【《花木蘭》歐美地區直上串流，影響點止非非咁簡單？】
《花木蘭》上串流、《新異變人》都唔上串流，估你唔到迪士尼。
一單還一單，可能你會覺得佢抵死，但其實迪士尼呢步棋好大碌。
永遠跟住《TENET天能》做事嘅《花木蘭》，喺人哋定檔海外市場8月尾、9月4日（美國部份城市）嘅勞動節長假後，佢又學人玩一半一半。《花木蘭》將會同樣喺勞動節長假9月4日上架Disney+，但就玩新嘢，用到成US29.99先睇到（一般係US$19.99），而喺睇唔到Disney+嘅地區，就將會喺同日上畫－－意即大陸市場終於等到喇！
不過咁，Disney+睇到自自然然你打「線上看」都可以睇到，尤其是大陸市場，Disney呢步棋唔知點防？
對於呢件事，港台觀眾都表示花生滿地、小鳳姐出曬場，但其實有Disney+嘅地區用30蚊美金就睇到，加上海外市場照上畫，作為迪士尼一個「試水溫」嘅舉動，分分鐘賺得仲多－－邊有人估到《魔法精靈：唱遊大世界》「戲院串流同步」會大賺？其實對套戲都影響不大，上啲唔上啲，長遠反而對戲院業嚟講又係一大打擊。
據Deadline報道，有美國業界對迪士尼呢個決定表示震驚，認為一套現象級電影（未有疫情前，預期開畫票房會達8,000萬美元）竟然上串流，分分鐘第時唔會再需要戲院合作，而迪士尼唔駛同戲院拆數，仲可以直接喺Disney+大賺，好似仲有so。
當大家覺得《花木蘭》呢類戲冇可能直上串流，佢都咁樣做時，會唔會癲到第時《黑寡婦》都上Disney+，真係冇人知。如果《花木蘭》串流大收到好似《魔法精靈：唱遊大世界》種地步，剛剛上星期Universal先簽訂咗「17日空窗期」呢單歷史性嘅Deal，有自家Channel嘅迪士尼，連17日都唔駛等可以直接上架，一次成功後，如果之後都繼續咁去，會唔會徹底改寫戲院生態？喺北美戲院望穿秋水，就係等一套「現象級大片」出現時，佢咁樣再搞一搞，希望完之後又失望，繼而仲絕望埋，戲院業界仲頂到幾耐？
當日我開咗個 #魔法精靈唱遊大世界之亂 tag，睇嚟可以開定個 #花木蘭之亂 tag。
《花木蘭》香港係咪照跟9月4日上映？或者大家覺得關我＿事，又或者咁講，挑，戲院開得到先講啦。
其他延期電影時間表可看留言連結。
【‼️留意‼️】
「晞。觀影記事」Patreon加強版已經開幕，更多精選深度獨家電影文章，請即訂閱：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
