【如何情緒勒索你老細：諸葛亮《出師表》】
#DSE雞精
#DSE範文
嚟到第四篇，我地都知大家就嚟考試，呢幾日寫到幾多得幾多！今日同大家講下諸葛亮嘅《出師表》！
▍主旨想講乜？
出師個「師」，其實就係講軍隊。出師，即係就快打仗之前，寫個「表」俾老細睇。《出師表》係身為臣子嘅諸葛亮寫俾劉禪，即係蜀漢第二代皇帝。咁點解要「出師」呢？因為三國時期，三個國家都希望統一全國，即係食左對方啦。所以諸葛亮就希望北伐。係臨出發之前，表明心跡，而且想幫死鬼先帝教育下呢個少主劉禪，所以就寫咗呢篇名篇。
篇野係咁講。先帝當初出黎建功立業，但係「中道崩殂」——即係中途死左。天下分左三塊，依家情況好危急——「誠危急存亡之秋」。但先帝對我地好好，所以我地都會報恩，就報係少主劉禪(陛下)你身上。
第二段已經說教喇，教少主唔好妄自菲薄，要聽人講野；跟住就講實際上點樣治國先會好：中央同地方政府，係一體嘅；賞罰要分明，唔可以偏私，內外唔可以「異法」(用兩種法度)。然後又推介咗一班舊臣，「係好野黎架」。
跟住就講歷史。話漢朝(西漢同東漢)，係因為親賢人，遠小人而興盛；之後衰到咁，就係因為掉返轉，親小人，遠賢人。所以陛下(劉禪)如果做得到親賢人遠小人，香港一定得……係漢室一定得。
講完大道理，梗係要講D溫情野。諸葛亮就講自己喇。「臣本布衣，躬耕於南陽，苟全性命於亂世，不求聞達於諸侯。」佢本來係個廢青，係亂世裡面都係打算自己做毒L就算，無諗過出名，不過得你老豆賞識我，所以臨危受命，做咗呢個位。依家南方已定(即係蜀漢，現今四川一帶)，所以要北定中原，打走曹魏班奸臣，返返去舊嘅首都。呢一段係講點解要出師北伐，你都知打仗好哂人力物力，點解唔守住蜀漢就算？所以要說服老細俾佢去馬。
最後一段，係請求劉禪授權佢去北伐，以告先帝之靈。最後一句「今當遠離，臨表涕泣，不知所云」，係話自己就快走，寫呢篇野寫到眼淚鼻水出哂黎，唔知自己講咩。但呢個修辭手法嚟嘅啫，《出師表》當然寫得好，曉以大義，情理兼備，講完歷史又講個人CV，最後仲要情緒勒索，邊個都俾佢打動到啦。「好喇好喇唔好喊喇，你去北伐啦咁。」
▍時代背景係乜？
係三國時代中後期，當時漢朝已經滅亡，魏國、吳國同蜀漢都先後稱帝。蜀漢就因為話自己係漢朝後代，所以佢去攻打其他國家，都係用「光復漢室」呢個名義。
《出師表》成文於227年，嗰個年代，唔好話曹操已經死左，魏國當時嘅魏明帝已經係曹操個孫。所以當時諸葛亮就咁計數就47歲，不過果個年代，47歲都已經中老年，所以佢已經有心理準備，今次唔得就PK喇，所以係最後一擊。
▍諸葛亮係邊個？
作者就係諸葛亮，正如之前所講，佢本身真係地方的毒L，但之後得到劉備三顧草廬請佢出山，之後就做左蜀漢軍嘅軍師，之後仲拉攏咗吳國一齊對抗曹操，即係赤壁之戰，成功令曹操大軍大敗。之後佢實際上都係蜀漢政治同軍事嘅實際領導者。最後佢先後五次北伐，都俾操控咗魏國政權嘅司馬懿守得住，最後係第五次北伐途中病死於五丈原。
▍重要句子（具背誦價值）：
1. 「親賢臣，遠小人，此先漢所以興隆也﹔親小人，遠賢臣，此後漢所以 傾頹也。」
2. 「臣本布衣，躬耕於南陽，苟全性命於亂世，不求聞達於諸侯。」
3. 「先帝不以臣卑鄙，猥自枉屈，三顧臣於草廬之中，諮臣以當世之事。」
▍小知識
由於諸葛亮智謀實在太神，而且佢政治軍事才能的確好高，所以四川一帶，盛行拜祭諸葛亮嘅民風，亦有唔少廟係專門用黎拜佢。加上後來《三國演義》嘅寫作方法，諸葛亮嘅地位就更加去到神級。
由於《出師表》實在太出名，係網絡時代亦有唔少改編作品。例如粵語版《出師表》，睇完原文可以再睇粵語版，就會更加明白篇文嘅意境喇。
https://forum.hkgolden.com/view.aspx?type=BW&message=3229579
============================
"Oh Readly?" - Flip a page everyday.
#一班鐘意睇書又想荼毒大家睇書嘅90後
#多多指教
============================
有文學野想分享？
歡迎各位Reader Inbox我地🐱
