十個唔住荷蘭嘅理由
（更多歐洲/荷蘭生活資訊，立即到https://www.patreon.com/allyblahblah）
上一次講咗十個住荷蘭嘅理由，形容到荷蘭好似天上有地下無咁。做人要中肯少少，今次就講一講十個唔住荷蘭嘅理由，平衡一下大家過度興奮嘅心情啦！
1. 稅高
荷蘭堪稱歐洲嘅「萬稅國」。呢一邊嘅稅率比起絕大部份歐洲國家都要高。喺呢邊生活嘅人，除咗要交高昂嘅薪俸稅，另外都要交差餉（有物業的話）、垃圾稅、任何購物要俾VAT等等。荷蘭嘅稅高到，要倚靠30%ruling 嘅稅項優惠吸引外籍嘅高技術人才。
不過，荷蘭稅率對於高科技嘅跨國公司來講，係非常優惠；另外亦都唔會收capital gain tax。但對於一般打工仔來講，交稅真係可以交到手軟。
2. 生活費高
荷蘭嘅物價，比起其他歐洲國家高。若然你習慣咗香港嘅生活方式，經常行街睇戲食飯直落的話，想喺荷蘭有同樣嘅生活真係會有難度。
3. 冇嘢好食
呢個之前講過，荷蘭真係冇咩好食，或者你要識地方/願意俾高價錢先會享受得到高質量嘅食物。個人來講，喺荷蘭試過幾次食物中毒。所以如果遇到質量好嘅餐廳，通常會好快變成忠實粉絲哈哈。
4. 放工做咩好？
即使係大城市，大部份嘅舖頭會下晝6:00閂門，星期六日都唔例外。如果係冬天，太陽好咗落山，呢個營業時間都幾正常。不過如果係夏天，夜晚11點先開始天黑的話，你會發覺放工之後有幾個鐘唔知做乜好。一般都只係同朋友出去食飯、飲嘢就算；如果你想行街shopping，我勸你都係請一日假會好好多。
5. 天氣差
一年裏面，除咗夏天可能好彩有幾星期陽光普照，荷蘭一般嘅天氣都非常差。經常落雨、陰天居多、風大雨大、寒風刺骨⋯⋯因為天氣關係，唔少住荷蘭嘅人衣着都係以實用為主。可能係因為呢個原因，好多荷蘭人一有機會就去南歐或者天氣好嘅國家放假，吸收多啲陽光吖嘛！
6. 好⋯慢⋯呀
荷蘭文化好 consensus-based (注重共識），結果就所有嘢，特別係決策相關(decision-making)嘅事情，都搞到好慢。若然習慣咗生活節奏比較快，過到嚟荷蘭需要一段時間適應。但唔好誤會，去到一啲執行(execution)上嘅事情，荷蘭人效率都係好高嘅。
7. 醫療系統嚇親人
亞洲社會係醫療系統方面，一般會採取「預防勝於治療」嘅策略。但係荷蘭人就剛剛相反，好聽啲講就係「船到橋頭自然直」，難聽啲講就係出咗事再算。普遍荷蘭醫生唔鼓勵定期做身體檢查；你有病痛，醫生會叫你食兩粒止痛藥 （paracetamol)休息多啲，過兩個星期仲係唔舒服再返嚟；甚至有啲醫生會覺得，年青人身壯力健，還重病嘅機會好低，有病痛都未必會轉介你去專科。呢種做法導致「大病應該死唔去，小病就有排你煩」嘅局面。
喺肺炎爆發初期，荷蘭政府亦係用呢個做法去抗疫。關於荷蘭醫療系統，可以講嘅實在太多。有興趣嘅朋友記得留意之後文章！
8. 「過度」推崇個人主義
普遍西方社會同華人社會最大分別，就係西方國家比較崇尚個人主義（individualism)。本身個人主義唔係大問題，但荷蘭人似乎將個人主義推崇到極致，簡單啲講就係自私。比較常見嘅係隨地掉垃圾、狗主會比啲狗隨地大小便、年青人夜晚喺屋企開party完全唔理噪音污染等等。肺炎抗疫亦係一個好好嘅例子，荷蘭似乎特別多人以個人權利為理由，唔理抗疫措施（喺其他歐洲國家情況會好啲），又或者覺得自己去旅行緊要過確診等等。
9. 荷蘭卓異主義
大家可能聽過Dutch Exceptionalism 呢個詞語(荷蘭卓異主義/例外出義)。簡單啲講，即係話荷蘭好「例外」或者「與別不同」，伸延到荷蘭獨特優越嘅意思。雖然荷蘭人唔一定會兜口兜面講，覺得荷蘭（人）比其他國家高人一等，但上至政府領導人（同公共政策），下至普通平民百姓，偶爾都會顯露出「荷蘭與別不同」嘅態度。三言兩語比較難講清楚，有興趣嘅朋友不妨上網Google下呢個字，睇吓相關嘅新聞。想知多啲嘅都可以話我知。
10. 真正融入有難度
要真正融入荷蘭，會有一定嘅難度。文化差異可以係其中一個重要因素。另一方面，荷蘭人對雖然外國人非常友善，但一部份人總會覺得你係「外地人/過客」。又或者，即使你好努力用荷蘭文同當地人溝通，如果當嘅人聽得出你有口音，就會即刻轉英文同你溝通。除非你有屋企人係荷蘭人，否則需要一段頗長嘅時間先至可以真正融入荷蘭嘅社會。
講到尾，針冇兩頭利，冇一個地方係完美。到底一個國家好唔好住、移居係唔係利多於弊，有時真係好視乎個人際遇。無論你想嚟荷蘭又好，或者想移居其他國家都好。記得要好好衡量利弊，唔好盲目做決定啊！
#荷蘭
#荷蘭生活
#歐洲
#歐洲生活
#海外職場
#香港人在歐洲
#香港人在荷蘭
義大體檢 在 義大醫療- 【最新公告】... | Facebook 的推薦與評價
【最新公告】 配合高雄市政府衛生局公告，110年度高雄市老人免費健康檢查，將於01月15日開始提供服務！ 凡設籍高雄市，65歲以上民眾（民國45年12月31日以前出生者） ... ... <看更多>