【恭喜香港雙十一係海外銷售排第一】
咁點解重要落街買嘢?大減價咪即係幫你交租?
根據新聞,雙十一香港係第一銷售額嘅海外地區(明明係中國一部份喎!)。事實證明香港人其實都好鐘意上網買嘢又好多多餘錢,淘寶都淘儍,天貓又貓到癲。我唔想講買番黎嘅嘢嘅質素問題,問題係竟然市場大到咁,點解本地係完全無大型嘅網購服務嘅呢?
大陸有雙十一,歐美有Black Friday,香港有乜呢?依然係商場大減價,要落街買(即係又要我地幫手交租啦!)。全世界都講緊網上銷售,開始擊敗傳統門市零售。而零售業亦慢慢轉型,變成客人網上購物門市做show room取貨。
唔好講Amazon同ebay厘啲當年咁創新嘅概念,咁學下大陸淘寶咁抄襲下都得掛?我覺得香港無改變因為零售業背後又係同一班業主,幻想著香港人永遠都幫手比天價租!再加上一班一世都唔識醒嘅零售業管理層!
唔好再記住乜鬼香港係購物天堂啦唔該,今時今日個天堂响網上呀!唔好好利用香港厘個免稅港,作為網上銷售平台就係儍!香港地方細好方便,唔適合網購發展根本就係借口。如果係真嘅話,點解香港响雙十一係排第一呀?又為何FB同IG咁多小型公司或者個人,可以開網店搵到錢?
全世界嘅大型零售都係重複又重複嗰啲商品或者牌子,但係零售業全世界都响度轉型做實體加網上銷售。如果只係保住嗰一時三刻嘅租金,根本等如慢性自殺。只不過睇下幾時輪到大型商場,大家睇下香港近十年幾多小型時裝精品商場越黎越死就明白。
#雙十一香港做第一
#網上銷售就排第尾
#比錢人賺
#幫手交租
Search