「白蛇傳是我一生中值得紀念的一件大事。」——羅文
［羅文第一套音樂劇——白蛇傳（七問）］
1. 白蛇傳係咩黎？
答：第一套粵語音樂劇，羅文獨力投資。由羅文、汪明荃、米雪、盧海鵬主演。係羅文人生裡面其中一樣最重要嘅嘢。呢套音樂劇改編自中國民間傳說《白蛇傳》。故事講述蛇妖白素貞（汪明荃）同小青（米雪）下凡，遇上凡人許仙（羅文），小青撮合白素貞同許仙，但係比和尚法海（盧海鵬）阻止，但係愛情戰勝一切，許仙同白素貞天上相會，最後大團圓結局嘅故事。1982年喺利舞台演出，雖然蝕錢，但係創造左歷史，成為第一套粵語音樂劇。
2. 點解羅文會無啦啦想搞套粵語音樂劇？
答：根據書籍《光與影的集體回憶3》，1972年羅文去左睇潘迪華做嘅國語音樂劇《白孃孃》（都係改編自《白蛇傳》），鍾意到癲左而之後萌生出做粵語音樂劇嘅念頭。其實羅文一直都好鍾意美國百老匯嘅音樂劇，又係同佢細細個受藝術薰陶有關，佢好想將呢樣嘢帶翻香港，呢個係佢嘅心願。佢有呢個念頭之後就同潘迪華講佢希望做粵語音樂劇《白蛇傳》。
3. 聽講當時遇上好多困難。
答：當年可以話係無人會肯投資去做音樂劇，因為呢樣表演藝術喺香港係非常冷門，無人睇過。如果決心搞音樂劇一定血本無歸。根據書籍《光與影的集體回憶3》，當年《白孃孃》潘迪華話佢足足蝕左十二層豪宅。但係羅文完全唔理，佢好清楚佢自己想做咩。雖然羅文平時喺台上面成日好潮，無啦啦要演書生角色，或許會有挑戰，但係佢就係因為咁樣好想試下新野，好想突破自己嘅框框，加上佢有粵劇同跳舞底，相信好快就可以掌握角色。
4. 當時羅文做左咩籌備呢套劇？
答：因為當時無人肯投資，羅文竟然決定自己投資。1979年佢成立左「羅文製作有限公司」（白蛇傳黑膠後面亦有寫呢個名），1981年再自資開「排藝社」，十幾萬十幾萬咁投資，希望租比d無地方排練嘅藝術愛好者，又有地方比自己排練。服飾、dancer、舞台裝飾、燈光等全部都要錢，又要培訓新人，但係佢完全唔理，佢淨係想做一套好嘅劇比人睇。蝕到癲左，但係佢唔理，因為呢個係佢嘅心願。
5. 呢套音樂劇嘅歌係邊個寫？
答：詞全部係黃霑一手包辦，曲就係由趙文海同埋鍾肇峰作。本身由顧嘉煇作曲，但係顧嘉煇當時太忙碌所以就推辭。演出之後有推出黑膠唱片，有分普通版同精裝版。黃霑寫嘅詞真係靚到唔識形容，好有意境。（文末有link可以欣賞）
6. 排練嘅時候有無d有趣嘅事？
答：根據書籍《光與影的集體回憶3》，米雪話當年消耗嘅體力好大，羅文知道米雪鍾意食朱古力就日日都幫佢準備一條朱古力。
同埋話說當時需要做一樣嘢叫做揈水髮，去表達角色混亂嘅情緒，再接一個「殭屍倒地」嘅動作（90度打直跌落地）如果平常無訓練，係好容易撞到個頭（文末有link重溫）。羅文成功練到呢個動作，書籍《光與影的集體回憶3》裡面話羅文嘅助手憶述其實當時原來係喺羅文嘅頭飾上面搽左少少酒，消毒之餘令到佢暈暈地，最後就成功做出呢個動作。
另外，當時羅文因爲都好注重服飾，汪明荃同米雪話想加d髮簪羅文都會加比佢地，總之有咁靚扮咁靚。點知汪明荃同米雪貪靚，越插就越多，羅文仲話：「你兩個頭好似兩盞水晶燈！」
7. 佢之後仲有無搞第二套粵語音樂劇？
答：有，1984年《柳毅傳書》。呢次搵歐陽佩珊做主角，又係落曬重本。呢次就終於順利搵到顧嘉煇作曲，黃霑就作詞兼編劇，再搵埋劉培基設計服裝。由於呢次嘅製作仲大過《白蛇傳》，蝕嘅錢仲多，不過羅文當然唔會介意。
如果大家有興趣進一步了解《白蛇傳》，可以買書籍《光與影的集體回憶3》，裡面有一個chapter係講《白蛇傳》，簡而精。
參考書籍：《光與影的集體回憶3》- 翟浩然著
參考片段：港台節目《不死傳奇 - 羅文》
白蛇傳音樂可以喺呢度欣賞：https://www.youtube.com/watch?v=ZJhQfabwmOk
白蛇傳有幾段表演俾人upload左上youtube：https://www.youtube.com/watch?v=f0ebZ7dcKKo
羅文殭屍倒地動作：港台節目《不死傳奇 - 羅文》16:00開始：https://www.youtube.com/watch?v=O1ywoDeiZj4
第一頁相：白蛇傳黑膠封面
第二頁左上角白蛇傳劇照來源：https://www.hkmemory.hk/MHK/collections/Roman_Tam/All_Items/images/201710/t20171010_86676_cht.html
第二頁右下角角白蛇傳劇照來源：https://www.hkmemory.hk/MHK/collections/Roman_Tam/All_Items/images/201710/t20171010_86675_cht.html
翟浩然 在 光與影的集體回憶- 路，始終告一段。 翟浩然在《明報周刊》所 ... 的推薦與評價
路，始終告一段。 翟浩然在《明報周刊》所撰的〈集體回憶〉專欄，到此為止。 後會有期。 ... <看更多>