有人行山見到一條比較大條嘅緬甸蟒蛇(香港原生物種之一)卷死咗一隻狗, 影相放咗上網呼籲行山人士小心!
其實緬甸蟒都係香港其中一種原生動物,佢哋係肉食性動物,食隻狗食隻貓,最自然不過,因為如果佢哋唔食狗唔食貓,亦都會食其他動物!
所以勸籲大家如果見到大蟒蛇,已經卷死咗獵物, 就盡量唔好去影相或者行近騷擾(徐非你同隻狗系有關係,例如係你隻寵物),因為如果蛇受到騷擾的時候會因為緊張害怕,而放棄食物逃走, 蟒蛇係唔使日日進食的動物,佢哋好多時要等好耐時間先至有機會可以捕食到一隻動物, 本應食咁大隻狗食落去,可能已經可以捱幾個月, 而家搞到隻狗又白白犧牲咗,條蟒蛇又食唔到佢辛苦捕返嚟嘅食物! 好多時啲人以為條蛇食食下 吐番隻食物出嚟,以為係條蛇食唔落咁大嘅食物,但係好多時佢哋係因為知道有人喺度,緊張先吐反隻食物出嚟……
睇到留言見到好多自己覺得好奇怪嘅回覆,例如有人會念經
:南無阿彌陀佛
:有人覺得我隻狗好可憐,好憎條蛇
: 好多人覺得點解叫蛇王捉咗啲蛇仲要搵地方放生,應該即刻殺死佢,點解政府仲要保護啲蛇
其實大自然就係咁殘忍,每種動物為咗生存都唔容易, 你食我我食你嘅情況每秒都發生緊, 係一種生態平衡, 蛇食狗食貓 一啲罪都冇, 換轉係貓食老鼠你會覺得老鼠可憐嗎?
人嘅思想非常可怕,尤其是係無知,或係一啲側一邊嘅愛!
題外話, 好多人問我做咩無啦啦走去食素, 我都會好隨意咁答,通常我會講話:冇啦,時間到,想做就做啦,隨心而食!( 食素只係我個人選擇,因為思想改變行為,食素後, 我魚都冇釣過啦,以前好鍾意釣)
其實部分嘅原因亦都係因為,當你了解到你可憐一隻狗嘅時候 ,其實你都有冇可憐過我哋平時每日食嘅唔同種類動物,現今科技咁發達,如果我可以唔食佢哋,亦都生存到,健康亦都冇咩特別問題, 點解我唔改變一下自己口味?
我自己覺得成個重點係,因為我係人,我有得選擇 去食啲乜嘢, 而動物冇……
以上完全係自己嘅觀點, 如有得罪,敬請原諒!
原文
https://m.facebook.com/groups/923321197764614…
Search