排放，其實點解唔向的士入手？港府唔係好大力吹捧大灣區嗎？啱啱公佈嘅《粵港澳大灣區發展規劃綱要》寫到明「強化區域大氣污染聯防聯控」「實施多污染物協同減排」「統籌防治臭氧和細顆粒物（PM2.5）污染」。
好似之前補貼柴油貨車換車咁補貼又好，立例限制的士退役期又好，香港作為大灣區其中一個地區，為大灣區人著想，港府、運房局、運輸署推動的士車主換更環保嘅車，唔好令大灣區人吸太多廢氣，其實是責無旁貸唷！
by千頌C@堆填區
http://fb.com/winbigwok
