話說我個女上次考試，成績名次由原本嘅A變成D(最低係E)。 我問佢覺得點，佢好口響咁樣同我講:「我想experience一下低分呀！」
聽到佢咁講之後，我心入面諗: 似我！
話說我中四嗰一年成績好差，學校考試九科之中有五科唔合格，又F又G咁樣。睇到我嘅成績表，我父親露出擔憂嘅表情，之後仲同我報咗建造業訓練局嘅管工課程，希望我讀唔成書都可以做到個地盤工頭
但我同我父親講:「唔使愁，其實我未盡力」
就喺中四升中五嗰一年嘅暑假，我一次過將中四全年嘅書自己溫熟一次， 每日大約溫八至十個鐘
到咗中五嗰一年，我每日只係瞓五個鐘，其他嘅時間都用嚟溫習。 就係嗰一年，新奇嘅事發生咗，我順利升上中六結果仲考入大學
喺中五嗰一年，其實係有一段小插曲嘅。 話說我讀嘅係佛教學校，佛學係必修科而且會考要考嘅
但我知道入大學通常唔會睇呢一科，但亦好可惜，學校係唔畀drop呢一科嘅
喺中五呢一年入面，我一方面要自己追返中四嘅課程，一方面又要追上中五呢一年教嘅書
喺時間極度有限嘅情況之下，我做咗一個令人o嘴嘅決定: 學校可以唔畀我drop佛學， 但唔可以阻止我會考唔畀錢考呢科
結果我成為咗全校唯一一個會考唔畀錢考佛學嘅人。 呢件事，我唔知係咪前無古人後無來者。 但我知嘅係由嗰一日開始，佛學老師對我就特別「嚴格」，成為咗佢嘅target
你有你壓力，我有我壓力。 呢樣嘢我都明。 但我始終認為佛教問題，佛教解決
我會考唔考佛學，唔代表我抗拒佛教。我唔背誦佛學高人嘅歷史經歷，唔代表我唔buy佛學嘅philosophy
有時我會諗， 與其用世俗嘅方法去處理我， 倒不如用佛教嘅方法同我講一句:「可能你與佛無緣，祝君安好」
不過話分兩頭，佛學高深莫測，並唔能夠期望每一個人都進入化境嘅
講返建造業訓練局嗰一邊，當時會考放榜之後學校中六收返我，但我依然覺得建造業訓練局有就業保證。 放榜之後幾日去咗建造業訓練局interview
對你惡形惡相嘅人，唔一定係衰人
去到建造業訓練局嘅面試，導師見到我會考嘅成績即刻對我黑面。 佢用好唔耐煩嘅語氣同我講:「你揸住咁嘅成績入嚟，我冇得唔收你。 但我唔想你讀咗幾個月之後又嫌棄我哋之後退學，嘥你時間又嘥我時間。你咁鍾意建築，不如你去大專讀高級文憑啦！」
嗰陣時咁啱我又有報大專聯招，第一志願係測量。 結果測量系高級文憑真係收咗我
嗰一刻我又步入人生另一個交叉點: 究竟係升讀中六賭一鋪搏升上大學， 定係穩穩陣陣讀高級文憑呢？
經過反覆思量之後，我諗: 高級文憑始終比 大學學位低一線。 人望高處， 我都係放棄高級文憑，讀中六去博一鋪！
中六中七嗰兩年係我人生最辛苦嘅兩年，因為我放棄嘅已經太多。 升唔到大學就等於白白過咗呢兩年。 所以我當時目標只有一個，就係升上大學！
又有邊個會估得到，我喺捱完中六中七嗰兩年之後，又會放棄大學學額出嚟做嘢呢？
我仲記得我去大學交放棄offer信，喺踏出校門回頭再望大學牌匾嗰一刻，我喺心入面喊咗出嚟，只不過表面上強忍住
考唔到大學出嚟做小薯冇所謂; 但如果考得到大學又放棄，而出嚟做小薯，就好大壓力
點解？
因為當時嘅我係咁樣諗嘅: 放棄讀大學係一個好高風險嘅決定，呢個決定正確與否，好視乎我日後嘅 achievement 會唔會比選擇讀大學嗰條路更加高
於是喺住後嘅好多年入面，我都同緊一個無形嘅人比試: 嗰個就係選擇咗讀大學嘅另一個我。 呢一種諗法直至最近，有自己嘅business，我先至放返低
因為打工，係睇學歷。做小老細，係講能力，冇能力嘅學歷，只係一種裝飾
一畢業就做管理層可能係一種尊貴。但經過 小薯階段先至做管理層，又係另一番體驗
以人生嘅角度嚟講，我比一出身就做管理層嘅人，多一種人生閱歷，亦多一份趣味
講返我個女考試成績大退步呢件事。 成績只係一時，高分有高分嘅趣味，低分亦都有低分嘅趣味
人生就好似打機一樣，有贏有輸，有高有低，咁先至好玩！
