【打工仔系列:你把秀髮想點先?】
返工迫地鐵,已經係個個打工仔每日都唔想發生但焗住要做沙甸魚嘅例行工事。話說今朝返工,有位長髮及腰嘅女士迫入地鐵,都唔緊要,慣架啦!
弊就弊在佢應該係洗完頭趕唔切吹,又或者有心唔吹自然乾,仲滴住水就咁迫入嚟。入到嚟就梗係hi濕其他人啲衫啦。大家"gipgip"聲之際,佢仲嚟一個神龍擺尾,用手大力撥佢把秀髮,即時一條濕毛巾咁打埋公關仔塊面度。而佢好嘢在,佢係無感覺佢把秀髮打到人。
第一次忍佢,以為無下次。第二次再嚟,gip一聲但佢無反應。第三次再撥,忍唔住:「小姐,你可唔可以唔好再撥你把秀髮,你啲濕頭髮咁迫已經整濕到我,你仲要係咁撥,打到我塊面幾次架啦。不如你忍一忍唔好撥住,或者下次吹乾個頭先上車啦!」
滿以為自己話一話佢,佢就會收歛。但公關仔實在太年輕了,女士即時反擊:「你趕返工個個都趕返工,個個都係咁趕住出門口架啦!頭髮濕整住個背脊就梗係要撥下佢架啦,係我嘅自由,咪以為你惡就得喎。」
「你講得啱呀,真係唔好以為你惡就得呀。就係個個都趕返工,個個迫住係度你攪啲咁嘅野,你啲濕頭髮咁痴埋嚟已經整濕咗我件衫,我都無第一時間話你啦,就係已經體諒大家趕時間。你仲係咁係度撥撥撥,撥到人又唔理。我當你唔知,我就話你聽;話咗你又唔聽,聽咗你又發癲,就係你自己攞假嚟丟囉。你以為自己包車呀,想係架車度點就點,影響到人就你唔啱啦下嘛。你咁做同係架車度痾屎影響人其實無分別喎。」
女士即時面燶下站落咗。
#面係人地俾假係自己丟 #最憎人無禮貌 #技術性擊倒 #晨早流流總係迫人鬧人
Search