關於 自己 岩 做咩工 ，我們在網路上蒐集到這些相關的討論、資訊與評價

《大地之嫂求職記》

搵工真係一條好漫長又艱辛嘅路。以下故事用以鼓勵正在努力搵工嘅你們。

可能有d悶有d長，但搵工過程就是如此。

————

嘩，咁就8月。黎左法羅群島就快一年啦。雖然中間係咁返香港，但係斷斷續續地，咁就一年。

上年8月黎到法羅群島，仍然抱住遊客心態，希望到處走走，遊山玩水。當時大地之子連婚都未求，我仲係大地女友。老實說，當時真係一時衝動搬過黎生活，無諗太多將來嘅野，當係去一個未知嘅國度體驗下唔同嘅生活。心諗：「人生中住過喺呢個地方都幾得意。」

到今天，我已經成為左大地之嫂，身份改變左。中國人話：「嫁雞隨雞，嫁狗隨狗。」我嫁著大地之子就通山走，已經唔係話鐘意返香港就返香港。一年過後，身份變左，當然心態都要變。由遊客mode 轉成local mode。之前日日喺屋企hea都唔覺得有羞恥心，咪當放大假囉。但婚禮過後，慢慢送走30個我人生中嘅摯親好友返香港，生活突然又靜左落黎，的確，內心係有少少空虛同淡淡嘅憂傷。於是，我整左網站whereisfaroesislands，一黎想幫助黎旅行嘅大地之友們，二黎唔想咁悶。但當網站完成左，生活又回歸平淡。每次爸爸打黎：「點呀？日日喺屋企悶唔悶？」當然悶啦，但女兒不說。始終唔想老人家擔心。但內心嘅廢青無力感與日俱增。有時真係會問自己，我喺度做緊咩？其實我一直都有搵工，但係被拒絕左好多，大多數嘅工作都列明要識法羅語，不過係我自己想搏一搏，但大多都無辦法變做摩托。

但
我
係
唔
會
就
咁
放
棄
架

我見到有間花店請人，話無經驗唔緊要，最緊要有創意，有誠意。於是我將咁多年黎整畀大地之子嘅手作禮物抽出其中幾樣shameless 地加喺電郵附件寄埋畀個經理。（我諗經理心諗，點解要逼我睇你地d相，收手啦）最後經理可能見我窮途沒路，連私人照片都要出賣嘅時候，畀左份part time job 我。叫我每星期返10-15個鐘，整下花球，插下花咁。我都好感恩得到左呢份工，好似都幾有趣，但佢叫我8月中先返工。咁當然我唔會停止搵工啦，始終想搵份full time。

求職網係法羅文，所以我係好被動咁依賴大地之子過濾完咩工岩我，再話我知，多數都係侍應工。但我唔識法羅文，想做侍應都無得我做。與其坐以待斃，不如諗下自己想做咩工，主動出擊。我最想做就係旅遊業相關嘅工。試過寄求職信去旅遊局、大西洋航空公司都話唔請人。到底有咩工可以接觸旅客又可以用英文溝通？

酒店front desk！

於是我將所有喺首都嘅酒店電郵搵晒出黎，逐間問請唔請人。

皇
天
不
負
有
心
人

其中一間真係覆左我！仲叫我去面試😭😭好滾動！但係欲知後事如何，請聽下回分解。打到呢度好眼訓，訓先🤣🤣🤣🤣

---------------------------------------------------
❤️我從九龍半島搬到法羅群島出左網頁啦！想知道更多法羅群島旅遊資訊或者想分享法羅群遊記，記得去 www.whereisfaroeislands.com

❤️如果想睇更多大地之嫂同大地之子嘅無聊小故事，大家記得去我個page度較返See first 呀！

❤️仲有要記得follow埋ig: whereisfaroeislands ，
https://www.instagram.com/whereisfaroeislands

// 讓 我 飛 的 你

有新入職的朋友問我，做呢行，另一半咪會好易偷食囉？嗯，我覺得佢係會偷食既，就算你做咩工都會偷食，防不勝防。佢係愛你既，無論你一個月有幾多日唔喺香港，佢都係唔會偷食。佢真係愛你既話，錫你都黎唔切啦，點會捨得要你擔心，更加唔會傷你心，因為佢都好怕你離開佢。

係既，有時飛long haul，一上機就十幾個鐘失去聯絡，又連續幾日唔喺香港。一開始我都有驚過。不過信心係慢慢built出黎。當大家都知對方真係珍惜自己，其實都會自動自覺behave。老老實實，我都有幾次喺outport被搭訕，但我知道喺香港有一個人等緊我，有食唔食先係正確到極。同樣，就算佢約其他女仔去影相，我都唔會過問，對住岩既人，佢係會十倍回報你既信任。

不過，唔係每個人都識得珍惜。

遇上現任之前，我遇上過很多仆街。仆街得一腳踏幾船，唔承認同我一齊，謊話連篇但每次都比我拆穿，仲同我一齊既時候用第個女仔張相做wallpaper，搭上我最好的朋友，etcetc。而最戇鳩既係，我一次又一次心軟，一次又一次原諒佢，一次又一次犧牲自己的自尊，明知佢呃我都自欺欺人，以為咁樣就係好偉大，咁樣就係愛情。

然後每日都擔驚受怕，好驚又睇到佢同其他女仔曖昧既message，成日stalk佢同身邊女仔的facebook/ instagram，成日覺得自己比唔上其他女仔，佢對眼大過我，又邊個對腳好幼，呀邊個大波又叻過我。佢唔比我著短褲，唔比我同男性朋友相處，唔鍾意我整皮跳舞。。成日都係度猜疑、嗌交、崩潰，唉總之就係無限輪迴，苦不堪言，成個人都暗淡無光，非常咁消耗。

到最後，我都唔係好記得點散啦。好似係佢單方面宣佈分手然後同左我下家一齊。嗰半年，每晚都訓唔到，天光先訓，三四點起身，醒左之後無動力起身，日日聽張惠妹，iTunes就係我要快樂、心的距離、煎熬、愛我還是好。成日都係度喊，唔想見人，無胃口食野，瘦到得番八十幾磅。

然後我開左竅。
有啲仆街，你對佢幾好都無撚用的。
如果你遇到呢啲人，快啲放手。

所以我非常感恩遇到而家既佢。當我飛完longhaul塊面乾到甩皮、黑眼圈去到顴骨，佢依然話我好靚，想去旅行，佢陪我去，我要擺檔搞市集，佢就做苦力。唔再需要似邊個邊個，唔再介懷我邊度唔夠人地靚，唔洗驚講得太多粗口比人嫌棄，我唔再怕比較，因為佢就係鍾意麻甩烏where直腸直肚既我。

我覺得，一個女仔靚唔靚好多時都取決於佢有無自信，如果佢另一半識愛惜佢，支持佢比到信心佢，個女仔就會由心靚出黎。如果佢一路都支持你做自己鍾意既事，請好好珍惜，因為真正愛你既人，先會想你越飛越高發光發亮，而唔係將你困住怕你太過耀眼。

情人節standby畫下咭，祝各位情人節快樂，call撚左我喇😂

空服心聲：
wherever I go, I carry your heart.