好耐無鬧過戲之《尚氣》！
（有劇透）
-
即使有梁朝偉同陳法拉兩大香港演員拉返好多分數，但對我嚟講，《尚氣》仍然係一套好難睇嘅電影，應該睇過咁多MCU作品入面，最差嘅一套。
-
撇除男主角劉思慕喺成套電影似笑非笑同目無表情嘅天然呆演出之外（其實一個缺點已經夠死，有時上一鏡影梁朝偉嘅神情，下一秒影返尚氣，根本就係直接處刑），電影嘅缺點仲有好多。
-
電影嘗試去拍出喺外國人眼中嘅東方世界，但大部份時間都只係掂到個外殼，而拎唔到神韻。例如電影入面嘗試展現武術，尚氣喺電影入面擺出架勢，打木人樁，但呢啲只係好膚淺好表面嘅理解，真係要拍武術，呢啲大片，倒不如真係去學返一招半式，整返場醉拳鬧事，耍下螳螂拳，蛇形刁手，用心研究吓武術招式仲好啦。
-
又例如巴士打交，竹棚大戰幾場戲，明顯係向香港動作電影致敬。但睇嘅時候，就唔會有緊張同刺激感覺。點解？因為以前啲戲真係堅嚟架嘛，就算係搵替身，每個鏡頭都係搵命搏，亦係動作場面嘅魅力所在，CG永遠做唔到呢個效果。
-
而成套電影嘅動作設計上，其實仍然有好多可以改善嘅地方，就例如十環嘅設定，我本身無睇過漫畫，但睇戲嘅時候就覺得其實呢樣武器仲有好多發揮嘅位，例如變大縮小啦，可以變成指環出重拳啦，可以砌成唔同工具啦，可以變成飛鏢棍啦鞭啦等等等等，如果可以細心啲去玩嗰十環，一定好睇好多。
-
講咗好多動作設計方面嘅缺點，但其他電影最大獲嘅，係劇本。睇咗戲嘅大家，走出戲院嘅時候，大家到底講唔講得出尚氣係一個點嘅人？佢有咩性格特點？作為一套英雄起源嘅電影，角色嘅設定蒼白無力，我哋只係知道尚氣細個死呀媽，而比老豆訓練成為一個殺手去報仇，而尚氣就選擇走佬，過咗十年平庸嘅生活。點解由細到大被train up做殺手嘅尚氣會突然覺悟走佬？佢同老豆價值觀嘅差異又喺邊度？佢選擇過平淡生活嘅原因又係啲咩？到後來，父子相見，又好似無事發生咁。每一個位，電影都比唔到具說服力嘅答案。
-
掉返轉，由梁朝偉飾演嘅文武嘅嗰條線，其實亦寫得差，只不過係演技搭救，令整體上無咁突兀。文武同妻子相識嘅打鬥，用動作帶動感情，二人惺惺相惜，浪漫迷人。可惜無以為繼，兩個人點解會相知，點解會愛得咁深，法拉有乜獨一無二之處，其實都無仔細交代，但其實呢啲細節對文武呢個角色嘅建立係極重要，去到最後，「食鹽多過你食米」嘅老妖文武會咁簡單地相信幻聽（唔係唔信得，但一定要多啲描寫囉），而妄顧打開地獄之門帶嚟嘅後果，亦講唔過去。
-
而電影去到最後大戰，更加係美學災難，我要被迫「觀賞」兩隻好樣衰嘅龍同怪獸打交，場景又暗，打得又唔好睇，最後仲要喺緊急關頭，無尼啦比男主角個女朋友神箭射中大佬而化險為夷，究竟想表達啲咩？唔通喺西方人眼中，東方人啲審美就係咁肉酸，啲劇情就係可以咁兒戲？
-
以上睇法，全屬個人意見，無可否認陳法拉喺戲度真係好正，舉手投足都有仙氣，而梁朝偉喺戲入面，蠟起個頭，有幾刻我真係以為佢係周慕雲，可惜最後仍然落得無力回天嘅下場，外國可能會收得，因為《尚氣》拍到嘅係佢哋眼中嘅東方世界，但身處於東方世界嘅大家如果唔嫌套戲膚淺同老土，我輸！
神韻演出時間 在 神韻 的推薦與評價
神韻 將為您帶來2024年的全新演出！ 美國、加拿大、歐洲、澳洲和日本的演出日程已經公布，更多國家和城市的演出將陸續發佈： ... ... <看更多>